829-ты дзень поўнамаштабнай вайны Расіі супраць Украіны: атака на Харкаў і Львоў і F-16, якімі Украіна (не)можа біць па Расіі

З пачатку 2024 года расійцы захапілі больш за 750 квадратных кіламетраў украінскай зямлі.

***

Амерыканскі «Інстытут вывучэння вайны» (ISW) выявіў доказы, якія пацвярджаюць, што расійскія войскі захапілі блізу 752 квадратныя кіламетры ўкраінскай тэрыторыі ў 2024 годзе. 

Паводле папярэдніх ацэнак ISW, расійскія войскі захапілі каля 516 квадратных кіламетраў у перыяд з 1 студзеня 2024 года па 29 красавіка 2024 года.

Ваенныя аналітыкі адзначылі, што хоць расійцы дасягнулі значных тактычных поспехаў на поўначы Харкаўскай вобласці на пачатку траўня 2024 года, міністр абароны Расіі Андрэй Белавусаў моцна пераацаніў прасоўванне расійскіх войскаў ва Украіне з пачатку 2024 года. 

Белавусаў заявіў 31 траўня, што сёлета расійскія войскі ўжо захапілі 880 квадратных кіламетраў.

***

Краіны «Групы сямі» і Еўрапейскі Саюз вывучаюць шляхі ўзмацнення ціску на банкі, якія дапамагаюць Расіі пазбягаць дзеючых санкцый, што стане адной з тэм саміту G7 у сярэдзіне чэрвеня. Пра гэта ад інфармаваных крыніц даведаўся «Bloomberg».

Некаторыя краіны «Групы сямі» разглядаюць меры, накіраваныя супраць фінансавых устаноў з трэціх краін, што выкарыстоўваюць СПФП — сістэму перадачы фінансавых паведамленняў Цэнтрабанка Расіі, падобную да SWIFT, — для абыходу гандлёвых абмежаванняў.

Цяпер сістэму СПФП, адзначыла адна з крыніц «Bloomberg», выкарыстоўваюць больш за 150 замежных банкаў у 20 краінах — у тым ліку ў Беларусі, Арменіі, Казахстане, Кітаі і Таджыкістане. Выкарыстанне СПФП у 2023 годзе было ўтрая большым, чым у 2022-м.

Санкцыі супраць гэтай сістэмы прапанавала Еўрапейская камісія, гаворыцца ў матэрыяле «Bloomberg». Яна хоча ўзгадніць іх да саміту G7, але некалькі краін ЕС выступілі супраць поўнай забароны СПФП праз боязь, што такі крок можа нашкодзіць адносінам з трэцімі краінамі.

Альтэрнатыўныя прапановы, якія павінны ўдарыць па здольнасці Расіі абыходзіць санкцыі, прадугледжваюць санкцыі супраць канкрэтных банкаў, якія дапамагаюць Маскве, а таксама ўзмацненне жорсткасці патрабаванняў да кампаній па праверках іх даччыных кампаній і ланцужкоў паставак.

Абмеркаванні, піша «Bloomberg», працягнуцца да саміту G7 у Італіі, дзе лідары маюць намер узгадніць комплекс захадаў для лепшага забеспячэння выканання санкцый, накладзеных на Расію за яе вайну супраць Украіны.

***

У ноч на 1 чэрвеня 2024 года расійскія акупанты нанеслі ракетна-авіяцыйны ўдар па аб'ектах крытычнай інфраструктуры ў розных рэгіёнах. Украінскія абаронцы збілі 35 ракет і 46 беспілотнікаў, паведамляюць Паветраныя сілы Украіны.

Усяго РФ выпусціла 53 ракеты розных тыпаў і 47 ўдарных БПЛА:

• 35 крылатых ракет Х-101/Х-555 з самалётаў стратэгічнай авіяцыі Ту-95 МС (раён пускаў — Саратаўская вобласць, паветраная прастора над акваторыяй Каспійскага мора, РФ);
• 4 балістычныя ракеты «Іскандэр-М» (з Крыма);
• 1 крылатую ракету «Іскандэр-К» (з Крыма);
• 10 крылатых ракет «Калібр» (з паўночна-ўсходняй часткі акваторыі Чорнага мора);
• 3 кіраваныя авіяцыйныя ракеты Х-59/Х-69 (з паветранай прасторы Запарожскай вобласці);
• 47 ударных БПЛА тыпу «Shahed-131/136» (раён пускаў — Прыморска-Ахтарск, РФ).

