852-гі дзень вайны. Ракетны ўдар па Адэсе. Рэжым НС у Севастопалі

Распавядаем галоўнае, што адбылося падчас чарговага дня поўнамаштабнай вайны Расіі супраць Украіны. 

Зводка Генштаба УСУ. Галоўнае па стане на 10 раніцы:

За мінулыя суткі зафіксавана 129 баявых сутыкненняў, за сёння — 62;

Расійскія войскі нанеслі па пазіцыях УСУ і населеных пунктах два ракетныя ўдары, 58 авіяцыйных удараў, а таксама здзейснілі больш за 3500 абстрэлаў, у тым ліку 91 — з рэактыўных сістэм залпавага агню;

Украінскія сілы ўразілі 12 раёнаў засяроджвання асабовага складу арміі РФ, тры сродкі СПА, адну станцыю радыёэлектроннай барацьбы;

Працягваюцца спробы УС РФ атакаваць Ваўчанск на Харкаўскім кірунку. З пачатку сутак у раёне горада працягваюцца два боесутыкненні;

На Ліманскім кірунку ідуць баі ў раёнах населеных пунктаў Капанкі, Грэкаўка, Макееўка, Торскае і ў Серабранскім лесе. Шэсць нападаў адбітыя, два боесутыкненні працягваюцца;

На Тарэцкім кірунку адбітыя дзве атакі ў раёне Паўднёвага, адзін бой яшчэ працягваецца;

На Пакроўскім кірунку за сёння ўжо адбылося 18 атак пазіцый УСУ, дзевяць з якіх адбітыя. Працягваюцца баі за Новааляксандраўку, паблізу Яўгенаўкі, Узвіжанкі, Сокала і Навасёлаўкі Першай.

У Адэсе ёсць пацярпелыя пасля ўдару па грамадзянскай інфраструктуры

Расійскія войскі атакавалі Адэсу, зафіксавана трапленне па грамадзянскай інфраструктуры. Пра гэта паведаміў кіраўнік абласной ваеннай адміністрацыі Алег Кіпер.

У выніку абстрэлу Адэсы пацярпелі тры чалавекі: 19-гадовы малады чалавек, а таксама двое мужчын 50 і 58 гадоў. 

Паветраныя сілы УСУ сцвярджаюць, што расійскія войскі атакавалі Адэсу двума крылатымі ракетамі. Сілы СПА збілі адну з іх.

На месцы «прылёту» таксама пачаўся пажар.

У Севастопалі ўведзены рэжым НС — на наступны дзень пасля ракетнага ўдару УСУ

Адпаведны ўказ апублікаваў прызначаны Расіяй кіраўнік горада Міхаіл Разважаеў.

24 чэрвеня, пасля ракетнага ўдару УСУ па Севастопалі, амбасадара ЗША ў РФ Лін Трэйсі выклікалі ў міністэрства замежных спраў Расіі. 

«Падкрэслена, што ЗША, якія вядуць супраць Расіі гібрыдную вайну і фактычна сталі бокам канфлікту, пастаўляючы УСУ самыя сучасныя ўзбраенні, у тым ліку ракеты ATACMS з касетнымі баявымі часткамі, якія выкарыстоўваліся супраць жыхароў Севастопаля, чыё мэтаўказанне і ўвод палётных заданняў ажыццяўляюцца амерыканскімі служюамі, нясуць роўную з кіеўскім рэжымам адказнасць за гэта злачынства», — гаворыцца ў паведамленні МЗС Расіі.

У МЗС паведамілі Трэйсі, што «зваротныя меры абавязкова рушаць услед».

Савет ЕС зацвердзіў 14-ы пакет санкцый супраць Расіі

Пад абмежаванні трапляюць 116 чалавек і кампаній, адказных за дзеянні, якія «падрываюць або пагражаюць тэрытарыяльнай цэласнасці, суверэнітэту і незалежнасці Украіны».

Санкцыі таксама закранулі расійскі ЗПГ — уводзяцца абмежаванні на яго транзіт праз еўрапейскія парты. ЕС працягне закупляць ЗПГ з Расіі, але забароніць яго рээкспарт.

Украіна атрымае першы транш з даходаў ад замарожаных актываў РФ на наступным тыдні

Такую заяву зрабіў кіраўнік еўрапейскай дыпламатыі Жазэп Барэль, перадае «Еўрапейская праўда». Аб гэтым ён сказаў перад пачаткам сустрэчы кіраўнікоў МЗС краін ЕС у Люксембургу.

«Першы транш паступіць на наступным тыдні, у ліпені. Другі — праз некалькі тыдняў», — сказаў Барэль.

Кіраўнік Еўракамісіі Уршуля фон дэр Ляен раней паведамляла, што першы транш складзе 1,9 мільярда еўра.