«Ніхто не стане трываць ворага культуры». Ці выключаць Расію з ЮНЕСКА?

Уладзімір Зяленскі заклікаў выключыць РФ з ЮНЕСКА. Таму што расійскае старшынства ў арганізацыі абясцэньвае сам інстытут.

Прэзідэнт Уладзімір Зяленскі заклікаў выключыць Расію з Арганізацыі Аб'яднаных Нацый па пытаннях адукацыі, навукі і культуры (ЮНЕСКА) з-за шматлікіх разбурэнняў і пашкоджанняў культурных і адукацыйных устаноў, якія яна зрабіла ва Украіне. Пра гэта гаворыцца ў звароце Зяленскага да ЮНЕСКА ў аўторак, 11 кастрычніка.

«Паважаныя абаронцы адукацыйных, навуковых і культурных дасягненняў чалавецтва! Скажыце, калі ласка, чаму прадстаўнікі Расіі да гэтага часу сярод вас? Што яны робяць у ЮНЕСКА? Як наогул могуць быць у ЮНЕСКА прадстаўнікі дзяржавы-тэрарыста, што ганарыцца тым, якія разбурэнні яна робіць у іншай краіне?» — сказаў украінскі прэзідэнт.

Зяленскі падкрэсліў, што дзяржава-тэрарыст дакладна не мае права старшынстваваць у адным з ключавых органаў па ахове культурнай і прыроднай спадчыны — Камітэце Сусветнай спадчыны ЮНЕСКА. Ён адзначыў, што расійскае старшынства абясцэньвае сам інстытут — яго вагу, яго рэпутацыю.

«Дзяржава-тэрарыст павінна быць выключана з усіх органаў ЮНЕСКА і самой арганізацыі. Хай гэта будзе гістарычным прыкладам для ўсіх у свеце, што ніхто не стане трываць ворага культуры, ворага гісторыі, ворага адукацыі, ворага навукі», — сказаў ён.

Зяленскі адзначыў, што Расія сваімі тэрарыстычнымі ўдарамі разбурыла або пашкодзіла ўжо больш за 2 600 адукацыйных аб'ектаў ва Украіне.

— Дзеці або дарослыя. Адукацыйны аб'ект або культурны. Аб'ект крытычнай інфраструктуры або, напрыклад, мемарыял ахвярам Халакосту. Для Расіі ўсё гэта аднолькавыя мішэні, —сказаў Зяленскі. — Ужо больш за 2 тысячы 600 адукацыйных аб'ектаў разбураныя або пашкоджаныя тэрарыстычнымі ўдарамі Расіі. 540 — гэта агульная колькасць пашкоджаных расійскімі ўдарамі аб'ектаў культурнай спадчыны, культурных інстытутаў і рэлігійных збудаванняў ва Украіне за час поўнамаштабнай вайны, з 24 лютага. Амаль 200 разбураных або пашкоджаных храмаў! Дзякуй ЮНЕСКА за падтрымку Украіны ў гэты час і за ўсе прынцыповыя заявы, якія былі зроблены ў абарону Украіны і яе культуры ад расійскай агрэсіі. Але ўсё ж патрэбныя новыя крокі — крокі, якія Расія адчуе.

Варта згадаць, што раней правядзенне 45-й сесіі ЮНЕСКА было запланавана ў расійскай Казані. Аднак бакі Канвенцыі аб сусветнай спадчыне 1972 года падпісалі адкрыты ліст, што адмаўляюцца ад удзелу ў пасяджэнні з-за сістэматычнага парушэння Расіяй міжнароднага гуманітарнага права ва Украіне.

Паводле korrespondent.net, t.me/V_Zelenskiy_official