842-гі дзень ваны. Пуцін назваў умовы пачатку перамоваў з Кіевам

Пуцін сцвярджае, што Расія спыніць агонь і будзе гатова распачаць перамовы, як толькі Украіна поўнасцю выведзе войскі з Данецкай, Луганскай, Запарожскай і Херсонскай абласцей і заявіць аб адмове ўступіць у NATO.

Пуцін назваў умовы пачатку перамоваў з Кіевам

Уладзімір Пуцін сцвярджае, што Расія спыніць агонь і будзе гатова распачаць перагаворы, як толькі Украіна поўнасцю выведзе войскі з Данецкай, Луганскай, Запарожскай і Херсонскай абласцей і заявіць аб адмове ўступіць у NATO.

«Звяртаю ўвагу, менавіта з усёй тэрыторыі гэтых рэгіёнаў у межах іх адміністрацыйных межаў, якія існавалі на момант іх уваходжання ва Украіну. Як толькі ў Кіеве заявяць, што гатовыя да такога рашэння і пачнуць рэальны вывад войскаў з гэтых рэгіёнаў, а таксама афіцыйна паведамяць аб адмове ад планаў па ўступленні ў NATO, з нашага боку неадкладна, літаральна ў тую ж хвіліну, паступіць загад спыніць агонь і пачаць перамовы. Паўтару, мы гэта зробім неадкладна», — заявіў Пуцін на сустрэчы з кіраўніцтвам МЗС РФ.

За мінулыя суткі расійскія войскі абстралялі тэрыторыю дзесяці ўкраінскіх рэгіёнаў:

Днепрапятроўскай, Харкаўскай, Данецкай, Сумскай, Хмяльніцкай, Луганскай, Запарожскай, Мікалаеўскай, Херсонскай, Чарнігаўскай абласцей.

Па дадзеных медыяцэнтра УСУ, у агульнай складанасці былі атакаваныя 73 населеныя пункты і 195 аб'ектаў інфраструктуры.

Расійскія войскі прымянялі мінамёты, танкі, ствольную артылерыю, рэактыўныя сістэмы залпавага агню, зенітна-ракетныя комплексы, аператыўна-тактычныя ракетныя комплексы, беспілотнікі і тактычную авіяцыю.

Пяць чалавек параненыя ў выніку расійскага абстрэлу горада Селідава

Расійцы абстралялі Селідава ў ноч на 14 чэрвеня, заявіў кіраўнік ваеннай адміністрацыі Данецкай вобласці Вадзім Філашкін.

Пашкоджаны дзесяць шматпавярховых жылых дамоў, тры адміністрацыйныя будынкі і некалькі крамаў.

Прэзідэнты Украіны і ЗША Уладзімір Зяленскі і Джо Байдэн падчас саміту G7 падпісалі двухбаковае пагадненне аб гарантыях бяспекі

Як гаворыцца ў тэксце пагаднення, бакі разглядаюць яго ў якасці «моста» да будучага магчымага сяброўства Украіны ў NATO. Дакумент будзе дзейнічаць цягам дзесяці гадоў.

Пагадненне прадугледжвае, што ЗША будуць працягваць навучаць украінскіх вайскоўцаў, умацоўваць супрацоўніцтва ў ваеннай прамысловасці, а таксама пашыраць абмен разведвальнымі дадзенымі. Таксама дакумент гарантуе, што ў выпадку нападу на Украіну ці пагрозы такой атакі прадстаўнікі Кіева і Вашынгтона на працягу 24 гадзін збяруцца на экстраную сустрэчу для абмеркавання магчымай дапамогі з боку ЗША.

Пры гэтым пагадненне не ўключае абавязацельстваў з боку ЗША па выкарыстанні амерыканскіх вайскоўцаў для абароны Украіны, а таксама не змяшчае якіх-небудзь фінансавых абавязацельстваў Вашынгтона перад Кіевам.

Раней 13 чэрвеня Зяленскі і прэм'ер-міністр Японіі Фуміё Кісіда падпісалі аналагічнае дзесяцігадовае пагадненне аб бяспецы паміж Кіевам і Токіа.

У ноч на 14 чэрвеня расійскія вайскоўцы нанеслі новы ракетна-авіяцыйны ўдар па Украіне

Пра гэта паведаміў камандуючы Паветранымі сіламі УСУ Мікалай Алешчук.

Агулам войска РФ запусціла:

дзесяць крылатых ракет Х-101/Х-555 з самалётаў стратэгічнай авіяцыі Ту-95 МС з Саратаўскай вобласці;

тры балістычныя ракеты «Іскандэр-М» з анэксаванага Крыма і Краснадарскага краю;

адну аэрабалістычную ракету Х-47М2 «Кінжал» з паветранай прасторы Тамбоўскай вобласці;

17 ударных дронаў тыпу "Шахед-131/136" з Ейска Краснадарскага краю.

Сілы ўкраінскай СПА збілі сем крылатых ракет Х-101/Х-555 і 17 Дронов у межах Хмяльніцкай, Харкаўскай, Мікалаеўскай, Адэскай, Запарожскай, Днепрапятроўскай і Кіраваградскай абласцей.

Мінабароны РФ сцвярджае, што за ноч збіла 87 украінскіх беспілотнікаў над расійскімі рэгіёнамі і анэксаваным Крымам

Паводле расійцаў, 70 дронаў былі перахопленыя над Растоўскай вобласцю, па шэсць —  над Варонежскай і Курскай абласцямі, яшчэ па два — над Белгарадскай і Валгаградскай абласцямі, а таксама адзін над Крымам.

Украіна вярнула целы 254 загінулых вайскоўцаў

«Удалося рэпатрыяваць целы 221 абаронцы, якія ваявалі на данецкім напрамку, 25 загінулых воінаў на запарожскім напрамку, 4 загінулых абаронцаў на луганскім напрамку і 4 загінулых воінаў, целы якіх перададзены з моргаў на тэрыторыі РФ», — паведамляе Каардынацыйны штаб па абыходжанні з ваеннапалоннымі.

Расійскі бок аб абмене загінулымі не паведамляў.

Крыніцы: Military Media Center, Meduza, Командувач Повітряних Сил Микола Олещук