Штаб Бабарыкі: Закрыты суд адхіліў скаргі Святланы Купрэевай і яе адваката на затрыманне

Увечары 16 чэрвеня, на некалькі дзён пазней за належны па законе тэрмін, суд Маскоўскага раёна Мінска разгледзеў скаргі Святланы Купрэевай і яе адваката на затрыманне. Пасяджэнне суда праходзіла ў закрытым рэжыме, аднак вядома, што абедзве скаргі былі адхіленыя, паведаміў TUT.BY штаб Віктара Бабарыкі.

Абарона настойвае на адсутнасці падстаў для затрымання, таму пастанова суда Маскоўскага раёна будзе таксама абскарджана ў вышэйстаячы суд. Звестак аб прад'яўленні Купрэевай абвінавачвання не маецца. З гэтага вынікае, што Купрэева ​​застаецца пад вартай у якасці падазраванай.
— Пастанова аб ужыванні меры стрымання ў выглядзе заключэння пад варту атрымана абаронай толькі ўвечары 15 чэрвеня. Ужо 16 чэрвеня адвакатам пададзеная скарга ў суд на меру стрымання. Гэтая скарга яшчэ не разгледжаная. Дачыненне Купрэевай да якіх-небудзь супрацьзаконных дзеянняў выклікае вялікія сумневы, паколькі яна не працавала ні ў Белгазпрамбанку, ні ў адной з фірмаў, дзе праходзілі ператрусы. Яна толькі з'яўляецца сяброўкай Віктара Бабарыкі. Грамадскасць звязвае пераслед Купрэевай з тым, што яна была ў ініцыятыўнай групе Бабарыкі, — заяўляюць у штабе прэтэндэнта ў прэзідэнты.
Для наведвання Купрэевай ў СІЗА КДБ адваката не дапусцілі ні 16 чэрвеня, ні да гэтага са спасылкай на каронавірус. Пры гэтым у іншых следчых ізалятарах спатканні адвакатаў з падабароннымі праводзяцца. Па факце немагчымасці наведвання Купрэевай у СІЗА КДБ для аказання ёй юрыдычнай дапамогі пададзеная скарга ў Генеральную пракуратуру.
— Штаб Віктара Бабарыкі патрабуе спыніць беспадстаўныя пераследы сваіх прыхільнікаў, — заяўляе каманда Бабарыкі.
Нагадаем, 11 чэрвеня раніцай працаўнікі ДФР забралі з дому і павезлі ў СІЗА КДБ сяброўку сям'і Віктара Бабарыкі і сябра ягонай ініцыятыўнай групы, каардынатара па адным з раёнаў Мінска Святлану Купрэеву. Яе сябры распавялі TUT.BY, што яна была звычайным бухгалтарам, ніколі ніякага дачынення да Белгазпрамбанку і іншых кампаніяў, дзе нядаўна прайшлі ператрусы, яна не мае. А Віктар Бабарыка ўдакладніў, што іх са Святланай звязваюць выключна сяброўскія, а не дзелавыя адносіны.
Алена Танкачова, tut.by