Аўстралія ўвяла санкцыі супраць двух прадпрыемстваў Беларусі і расійскіх прапагандыстаў

Аўстралія пашырыла спіс фізічных асоб і арганізацый з Расіі, супраць якіх уводзяцца санкцыі з-за падзей ва Украіне, вынікае з дадзеных на сайце аўстралійскага міністэрства замежных спраў і гандлю.

Згодна з апублікаваным спісам, санкцыі ўведзеныя ў дачыненні да гендырэктара МІА «Расія сёння» Дзмітрыя Кісялёва, генеральнага дырэктара RT Аляксея Нікалава, журналіста і вядучага Усерасійскай дзяржаўнай тэлевізійнай і радыёвяшчальнай кампаніі Сяргея Брылёва, гендырэктара холдынгу «Газпром-Медыя» Аляксандра Жарава, тэлевядучага Міхаіла Лявонцьева, ваенных карэспандэнтаў Яўгена Паддубнага, Аляксандра Коца і Дзмітрыя Сцешына, а таксама дырэктара Цэнтральнага музея Вялікай Айчыннай вайны Аляксандра Школьніка, піша АФН.

Акрамя таго, у санкцыйны спіс трапілі першы намеснік дырэктара ФСБ Сяргей Каралёў, в. а. кіраўніка МНС Аляксандр Чупрыян і першы намеснік начальніка Генеральнага штаба Узброеных Сіл РФ Мікалай Багданоўскі.

Абмежавальныя меры таксама былі ўведзеныя ў дачыненні да ПВК «Вагнер» і двух прадпрыемстваў Беларусі — «Мінатор-Сервіс» (займаецца распрацоўкай і вытворчасцю ўзбраенняў) і ААТ «КБ Радар».

Санкцыям падвергнуліся і былыя дэпутаты Вярхоўнай рады Украіны Ілля Ківа і Тарас Козак.