620-ты дзень вайны РФ супраць Украіны: За суткі УСУ забілі тысячу рускіх салдат

 Асноўныя падзеі вайны Расіі з Украінай на гэты момант. 

Удар па Керчы: СМІ паказалі спадарожнікавыя здымкі пацярпелага завода і карабля

На здымках Planet Labs можна пабачыць месца пашкоджанняў на заводзе ў Керчы ў акупаваным Крыме, а таксама ваенны карабель, які, здаецца, таксама пашкоджаны.

«Паводле маіх звестак, 4 лістапада, на момант выбухаў, у Керчы быў толькі адзін карабель, здольны несці ракеты класа «Калібр», а менавіта «Аскольд». Я думаю, што гэты карабель, як мы бачым, ужо знаходзіўся ў раёне докаў і праходзіў выпрабаванні ў спраўным стане, таму што павінен быць здадзены ўжо ў снежні», — распавёў «Схемам» капітан 1-га рангу ВМФ у запасе Андрэй Рыжэнка.

У прыватнасці, Рыжэнка дадаў, што верхняя частка «Аскольда» мае прыкметныя пашкоджанні, але пакуль застаецца на плаву. «Аскольд» — малы ракетны карабель тыпу 22800 «Каракурт». Ён здольны несці да 8 ракет «Калібр». Пашкоджанне такога карабля, патлумачыў Рыжэнка, важна для бяспекі Украіны. 

Нагадаем, учора, 4 лістапада, Узброеныя сілы Украіны нанеслі ўдары па марской і партовай інфраструктуры суднабудаўнічага завода «Заліў», які знаходзіцца ў Керчы. Праз некаторы час інфармацыю аб пашкоджаннях пацвердзілі ў StratCom. Як піша «Крымскі вецер», украінскія вайскоўцы падбілі малы ракетны карабель «Аскольд».

Камандуючы ВПС Узброеных сіл Украіны генерал-лейтэнант Мікалай Аляшчук таксама пацвердзіў знішчэнне расійскага ракетнага карабля «Аскольд» і падзякаваў лётчыкам за паспяховыя ўдары.

Спікер паветраных сіл Украіны Юрый Ігнат адзначыў, што карабель «Аскольд» нават не паспеў паўдзельнічаць у баявых дзеяннях — ён праходзіў «канчатковыя выпрабавальныя працы, каб потым выйсці і ваяваць супраць нашай дзяржавы».

Мінабароны РФ учора, 4 лістапада, таксама заявіла, што УСУ нанеслі ўдар 15 крылатымі ракетамі па суднабудаўнічым заводзе імя Бутомы ў Керчы, з іх 13 нібыта былі збітыя сродкамі СПА. У выніку трапляння крылатай ракеты «атрымаў пашкоджанні карабель, які знаходзіўся на заводзе». 

Сілы абароны поўдня Украіны: за суткі на Херсонскую вобласць скінулі больш за 50 авіябомбаў

Абстаноўка ў зоне адказнасці Сіл абароны поўдня Украіны застаецца напружанай. За мінулыя суткі расійскія вайскоўцы нанеслі дзевяць авіяцыйных удараў з ужываннем больш за 50 кіраваных авіябомбаў па населеных пунктах Херсонскай вобласці.

У выніку ўдараў разбурана чарговая навучальная ўстанова ў адной з прыбярэжных абшчын.

Кіраўнік Херсонскай абладміністрацыі Аляксандр Пракудзін паказаў відэа «руін, якія нядаўна былі школай у Дар'еўскай абшчыне». Ён напісаў, што ўначы на будынак школы скінулі кіраваную авіябомбу.

Пракудзін таксама ўдакладніў, што за мінулыя суткі з-за расійскіх абстрэлаў два чалавекі загінулі, шэсць чалавек атрымалі раненні. 

У Закарпацкай вобласці аб'явілі жалобу па загінулых байцах 128-й брыгады

У Закарпацкай вобласці абвешчана трохдзённая жалоба па загінулых вайскоўцах 128-й асобнай горна-штурмавой брыгады.

