231-шы дзень вайны. Галоўнае ва Украіне — Беларусь

Расія працягвае абстрэлы ўкраінскіх гарадоў і вёсак. Але аналітыкі — як украінскія, так і іншыя, — у сваіх ранішніх справаздачах шмат увагі надалі Беларусі. Між тым, і контрнаступ украінскіх войскаў яшчэ не скончыўся.

Паводле зводкі ўкраінскага Генштабу, за мінулыя суткі акупанты ажыццявілі запускі адной балістычнай і 28 крылатых ракет, 20 з якіх былі збітыя ўкраінскімі падраздзяленнямі супрацьпаветранай абароны. Праціўнік нанёс трынаццаць авіяцыйных удараў і здзейсніў больш за 40 абстрэлаў з рэактыўных сістэм залпавага агню. «Ад гэтых злачынных дзеянняў пацярпелі аб'екты і грамадзянскае насельніцтва больш за сорак населеных пунктаў. Сярод іх Львоў, Папоўка, Чугуновка, Ладыжын, Крывы Рог, Запарожжа, Паўлаград і Нікапаль», — адзначае Генштаб Украіны.

 Таксама вораг ужыў 14 іранскіх дронаў-камікадзэ для ўдараў па крытычнай інфраструктуры ў Адэскай і Мікалаеўскай абласцях. 12 з гэтых БПЛА былі знішчаныя, канстатуюць вайскоўцы.

У той жа час у Генштабе адзначылі, што Лукашэнка заявіў пра гатоўнасць Рэспублікі Беларусь аказаць дапамогу Расійскай Федэрацыі ў вайне супраць Украіны. Аднак Генштаб УСУ не назірае прыкмет фарміравання наступальных груповак у Беларусі.

«Абаронна-прамысловы комплекс Беларусі ўжо задзейнічаны ў рамонце расійскай тэхнікі, пашкоджанай падчас баявых дзеянняў. Акрамя таго, знятая з захоўвання і адпраўленая ў Белгарадскую вобласць першая партыя з 20 танкаў Т-72», — паведамілі ў Генштабе.

Амерыканскі Інстытут вывучэння вайны (ISW) у справаздачы за 11 кастрычніка паказвае, што перамяшчэнне беларускай тэхнікі ў РФ сведчыць: расійскія і беларускія сілы не ствараюць зоны збору ў Беларусі. Расія вывозіць боепрыпасы і іншыя сродкі са складоў у Беларусі, што несумяшчальна са стварэннем буйнамаштабнага расійскага або беларускага наземнага нападу на Украіну з поўначы.

Галоўнае ўпраўленне выведкі Мінабароны Украіны паведамляе аб прыбыцці на станцыю Кіраўска ў Крыме эшалона з 492 тонамі боепрыпасаў з арсенала ў Гомелі. Акрамя таго, беларускія ўлады плануюць адправіць яшчэ 13 эшалонаў са зброяй, тэхнікай і боепрыпасамі ў Растоўскую вобласць.

«Перамяшчэнне тэхнікі ў Крым і Растоўскую вобласць паказвае на тое, што сілы РФ менш упэўненыя ў бяспецы наземных ліній сувязі, якія праходзяць праз паўночную і заходнюю частку Луганскай вобласці, улічваючы ўкраінскі контрнаступленне, што працягваецца там», — мяркуюць аналітыкі.

У ISW таксама адзначылі, што масавыя абстрэлы Расіяй гарадоў Украіны і цывільнай інфраструктуры, на іх думку, не звязаныя з прызначэннем генерала Сяргея Суравікіна камандуючым войскамі ва Украіне, і не азначаюць «сірыйскага сцэнару».

Галоўнай мэтай масіраваных ракетных удараў РФ па тэрыторыі Украіны, верагодна, з'яўляецца аднаўленне публічнага іміджу Міністэрства абароны краіны. «Папярэдні вопыт генерала арміі Сяргея Суравікіна як камандуючага Узброеных Сіл Расіі ў Сірыі, хутчэй за ўсё, не тлумачыць хвалю масіраваных ракетных удараў па Украіне за апошнія некалькі дзён і не сведчыць аб змене траекторыі расійскіх магчымасцяў або стратэгіі ва Украіне», — гаворыцца ў справаздачы.

Аналітыкі лічаць, што прызначэнне Суравікіна не прывядзе да далейшай «сірыізацыі» расійскіх аперацый у Украіне. «Прастора баявых дзеянняў ва Украіне прынцыпова адрозніваецца ад прасторы баявых дзеянняў у Сірыі, а прамыя параўнання з сірыйскім “сцэнаром” Суравікіна хаваюць той факт, што Расія сутыкаецца з іншымі выклікамі ва Украіне. Расія не можа яшчэ больш “сірыізаваць” вайну ў асноўным з-за таго, што ёй не ўдалося заваяваць перавагу ў паветры, што пазбаўляе яе магчымасці праводзіць масіраваныя дывановыя бамбардзіроўкі Украіны, якія яна магла праводзіць і праводзіла ў Сірыі», — адзначаецца ў справаздачы.

«Расійскія вайсковыя чыноўнікі маглі каардынаваць прызначэнне Суровікіна і ўдары крылатымі ракетамі 10 кастрычніка па крытычна важнай інфраструктуры Украіны, каб рэабілітаваць стаўленне да Міністэрства абароны Расіі. Хто б не быў прызначаны камандуючым, ён бы кіраваў задачай удараў крылатымі ракетамі 10 кастрычніка, якія, паводле звестак украінскай выведкі былі запланаваныя яшчэ 2 кастрычніка (іх Суравікін дакладна не планаваў, не рыхтаваў і не праводзіў у дзень свайго прызначэння)», — пазначана ў справаздачы.

Тым часам, украінскія войскі на Херсоншчыне замацавалі поспех па вызваленні пяці населеных пунктаў. Пра гэта гаворыцца ў зводцы аператыўнага камандавання поўдзень у ноч на сераду, 12 кастрычніка.

«Падраздзяленні акупацыйных войскаў засяроджваюць асноўныя намаганні на ўтрыманні захопленых тэрыторый і стрымліванні наступальных дзеянняў. Нягледзячы на гэта, нашымі падраздзяленнямі замацаваны поспех па вызваленні Новавасільёўкі, Навагрыгор’еўкі, Новай Каменкі, Трыфанаўкі і Чырвонага ў Берыслаўскім раёне», — паведамілі абаронцы.

Ва Украіну даставілі новую партыю рэактыўных сістэм залпавага агню HIMARS, паведаміў кіраўнік Мінабароны Аляксей Рэзнікаў. «4 дадатковыя HIMARS ад нашых амерыканскіх партнёраў прыбылі! Я дзякую прэзідэнта ЗША Джо Байдэна і кіраўніка Пентагона Лойда Осціна III і ўвесь амерыканскі народ. Час HIMARS: добры час для ўкраінцаў і дрэнны час для акупантаў», — напісаў ён.

Таксама паведамляецца пра тое, што Украіна атрымала першую сістэму СПА IRIS-T SLM. Гэта найноўшая распрацоўка Германіі.

Паводле Карэспандэнт; РБК-Украіна; ВВС