Саюз беларускіх пісьменнікаў патрабуе спыніць гвалт у дачыненні да мірных пратэстоўцаў

Сакратарыят ГА « Саюз беларускіх пісьменнікаў» выступіў з адмысловай заявай з нагоды прайшоўшых прэзідэнцкіх выбараў і сітуацыі ў краіне пасля іх. Арганізацыя патрабуе правядзення паўторных сумленных выбараў.



У заяве пісьменніцкай арганізацыі гаворыцца: «Падчас галасавання былі выяўлены шматлікія парушэнні выбарчага заканадаўства: перашкоды ў працы і затрыманні грамадскіх актывістаў, незалежных назіральнікаў, супрацоўнікаў штабоў і давераных асобаў кандыдатаў у прэзідэнты, адсутнасць міжнароднага назірання, забарона незалежных экзіт-полаў, маніпуляцыі з датэрміновым галасаваннем, што ў выніку стварыла перавышэнне яўкі выбаршчыкаў на шэрагу ўчасткаў для галасавання».

На думку літаратараў, «усё гэта разам з беспрэцэдэнтнымі па сваёй жорсткасці дзеяннямі супрацоўнікаў сілавых структур у дачыненні да мірных пратэстоўцаў прывяло да ўзрастання канфрантацыі ў грамадстве і паставіла пад сумнеў вынікі галасавання і легітымнасць дзейнай улады як у грамадзян Беларусі, так і ў міжнароднай супольнасці».

Сакратарыят ГА «Саюз беларускіх пісьменнікаў» патрабуе:

– спыніць гвалт у дачыненні да мірных пратэстоўцаў;

– неадкладна вызваліць усіх затрыманых падчас выбарчай кампаніі 2020 года;

– абраць новы склад Цэнтральнай выбарчай камісіі Рэспублікі Беларусь у сувязі з катэгарычным недаверам да цяперашняй ЦВК;

– правесці паўторныя празрыстыя дэмакратычныя выбары, забяспечыўшы фарміраванне выбарчых камісій з абавязковым удзелам прадстаўнікоў грамадзянскай супольнасці, незалежных міжнародных і беларускіх назіральнікаў.

Заява была прынятая 10 жніўня.