Лукашэнка заявіў, што Украіна прапанавала яму заключыць пакт аб ненападзе. Што думаюць у Крамлі?
Сёння Аляксандр Лукашэнка правёў чарговую нараду са сваім атачэннем, падчас якой нагаварыў шмат адметнага. Гісторыяй пра стварэнне камісіі па вяртанні палітычных эмігрантаў справа не абмежавалася
Лукашэнка таксама заявіў, што афіцыйны Кіеў нібыта прапанаваў яму заключыць пакт аб ненападзе. Праўда, на гэты конт ён выказаўся тыпова для сябе — у стылі і вашым, і нашым.
«Не ведаю, навошта гэта ўкраінцам. З аднаго боку, просяць
нас, каб мы ні ў якім разе не ваявалі з Украінай, каб нашыя войскі туды не
рухаліся. Пакт аб ненападзе прапануюць заключыць. А з іншага боку, рыхтуюць
гэтую грымучую сумесь і ўзбройваюць іх. Польшча, Літва наогул ачмурэлі. Навошта
гэта ім трэба? Незразумела. Таму мы вымушаны жорстка рэагаваць. Нам па
перыметры хапае пытанняў — і ў паветранай прасторы, і на зямлі, зялёная мяжа. У
нас там хапае праблем. Дай бог утрымаць усё гэта. А яшчэ ўнутры нас нехта будзе
ствараць? Таму рэакцыя на вось гэтую ўнутраную не апазіцыю, а экстрэмістаў —
вылезлі з-пад плінтуса, не вылезлі — будзе жорсткая. І хай не крыўдзяцца: мы
папярэджвалі», — заявіў Лукашэнка.
У Крамлі, якому
пакт паміж Беларуссю і Украінай яўна нявыгадны, ужо адрэагавалі на гэтыя словы.
Ну як адрэагавалі… Прэс-сакратар Уладзіміра Пуціна Дзмітрый Пяскоў сказаў, што
не можа пракаментаваць і не валодае інфармацыяй пра словы Лукашэнкі наконт
пакта. Пра гэта паведаміла РІА «Новости».
«Я не магу пакуль пракаментаваць. Не маю інфармацыі», — сказаў Пяскоў, адказваючы на адпаведнае пытанне.
Офіс прэзідэнта Украіны пакуль ніяк не пракаментаваў словы Лукашэнкі. Але ў каментары «Л*стэрку» выказаўся старшыня Камітэта Вярхоўнай Рады Украіны ў замежнай палітыцы і міжпарламенцкім супрацоўніцтве Аляксандр Мярэжка.
«Я не веру, што такая прапанова магла наогул быць. Нават з
чыста фармальнага пункту гледжання заключэнне любога міжнароднага пагаднення —
гэта працяглы, фармалізаваны і публічны працэс. Прычым такое пагадненне часта
патрабуе ратыфікацыі парламентам», — патлумачыў Аляксандр Мярэжка.
Ён таксама дадаў, што «з чыста псіхалагічнага пункту
гледжання Лукашэнку нельга верыць».
«Лукашэнка часта робіць супярэчлівыя заявы, якія не
адпавядаюць рэчаіснасці», — адзначыў Мярэжка.
Тым часам гісторык
Аляксандр Фрыдман у сваім тэлеграм-канале падзяліўся алюзіямі на тэму пактаў,
якія заключаліся раней у нашым рэгіёне.
«Заявы Лукашэнкі
аб тым, што нехта (Украіна? Захад?) хоча заключыць з ім пакт аб ненападзе на
Украіну, апускаюць нас у свет фантазій і мар аднаго канкрэтнага чалавека. Гісторыя
пактаў аб ненападзе фактычна скончылася ў Еўропе разам з ганебным пактам
Молатава — Рыбентропа, але людзі, ментальна захраслыя ў 20-м стагоддзі, гэтага не
ўсведамляюць», — напісаў Аляксандр Фрыдман.