У выніку супрацьпаветранага бою збіта: 30 крылатых ракет Х-101/Х-555; 4 крылатыя ракеты «Калібр»; 1 крылатая ракета «Іскандэр-К»; 46 ударных БПЛА тыпу «Shahed-131/136».

***

Сілы абароны працягваюць наносяць страты Расіі — толькі за мінулыя суткі яны абясшкодзілі больш за 1 130 акупантаў і 44 артылерыйскія сістэмы, піша Генштаб УСУ ў Facebook.

Агульныя баявыя страты праціўніка з 24.02.22 па 01.06.24 арыенціровачна склалі: 

• асабістага саставу — каля 508 780 (+1130) чалавек;
• танкаў — 7 740 (+12) адз.;
• баявых браніраваных машын — 14 947 (+12) адз.;
• артылерыйскіх сістэм — 13 184 (+44) адз.;
• РСЗА — 1 088 (+0) адз.;
• сродкі СПА — 815 (+0) адз.;
• самалётаў — 357 (+0) адз.;
• верталётаў — 326 (+0) адз.;
• БПЛА аператыўна-тактычнага ўзроўню — 10 617 (+30);
• крылатых ракет — 2230 (+1);
• караблёў / катэраў — 27 (+0) адз.;
• падводных лодак — 1 (+0) адз.;
• аўтамабільнай тэхнікі і аўтацыстэрнаў — 18 006 (+101) адз.;
• спецыяльнай тэхнікі — 2181 (+17).

Найбольшая колькасць баявых сутыкненняў у пятніцу адбылося на Пакроўскім кірунку. Вораг не пакідае спроб пры падтрымцы авіяцыі і артылерыі адшукаць слабыя месцы ў абароне ўкраінцаў і бесперапынна штурмуе. З 27 баявых сутыкненняў 15 паспяхова адбілі абаронцы Украіны. 12 баёў яшчэ працягваюцца.

«Сітуацыя на фронце застаецца напружанай, але кантраляванай. На дадзены момант адбылося 81 баявое сутыкненне. Сілы абароны працягваюць рашуча даваць адпор спробам праціўніка прасунуцца ў глыбіню тэрыторыі Украіны, наносяць яму эфектыўнае агнявое паражэнне, высільваючы па ўсёй лініі баявога судакранання.

Ракетныя войскі і артылерыя Сіл абароны на працягу сутак разбілі два месцы збору асабістага саставу праціўніка, адзін раён засяроджвання ваеннай тэхнікі, дзве артылерыйскія сістэмы, чатыры пункты кіравання і базу гаруча-змазачных матэрыялаў.

На працягу сутак расійскія захопнікі нанеслі па тэрыторыі Украіны адзін ракетны з ужываннем шасці ракет і 47 авіяцыйных удараў з ужываннем 48 КАБаў, задзейнічалі 531 дрон-камікадзэ. Таксама вораг здзейсніў больш за 2300 абстрэлаў па пазіцыях нашых войскаў і населеных пунктах з ужываннем артылерыі, мінамётаў, стралковай зброі і ўзбраення баявых машын», — гаворыцца ў зводцы.

***

Падчас масіраванай атакі расійцаў уначы 1 чэрвеня 6 крылатых ракет папалі ў тры аб'екты крытычнай інфраструктуры ў Львоўскай вобласці. Пра гэта паведаміў старшыня Львоўскай АВА Максім Казіцкі. 

Ён дадаў, што зенітныя ракетныя падраздзяленні, авіяцыя і мабільныя агнявыя групы «Захад» у сваёй зоне адказнасці знішчылі 18 ракет і 6 «Шахідаў».

Цяпер усе сістэмы жыццезабеспячэння на Львоўшчыне працуюць у штатным рэжыме.  

Паводле ўдакладненай інфармацыі, у выніку начной атакі ворага на адным з аб'ектаў крытычнай інфраструктуры, на жаль, пацярпелі чатыры чалавекі. Іх шпіталізавалі.

