958-мы дзень вайны Расіі супраць Украіны: РФ скінула яшчэ 4 КАБы на Харкаў

Расія штодня губляе ва Украіне амаль 1,2 тысячы вайскоўцаў забітымі і параненымі, а колькасць пашкоджанай расійскай бронетэхнікі прыкладна ўтрая перавышае ўкраінскія страты. РФ зноў ударыла па густанаселеным раёне Харкава — чатырма КАБамі; загінулі два чалавекі

РФ скінула КАБы на Харкаў: ёсць загінулыя

Расійскія войскі 8 кастрычніка атакавалі Харкаў кіраванымі авіябомбамі. Пра гэта паведамляе РБК-Украіна са спасылкай на мэра Харкава Ігара Церахава ў Telegram і кіраўніка Харкаўскай АВА Алега Сінегубава ў Telegram .

«Папярэдне, атака КАБам на шматпавярхоўку ў Кіеўскім раёне», — напісаў мэр Ігар Церахаў.

Паводле яго слоў, у выніку ўдару папярэдне вядома пра загінулых. У 17.18 Церахаў напісаў, што ўжо вядома пра двух загінулых з-за ўдару кіраваных авіябомбаў па Харкаву.

У сваю чаргу, кіраўнік Харкаўскай абдасной ваеннай адміністрацыі Сінягубаў напісаў, што ў выніку атакі, паводле папярэдніяй інфармацыі, ёсць пацярпелыя.

Пазней Сінягубаў удакладніў, што ў Харкове было зафіксавана траплянне па адкрытых тэрыторыях. Усяго РФ выкарыстала чатыры авіябомбы.

Паводле яго слоў, загінулыя — мужчына і жанчына, якія ў момант атакі знаходзіліся на вуліцы. Пры гэтым вядома як мінімум аб трох параненых.

• Абстрэл Харкава

Варта адзначыць, што гэта ўжо далёка не першы выпадак, калі расійскія войскі карыстаюць свае магутныя авіябомбы для ўдараў па многіх раёнах у Харкове.

У прыватнасці, 24 верасня праціўнік нанёс удары па шматпавярховых дамах у Кіеўскім і Салтаўскім раёнах горада. Тады ў адным з будынкаў абрынулася перакрыцце. У выніку нападу пацярпелі дзясяткі пацярпелы мірных жыхароў, былі і загінулыя.

Мэр Церахаў паведаміў, што толькі за верасень расійскія войскі абстрэльвалі Харкаў больш за паўсотні разоў.

Ці спрацуе стратэгія павольнага адступлення УСУ ў Данбасе? Аналіз New York Times

Выданне New York Times (NYT) аналізуе стратэгію Украіны на цяперашнім этапе вайны і прыходзіць да высновы, што УСУ спрабуюць перамагчы расійскую армію, знясіліўшы яе рэсурсы ў кровапралітных баях за гарады Данбаса. Наколькі паспяховай апынецца такая тактыка, пакуль незразумела.

Расія павольна прасоўваецца наперад, і з пачатку мінулага года захапіла тры гарады — Мар'інку, Аўдзееўку і Вуглядар, а таксама дзясяткі вёсак і мястэчкаў Данецкай вобласці.

Для знешніх назіральнікаў павольнае, але ўпэўненае адступленне Украіны з Данбаса можа здацца сігналам пачатку заканчэння вайны, калі Масква ўпэўнена атрымлівае верх на полі бою, карыстаючыся сваёй перавагай у жывой сіле і агнявой моцы, піша NYT.

Але ўкраінскія камандзіры і ваенныя эксперты адмаўляюць гэта, сцвярджаючы, што бітва за Данбас выходзіць за рамкі простых тэрытарыяльных дасягненняў і страт.

На іх думку, цяпер гэта вайна на знясіленне, калі кожны бок спрабуе аслабіць іншы, наносячы максімальныя страты, спадзеючыся зламаць здольнасць ворага працягваць вайну, піша NYT.

Вайсковы эксперт Пасі Паранінен з фінскай кампаніі Black Bird Group адзначае, што за апошнія два месяцы расійскае войска захапіла каля 700 квадратных кіламетраў украінскай тэрыторыі.

Аднак да выканання расійскай мэты захапіць усю Данецкую вобласць яшчэ вельмі далёка, адзначае выданне. Для гэтага арміі РФ трэба будзе ўзяць пад кантроль яшчэ каля 10 тысяч квадратных кіламетраў, гэта значыць прыкладна ў пяць разоў больш, чым было акупавана за апошні год.

