889-ты дзень вайны. Кіеўшчына пад самай масіраванай атакай дронаў за ўвесь час вайны

Ноччу ўкраінскія сілы СПА збілі ўсе паветраныя цэлі: 89 «Шахедаў» і ракету Х-59. У расійскім СІЗА памёр ваеннапалонны з брыгады «Азоў». У Харкаўскай вобласці пасля атакі РФ ратавальніку прыйшлося ехаць да сябе дадому па выкліку. Распавядаем галоўнае, што стала вядома падчас чарговага дня поўнамаштабнай вайны Расіі супраць Украіны. 

У ноч на 31 ліпеня Расія нанесла ўдар па Украіне ракетай Х-59 і 89 ударнымі беспілотнікамі «Шахед» 131/136

Сілы супрацьпаветранай абароны знішчылі ўсе паветраныя цэлі.

Пра гэта паведаміў камандуючы ВПС Узброеных сіл Украіны Мікалай Алешчук.

Паводле яго слоў, гэта адна з самых масіраваных атак дронамі за ўвесь час поўнамаштабнай вайны. Столькі ж дронаў расійцы выпусцілі ў ноч на 1 студзеня 2024 года.

Расійцы выпусцілі авіацыйную ракету з тэрыторыі часова акупаванай Херсоншчыны, а ўдарныя беспілотнкі — з Ейска, Сешчы, Курска і Прыморска-Ахтарска (РФ). Асноўны кірунак удару — Кіеўшчына.

Для адбіцця паветранай атакі былі задзейнічаныя мабільныя агнявыя групы ўсіх сіл абароны Украіны, тактычная авіяцыя ВПС і вайсковая авіяцыя Сухапутных войскаў, зенітныя ракетныя падраздзяленні і РЭБ ВПС.

Па дадзеных КМВА, у межах Кіева і на подступах да сталіцы былі збітыя больш за 40 варожых беспілотнікаў. У выніку падзення абломкаў у прыватным доме ўзнік пажар, пацярпелых няма.

У Днепрапятроўскай вобласці зенітны агонь знішчыў 6 «шахідаў». Абышлося без ахвяр. У Херсонскай вобласці ўкраінскія вайскоўцы збілі 9 ударных беспілотнікаў праціўніка.

Сілы абароны Украіны нанеслі ўдары па складзе зброі пад Курскам у РФ

У ноч на 31 ліпеня ўкраінскія вайскоўцы нанеслі ўдары па складзе для захоўвання ўзбраення і ваеннай тэхнікі пад расійскім Курскам.

Пра гэта паведамілі ў Генштабе Узброеных сіл Украіны. Там адзначылі, што нанесці ўдары па складзе ўдалося сіламі і сродкамі ВМС УС Украіны ва ўзаемадзеянні з іншымі падраздзяленнямі Сіл абароны. Інфармацыя аб наступствах удару ўдакладняецца.

Тым часам улады Курска ўначы заявілі аб ракетнай пагрозе. Выконваючы абавязкі губернатара Курскай вобласці Аляксей Смірноў таксама паведаміў, што ў выніку атакі УСУ адным з аб'ектаў адбыўся пажар.

Мінабароны РФ заявіла, што цягам ночы расійская СПА нібыта збіла 11 беспілотнікаў над Белгарадскай, Бранскай, Курскай, Калужскай і Растоўскай абласцямі і часова акупаваным Крымам. Таксама нібыта ўдалося збіць ракету «Няптун» над Курскам.

У расійскім СІЗА памёр ваеннапалонны з брыгады «Азоў»

У Расіі заявілі аб гібелі ў СІЗА Растова-на-Доне ўкраінскага ваеннапалоннага Аляксандра Ішчанкі, які служыў кіроўцам у брыгадзе «Азоў».

Пра гэта было заяўлена падчас паседжання Паўднёвага акруговага ваеннага суда ў Растове-на-Доне, які разглядае справу Ішчанкі і яшчэ 23 «азоўцаў», перадае карэспандэнт расійскага выдання «Медыязона».

У суд пакуль не паступалі дакументы, якія пацвярджаюць смерць украінскага вайскоўца. Дакладная дата і прычына смерці таксама пакуль невядомыя.

На паседжанні суд завяршыў разгляд «доказаў», але дэбаты павінны адбыцца 7 жніўня, каб да таго часу атрымаць дакументы аб гібелі ўкраінскага вайскоўца.

Як піша «Медыязона», Аляксандру Ішчанку было 55 гадоў. У лютым 2022 года далучыўся да тэрытарыяльнай абароны брыгады «Азоў» у якасці ваеннага кіроўцы. Вясной таго ж года трапіў у расійскі палон у Марыўпалі. І стаў фігурантам «крымінальнай справы» разам з яшчэ 23 украінцамі.

У палоне на тэрыторыі акупаванай часткі Данецкай вобласці Аляксандра незаконна абвінавацілі па двух артыкулах — «удзел у дзейнасьці тэрарыстычнай арганізацыі» і «замах на гвалтоўны захоп улады».

Каардынацыйны штаб па абыходжанні з ваеннапалоннымі пацвердзіў смерць вайскоўца брыгады «Азоў» Аляксандра Ішчанкі ў расійскім ізалятары. Высвятляюцца абставіны смерці.

У той жа час амбудсмэн Дзмітрый Лубінец напісаў тэрміновы ліст Упаўнаважанаму па правах чалавека ў РФ з нагоды смерці, а таксама праінфармаваў аб гэтым выпадку МКЧК і ААН.

У Харкаўскай вобласці пасля атакі РФ ратавальніку прыйшлося ехаць да сябе дадому па выкліку — у яго загінула жонка, 10-гадовы сын з апёкамі ў бальніцы

Пра гэту гісторыю распавялі ў МУС Украіны.

Гаворка ідзе пра абстрэл з паветра вёскі Вялікі Бурлук Харкаўскай вобласці. Таксама МУС апублікавала кадры разбурэнняў пасля абстрэлу і дома ратавальніка.

ГУР завяршыла масіраваную кібератаку на банкаўскую сістэму і дзяржаўныя рэсурсы РФ

Хакеры Галоўнага ўпраўлення разведкі Мінабароны завяршылі масавую DDOS-атаку на інтэрнэт-інфраструктуру расійцаў. У выніку атакі ўдалося нанесці ўдар па найбуйнейшым банкам і дзяржаўным рэсурсам РФ. Пра гэта hromadske паведаміла інфармаваная крыніца.

Атака завяршылася ўвечары 30 ліпеня. Яна працягвалася амаль тыдзень. Так, украінскім хакерам удалося атакаваць шэраг расійскіх банкаў, у тым ліку ВТБ-Банк, Альфа-Банк, Сбербанк, Газпромбанк і Дом.РФ» і Банк Расіі. А ў апошні дзень атакі ўдалося паразіць рэсурсы Мінабароны РФ, МУС і Федэральнай падатковай службы.

Як паведаміла крыніца, па стане на вечар 30 ліпеня большасці расійцаў не ўдалося аднавіць нармальнае функцыянаванне банкаўскіх і плацёжных сістэм, працу мабільных аператараў, сацыяльных сетак і інтэрнэт-правайдэраў.