Літва заяўляе, што мае доказы датычнасці беларускіх памежнікаў да сітуацыі з мігрантамі
Міністр унутраных спраў Літвы Агне Білатайтэ ў інтэрв’ю Delfi заявіла, што ўлады валодаюць доказамі датычнасці беларускіх памежнікаў да сітуацыі з павелічэннем нерэгулярных мігрантаў з тэрыторыі Беларусі. Яна таксама назвала сумы, у якія, па яе словах, абыходзіцца перавозка аднаго чалавека.
Міністр унутраных спраў Літвы Агне Білатайтэ праверыла ахову мяжы з Беларуссю. Фота: vrm.lrv.lt
«У нас сапраўды ёсць доказы датычнасці беларускіх памежнікаў да гэтага працэсу, гэта факт. Гэта арганізаваная дзейнасць, пэўная схема — добра арганізаваная, спланаваная. Гэта вялікія грошы, бо перавозка аднаго чалавека каштуе каля 15 тысяч долараў. Такім чынам, гэта відавочна прыбытковае злачынства з удзелам рэжыму і саміх чыноўнікаў», — цытуе словы літоўскага міністра REFORM.by.
Паводле яе слоў, указанняў на ўдзеле ў гэтай схеме грамадзян Літвы пакуль няма, але сітуацыя адсочваецца, мігрантаў дапытваюць, праводзіцца аператыўная выведка. Яна лічыць, што сітуацыя, якая склалася, пагражае літоўскай міграцыйнай сістэмы, паколькі раней краіна не сутыкаліся з такімі патокамі.
Пры гэтым міністр кажа, што пакуль сітуацыя знаходзіцца пад кантролем.
«Пакуль мы можам дастаткова эфектыўна каардынаваць сітуацыю і з наяўнымі магутнасцямі, але, калі мы ўбачым, што сітуацыя складаная, вядома, мы аб’явім экстрэмальную сітуацыю», — паведаміла яна.
«Гэта праблема не Літвы, гэта праблема ўсяго ЕС. Таму і прэм’ер-міністр, і я асабіста прадставілі сітуацыю на мяжы з Беларуссю Савету міністраў унутраных спраў ЕС і выказалі чаканні і просьбы аб дапамозе. Патрэба ў першую чаргу фінансавая, а таксама экспертная. Цяпер мы вызначаем канкрэтныя патрэбы і тое, як гэтая дапамога можа быць дастаўленая ў Літву», — распавяла кіраўнік МУС.
Паводле яе інфармацыі, для назірання за сітуацыяй Еўрапейскае агенцтва памежнай і берагавой аховы FRONTEX ужо накіравала 6 афіцэраў, а ў сярэдзіне ліпеня для дапамогі ва ўмацаванні бяспекі мяжы ў Літву прыбудуць 30 афіцэраў FRONTEX.
Мэта — ахапіць усю мяжу з Беларуссю сучаснымі сістэмамі відэаназірання ў самыя кароткія тэрміны. Цяпер яны пакрываюць усяго 38% мяжы.
«Гэта не толькі плот. Найбольш эфектыўныя рашэнні ўключаюць сістэму назірання, выяўлення і, пры неабходнасці, фізічную агароджу. Наколькі нам вядома, плот можа працаваць маральна, але яго лёгка пераадолець — за 2-3 хвіліны яго можна пераадолець і трапіць у Літоўскую Рэспубліку», — распавяла яна.
Усяго сёлета ў Літву спрабавалі ўехаць 555 нелегальных мігрантаў з Беларусі. Гэта амаль у сем разоў больш, чым было за ўвесь 2020 год. Летась быў зафіксаваны 81 такі іншаземец, у 2019-м — 46, у 2018-м — 104. Толькі за ўчорашні дзень літоўскія памежнікі затрымалі 39 мігрантаў, якія незаконна перасяклі мяжу з Беларуссю. Для размяшчэння мігрантаў быў пабудаваны намётавы лагер. Літва ўзмацніла ахову мяжы з Беларуссю. Акрамя розных арганізацыйных мерапрыемстваў, да гэтага ўчастку былі прыкамандзіраваны памежнікі з іншых падраздзяленняў і вылучаныя дадатковыя тэхнічныя рэсурсы. Акрамя таго, на дапамогу памежнікам прыйшлі сілы Службы грамадскай бяспекі, Саюза стралкоў і іншых структур.