901-шы дзень вайны. 28 населеных пунктаў РФ пад кантролем УСУ – в.а. губернатара Курскай обласці

Украіна прасоўваецца ў Курскай вобласці, нягледзячы на заявы Расіі аб стабілізацыі сітуацыі, адзначае ISW. Выконваючы абавязкі губернатара Курскай вобласці Аляксей Смірноў заявіў, што пад кантролем УСУ знаходзяцца 28 населеных пунктаў. 

Украінскія войскі капаюць акопы ў Курскай вобласці Расіі. Гэта прыкмета таго, што яны плануюць застацца, піша Forbes.

На шосты дзень наступу Украіны ў Курскую вобласць на поўдні Расіі з'явілася ўсё больш доказаў таго, што ўкраінскі корпус уварвання — частка брыгад колькасцю 2000 чалавек плюс як мінімум адзін асобны батальён колькасцю 400 чалавек, — плануе застацца.

“Украінцы капаюць траншэі. Чакаючы пазіцыйнай вайны ўздоўж або паблізу існуючай лініі фронту, рускія таксама абкопваюцца”, — піша выданне.

Тое, што абодва бакі ўмацоўваюць свае пазіцыі, не азначае, што ўкраінцы скончылі наступ. Гэта таксама не азначае, што расейцы не могуць контратакаваць і адціснуць украінцаў да мяжы, адзначаюць аналітыкі.

“Але гэта азначае, што стабілізацыя лініі фронту і доўгатэрміновая ўкраінская акупацыя часткі Курскай вобласці — на парадку дня”, — падкрэсліваюць журналісты.

*****

Наступ УСУ ў Курскай вобласці дазволіў сілам абароны Украіны хоць бы часова перахапіць ініцыятыву на адным участку фронту і працягнуць супрацьстаянне на ўсім полі бою.

Валоданне ініцыятывай на ўсёй тэрыторыі баявых дзеянняў з лістапада 2023 года дазволіла акупантам самім вызначаць месца, час, маштаб і патрабаванні да вядзення баёў ва Украіне і прымусіла Кіеў марнаваць матэрыяльныя і чалавечыя рэсурсы на рэактыўныя абарончыя аперацыі.

Як піша ISW, аперацыя ў Курскай вобласці можа накласці доўгатэрміновыя абмежаванні на аператыўнае планаванне, з якімі акупанты раней не сутыкаліся.

*****

У Белгарадскай вобласці РФ пачалася эвакуацыя жыхароў раёна на мяжы з Украінай. Губернатар назваў яе "перамяшчэннем" праз "актыўнасць ворага".

Улады накіравалі ў Чырвонаяружскі раён транспарт, каб перавезці жыхароў "у больш бяспечныя месцы".

Верагодна, эвакуацыя звязаная з атакай з боку Украіны на прымежную расійскую вёску Калацілаўка, пра якую 11 жніўня паведамлялі расійскія z-каналы. Але пэўнай інфармацыі пра тое, што ўкраінскія войскі ўвайшлі на тэрыторыю Расіі яшчэ і ў Белгарадскай вобласці (акрамя Курскай) пакуль няма.

*****

УСУ могуць атрымаць больш танкаў Leopard 2 ад Германіі. Як заявіў кіраўнік камітэта па абароне Бундэстага Маркус Фабер, наступ УСУ ў Курскай вобласці РФ адбываецца лепш, чым чакалася. Гэта з'яўляецца падставай казаць аб павелічэнні колькасці нямецкіх танкаў для Сіл абароны.

Акрамя таго, нямецкі чыноўнік мяркуе, што прагрэс украінцаў у Курскай вобласці дэманструе расейскаму насельніцтву, што “іх дыктатар нічога не кантралюе”, а вайсковае кіраўніцтва “перагружанае” гэтым.

“Добрая аснова для мірных перамоваў з пераемнікам Пуціна. І для перамоваў з Пуціным перад Міжнародным крымінальным судом”, — адзначыў Фабер.

*****

За апошнія суткі былі ліквідаваныя 1080 расійскіх вайскоўцаў.

Страты расійскай тэхнікі склалі: 

танкі – 3,

баявыя браняваныя машыны — 5,

артылерыйскія сістэмы — 65,

РСЗА — 3,

сродкі СПА — 1,

БПЛА аператыўна-тактычнага ўзроўню — 73,

аўтамабільная тэхніка — 66.