Улада адмовілася публікаваць пастанову Рады бяспекі пра стабілізацыю абстаноўкі ў краіне
Беларускія ўлады перадумалі публікаваць у адкрытым доступе пастанову Савета Бяспекі Беларусі №1 ад 24 жніўня 2020 года па невядомай прычыне.
Яшчэ ўчора рэдакцыя Office Life апублікавала фота дакумента, якое шырока разляцелася па сетцы, месанджарах і сацсетках. Па папярэдняй інфармацыі, яна павінна была быць апублікаваная 26 жніўня. Аднак на партале pravo.by звестак пра меркаваную дату публікацыі ўжо няма.
Адмова ад публікацыі можа азначаць, што на згаданым фота прадстаўлены вытрымкі або тэзісы дакумента, поўны тэкст якога ўлада ў апошні момант адмовілася паказаць краіне.
Нагадаем, якія даручэнні Савета Бяспекі ўтрымліваюцца на апублікаваным скане дакумента:
«Саўмін павінен забяспечыць бесперабойнае функцыянаванне эканомікі і рэалізацыю даручэнняў прэзідэнта. Растлумачыць на месцах негатыўныя наступствы забастовак і падтрымаць кіраўнікоў ключавых прадпрыемстваў.
Мінабароны павінна пільна адсочваць перамяшчэнне войскаў NATO ў Польшчы і Літве.
МУС даручана не дапускаць беспарадкаў у краіне і асабліва ў Мінску, «забяспечыць выкананне патрабавання людзей аднавіць мір і цішыню» і «абараніць працоўныя калектывы ад шальмавання».
МЗС варта папярэдзіць кіраўнікоў заходніх дзяржаў аб адказнасці за распальванне беспарадкаў і данесці да іх інфармацыю аб сітуацыі ў Беларусі.
КДБ даручана выяўляць і спыняць дзеянні арганізатараў акцый пратэсту і выкрываць каналы іх фінансавання.
Пагранкамітэт павінен узмацніць ахову мяжы і не дапусціць пранікнення ў Беларусь баевікоў, зброі і г. д.
Кіраўнікам сілавікоў даручана рэгулярна распавядаць падначаленым аб «недапушчальнасці ціску на органы ўлады, настаўнікаў і іншых грамадзян».
СМІ даручана тлумачыць людзям, што «неканстытуцыйныя дзеянні — шлях у прорву да знішчэння Беларусі як суверэннай і незалежнай дзяржавы».
На першы погляд, пералічаныя даручэнні Савета Бяспекі не выклікаюць шоку і паўтараюць выказванні Лукашэнкі, але спосабы і метады рэалізацыі гэтых даручэнняў наўрад ці выклічуць станоўчыя эмоцыі.
Паводле АФН