409-ты дзень поўнамаштабнай вайны Расіі супраць Украіны: эвакуацыя насельніцтва, баі за Бахмут і магчымая «хімічная» правакацыя
Новы дзень вайны — новыя ахвяры. Апошнія навіны з украінскага фронту.
Ілюстрацыйнае фота: unian.net
***
РФ рыхтуе эвакуацыю насельніцтва акупаваных частак Запарожскай і Херсонскай абласцей у анексаваны Крым, паведамляе Генштаб УСУ ў новай зводцы. Паводле яго звестак, у Мелітопалі і Скадоўску арганізаваныя апытанні мясцовых жыхароў адносна магчымай эвакуацыі. У ходзе апытанняў правяраецца наяўнасць пашпарта РФ, прапіска і ўзровень адукацыі.
Аўтобусы з жадаючымі эвакуявацца ўжо пачалі выязджаць з акупаваных тэрыторый поўдня краіны, адзначае ўкраінскі Генштаб. Пры гэтым акупацыйныя ўлады распаўсюджваюць інфармацыю пра прымусовую эвакуацыю цывільнага насельніцтва, якая пачнецца ў канцы красавіка.
***
Мінабароны РФ распаўсюдзіла інфармацыю пра тое, што ў Кіеве рыхтуюць «маштабную правакацыю», каб абвінаваціць войска РФ ва ўжыванні атрутных рэчываў. У паведамленні ад імя каардынацыйнага штаба па гуманітарным рэагаванні ва Украіне ў Telegram-канале Мінабароны сцвярджаецца, што падчас «спецыяльнай інфармацыйнай акцыі» ў Сумскую вобласць плануецца «даставіць з моргаў целы і парэшткі загінулых украінскіх вайскоўцаў, смерць якіх наступіла нібыта ў выніку паражэння "расійскімі" артылерыйскімі боепрыпасамі з "атрутнымі рэчывамі"».
Раней расійскія ўлады неаднаразова заяўлялі пра «правакацыі, якія рыхтуюцца з боку Украіны» — у прыватнасці, супраць Прыднястроўя з «пераапрананнем украінскіх дыверсантаў у форму расійскіх салдат» або пра «намер ужыць нейкую "брудную бомбу"», каб затым «абвінаваціць Маскву ў выкарыстанні зброі масавага знішчэння».
***
За мінулыя суткі расійскія войскі здзейснілі 12 абстрэлаў памежных раёнаў Сумскай вобласці, усяго зафіксавана 125 «прылётаў». Пра гэта паведамляецца на старонцы мясцовай абласной ваеннай адміністрацыі (ОВА) у Facebook. Інфармацыі пра ахвяр і пацярпелых няма.
Восем чалавек атрымалі раненні, у тым ліку цяжкія, у выніку расійскага абстрэлу Херсонскай вобласці. У горадзе Берыслаў пад абстрэл трапіла машына хуткай дапамогі, што ехала на выклік да жыхаркі горада, якая атрымала асколачныя раненні.
***
Брытанская газета «Times» апублікавала матэрыял, прысвечаны няўдалай спробе УСУ заняць тэрыторыю Запарожскай АЭС, дзе знаходзяцца вайскоўцы РФ. На той момант штурму яны ўтрымлівалі электрастанцыю ўжо больш за шэсць месяцаў, выкарыстоўваючы яе тэрыторыю для абстрэлаў украінскіх гарадоў на другім беразе Дняпра і буйнога сталеліцейнага завода ў Нікапалі, піша «Times».
У ноч на 19 кастрычніка каля 600 вайскоўцаў на 30 катэрах са зброяй, у тым ліку буйнакалібернымі кулямётамі, гранатамётамі MK-19 і супрацьтанкавымі сродкамі, паспрабавалі высадзіцца на левы бераг Дняпра.
«Расійскія вайскоўцы пабудавалі вельмі шчыльную абарону, усё замініравалі. Калі мы сталі набліжацца, яны нават падцягнулі танкі і артылерыю і пачалі абстрэльваць нас проста на вадзе», — расказаў газеце ўкраінскі вайсковец.
«Times» адзначае, што праз рызыку ўцечкі радыяцыі падобная спроба сілавога штурму выклікае пытанні нават ва ўкраінскіх чыноўнікаў, якія перакананыя ў неабходнасці вярнуць Запарожскую АЭС пад кантроль Кіева. Кіраўнік украінскага «Энергаатама» Пётр Косцін выказаў здагадку, што вярнуць ЗАЭС атрымаецца, калі ўкраінская армія зможа прасунуцца на поўдзень, у бок Крыма і Мелітопаля.
«Гэта адзіны варыянт — без непасрэднага абстрэлу станцыі, без прамога наступу на тэрыторыю станцыі, — кажа ён. — Вельмі небяспечна рабіць такія рэчы побач з ядзернымі матэрыяламі».
***
Расійскія войскі працягваюць наступ у Бахмуце і яго ваколіцах. Пра гэта паведамілі аналітыкі Інстытута вывучэння вайны (ISW) у свежай справаздачы. Яны адзначылі, што здымкі геалакацыі дазваляюць дапусціць, што расійцы прасунуліся далей у цэнтр горада. У прыватнасці, найміты ПВК «Вагнер» стаяць ля Бахмуцкай вайсковай пракуратуры, і, верагодна, яны захапілі гэты будынак.
Таксама ў справаздачы інстытута гаворыцца, што расійскія вайскоўцы прасунуліся на 3 км на поўдзень ад трасы Т0504 Канстанцінаўка — Часаў Яр — Бахмут на паўднёвы захад ад Бахмута.
Аналітыкі адзначылі, што расійскія ваенкоры сцвярджаюць, нібыта «бандэраўцы» захапілі некалькі будынкаў у цэнтры Бахмута, у тым ліку стадыён «Металург», гатэль «Бахмут» і царкву Усіх Святых, аднак на дадзены момант пацвярджэнняў гэтаму няма.
***
Паводле звестак ААН, на сённяшні дзень каля 16 мільёнаў украінцаў былі вымушаныя пакінуць свае дамы і ўцякаць ад вайны.