«6 лістапада на тэрыторыі Закарпацця аб'яўлена трохдзённая абласная жалоба, будуць прыспушчаныя дзяржаўныя сцягі, кожную раніцу ў 9.00 мы будзем ушаноўваць памяць воінаў хвілінай маўчання. Набажэнствы пройдуць у храмах розных канфесій вобласці», — сказаў кіраўнік Закарпацкай АВА Віктар Мікіта ў Telegram.

Падчас узнагароджання загінулі больш за 20 украінскіх вайскоўцаў

У сацсетках з'явілася відэа ўдару па байцах 128-й асобнай горна-штурмавой брыгады ў Запарожскай вобласці.

Пра гэта паведаміў вайсковы журналіст Андрэй Цапліенка ў Telegram у нядзелю, 5 лістапада: «Рашысты апублікавалі відэа з месца ўзнагароджання афіцэраў 128-й асобнай горна-штурмавой брыгады Закарпацкай вобласці», — напісаў ён.

На роліку бачная вёска, у якой знаходзіліся ўкраінскія вайскоўцы, а таксама наступствы магутнага выбуху.

 Навіны вайны

• За суткі УСУ забілі тысячу рускіх салдат — украінскі Генштаб

• Генштаб УСУ заявіў, што расійскія войскі таксама страцілі шмат каштоўнай тэхнікі, сярод якой шэсць сістэм РСЗА і два сродкі СПА.

• За мінулыя суткі ўкраінскія абаронцы знішчылі не менш за 990 расійскіх салдат. Пра гэта паведаміў Генштаб УСУ ў ранішняй зводцы ў нядзелю, 5 лістапада.

•  Украінскі Гештаб у ранішняй зводцы адзначыў, што за мінулыя суткі на фронце адбылося 82 баявыя сутыкненні. На Купянскім кірунку сілы абароны Украіны адбілі атакі РФ каля Сінькоўкі і Іванаўкі Харкаўскай вобласці; на Ліманскім — у раёнах Белагараўкі Луганскай вобласці і спрэчнага Данецкай вобласці; на Бахмуцкім — паблізу Хромава, Кляшчэеўкі, Андрэеўкі і Багданаўкі Данецкай вобласці; на Аўдзееўскім — у раёнах Стэпавага, Паўночнага, Аўдзееўкі і Першамайскага Данецкай вобласці; на Мар'інскім — у раёне Мар'інкі і Наваміхайлаўкі Данецкай вобласці; на Шахцёрскім — у раёне Старамайорскага Данецкай вобласці. На Запарожскім кірунку РФ наступальных дзеянняў не вяла.
•  Камандуючы аператыўна-стратэгічнай групоўкай войскаў УСУ Таўрыя Аляксандр Тарнаўскі паведаміў аб знішчэнні расійскага «Купала супраць дронаў» — станцыі радыёэлектроннай барацьбы «Поле-21», прызначанай для падаўлення каналаў спадарожнікавай навігацыі.
• Украіна плануе зімой маштабныя ўдары дронаў па Крыме і тэрыторыі Расіі, заявіў у інтэрв'ю The Independent брыгадны генерал УСУ Сяргей Баранаў, які курыруе падраздзяленні ў працы з БПЛА. Паводле яго слоў, Украіна рыхтуецца пачаць буйны зімовы наступ беспілотнікаў супраць РФ, паколькі ўмовы надвор'я перашкаджаюць наземным нападам. «Крым і памежныя раёны ўнутры Расіі сутыкнуцца з новымі паветранымі бамбаваннямі», — пішуць аўтары артыкула са спасылкай на Баранава.

•  УСУ атрымалі на ўзбраенне штурмавую машыну M1150 ABV (Assault Breacher Vehicle), вырабленую ў ЗША на базе танка Abrams, паведамляе Defense Express са спасылкай на відэа, апублікаванае Зяленскім да Дня ракетных войскаў і артылерыі і дня інжынерных войскаў, а таксама фота офіса прэзідэнтаУкраіны. Выданне адзначае, што паведамленняў аб перадачы гэтай машыны Украіне не было, але, верагодна, яна паступіла разам з танкамі Abrams у кастрычніку. УСУ сталі першым замежным аператарам машыны Assault Breacher Vehicle, якая прарывае мінныя палі даўжынёй каля 100-150 метраў за раз.

 Паводле УНІАН, Украінскай службы РБК, korrespondent.net