***

31 мая ў 22:10 расійская армія здзейсніла атаку дзвюма кіраванымі авіяцыйнымі бомбамі «УМП30 СН» на Мірнаград, папала па жылым мікрараёне і параніла пяць чалавек, заявіла пракуратура Данецкай вобласці.

Пяцёра грамадзян, якія знаходзіліся ў сваіх дамах, атрымалі мінна-выбуховыя траўмы, рэзаныя раны цела і аскепкавыя раненні.

Чатыром мужчынам ва ўзросце ад 22 да 43 гадоў і 40-гадовай жанчыне аказана медыцынская дапамога.

У горадзе пашкоджаныя шматкватэрныя дамы, аўтамабілі і навучальная ўстанова.

***

1 чэрвеня расійскія акупацыйныя войскі ўдарылі кіраванымі авіяцыйнымі бомбамі па горадзе Канстанцінаўка Данецкай вобласці, раненні атрымала жанчына.

«У 11:25 1 чэрвеня расійскія войскі абстралялі горад Канстанцінаўку, верагодна, двума кіраванымі авіяцыйнымі бомбамі" УМПБ Д-30 СН".

У выніку варожай атакі цялесныя пашкоджанні атрымала 48-гадовая жанчына, якая знаходзілася на вуліцы. Яе шпіталізавалі з асколачнымі раненнямі ў цяжкім стане».

У горадзе пашкоджаны прыватныя домаўладанні і шматкватэрны жылы дом, а таксама аўтамабіль.

Па дадзеным факце распачата дасудовае расследаванне па ч.1 арт.438 Крымінальнага кодэкса Украіны — «Парушэнне законаў і звычаяў вайны».

***

Каля 5-й гадзіны раніцы расійскія вайскоўцы ўдарылі па Балаклеі Ізюмскага раёна, паведаміў кіраўнік Харкаўскай вобласці Алег Сінягубаў. У выніку атакі пацярпелі 12 чалавек.

Паводле яго слоў, на момант ракетнага ўдару ў двух дамах знаходзіліся 12 чалавек: 4 дарослых (сярод іх цяжарная жанчына) і 8 дзяцей ад 2 да 17 гадоў.

Усе пацярпелыя ў стане сярэдняй цяжкасці былі шпіталізаваны ў бальніцу, у аднаго дзіцяці — вострая рэакцыя на стрэс, удакладніў Сінягубаў.

***

Знішчальнікі F-16, якія Нідэрланды перададуць Украіне, могуць быць выкарыстаныя для выканання баявых задач на тэрыторыі РФ. Без якіх-небудзь тэрытарыяльных абмежаванняў, піша «Салідарнасць» са спасылкай на палітычнага аглядальніка Аляксандра Фрыдмана.

***

Прэм'ер-міністр Бельгіі Александэр дэ Кроа ў пятніцу, 31 траўня, заявіў, што Брусэль не дазволіць Кіеву выкарыстоўваць сваю зброю, у прыватнасці, знішчальнікі F-16, для ўдараў па тэрыторыі РФ, піша «Deutsche Welle».

Дэ Кроа нагадаў, што Бельгія падпісала двухбаковае пагадненне аб бяспецы з Украінай, якое, у тым ліку, прадугледжвае пастаўку Кіеву 30 знішчальнікаў F-16. «Але пагадненне вельмі дакладнае. Гаворка ідзе пра знішчальнікі, якія могуць быць выкарыстаныя ўкраінцамі на ўкраінскай тэрыторыі. Гэта пагадненне, якое мы заключылі, і я хачу яго прытрымлівацца», — адзначыў бельгійскі прэм'ер-міністр.

Паводле слоў палітыка, трэба перш за ўсё гарантаваць, што ЗША і іншыя краіны NATO змогуць працягваць аказваць ваенную падтрымку Украіне. «Існуе велізарная патрэба ў СПА. Баявыя самалёты могуць дапамагчы ў гэтым, але спатрэбяцца і іншыя рэчы. Таму нам трэба падумаць над тым, як мы можам даць хутчэй і якасней абсталяванне», — заявіў дэ Кроа.