Паводле звестак, на якія спасылаюцца аўтары публікацыі, Расія штодня губляе ва Украіне амаль 1,2 тысячы вайскоўцаў забітымі і параненымі, а колькасць пашкоджанай расійскай бронетэхнікі прыкладна ўтрая перавышае ўкраінскія страты.

Руская служба ВВС сумесна з выданнем «Медыязона» і камандай валанцёраў вядзе ўласны падлік расійскіх страт.

На думку экспертаў, з якімі пагаварыла NYT, Украіна здольная вытрымаць бітву за Данбас і дачакацца моманту, калі расійскія страты пачнуць набываць кумулятыўны эфект.

Але некаторыя суразмоўцы выдання лічаць, што рызыка для УСУ вырас пасля пачатку наступу ў Курскай вобласці, які спрыяў знясіленню ўкраінскіх рэсурсаў.

Ваеннае ведамства Паўднёвай Карэі папярэджвае аб магчымай адпраўцы паўночнакарэйскіх салдат ва Украіну

КНДР, магчыма, накіруе сваіх вайскоўцаў ва Украіну для падтрымкі Расіі, заявіў у аўторак у парламенце Паўднёвай Карэі міністр абароны краіны Кім Ён Хен.

«Паколькі Расія і Паўночная Карэя заключылі дагавор, падобны на ваенны саюз, магчымасць адпраўкі вайскоўцаў на фронт вельмі верагодная», — цытуе заяву міністра паўднёвакарэйскае выданне Yonhap.

Нагадаем, у чэрвені 2024 года паўночнакарэйскі лідар Кім Чэн Ын і прэзідэнт Расіі Уладзімір Пуцін падпісалі двухбаковае пагадненне, якое ўключае пункт аб узаемнай абароне. Гэта быў ужо не першы знак паглыблення ваеннага супрацоўніцтва паміж Пхеньянам і Масквой.

Яшчэ ў студзені каардынатар стратэгічных камунікацый у Радзе нацбяспекі ЗША Джон Кірбі заявіў, што Расія атрымала з КНДР балістычныя ракеты і ўжо ўжывала іх супраць Украіны.

Кім Ён Хен заявіў таксама, што нядаўнія паведамленні пра страты паўночнакарэйскіх войскаў на акупаванай Расіяй тэрыторыі Данбаса, хутчэй за ўсё, адпавядаюць рэчаіснасці.

На мінулым тыдні ўкраінскае выданне Kyiv Post заявіла са спасылкай на крыніцы ў выведцы, што шэсць паўночнакарэйскіх афіцэраў былі забітыя і трое атрымалі раненні ў выніку ўкраінскага ракетнага ўдару 3 кастрычніка. Расійскі бок гэтую інфармацыю не каментаваў.

Публікацыі аб магчымым удзеле паўночнакарэйскіх вайскоўцаў у баявых дзеяннях ва Украіне на расійскім баку з'яўляліся і раней. У верасні 2023 года Уладзімір Пуцін сустракаўся з Кім Чэн Ынам на касмадроме “Усходні” і назваў такія паведамленні «лухтой поўнай».

Навіны вайны

• Другі саміт міру не адбудзецца ў лістападзе, як чакалася, — яго перанеслі на больш познія тэрміны.

Пра гэта паведамілі ў Офісе прэзідэнта Украіны: «У лістападзе другі саміт міру яшчэ не адбудзецца. Але ўсё для яго падрыхтоўкі ўжо павінна быць гатова. Пакуль што праходзяць тэматычныя канферэнцыі па кожным пункце ўкраінскай формулы міру». Дату правядзення саміту будуць выбіраць пасля завяршэння тэматычных канферэнцый па пунктах Формулы міру. Апошняя падобная канферэнцыя адбудзецца 30-31 кастрычніка.

• Байдэн адклаў паездку, падчас якой павінен быў узяць удзел у пасяджэнні Рамштайн у Германіі. Гэта адбылося праз ураган, які бушуе ў Фларыдзе, паведамілі ў Белым доме.
• У Феадосіі дагэтуль гарыць нафтабаза пасля атакі ўкраінскіх дронаў у ноч на 7 кастрычніка.

Папярэдні слайдНаступны слайд

Кіраўнік акупацыйнай «адміністрацыі» горада Ігар Ткачэнка паведаміў, што ў раёнах Чарнаморскай набярэжнай і блізкіх раёнах праведзена часовая эвакуацыя больш за тысячу чалавек. Расійскія паблікі пішуць, што агонь ад пашкоджаных цыстэрнаў перакінуўся на суседнія бакі з нафтай.

Радыё Свабода паказала спадарожнікавыя здымкі наступстваў украінскага ўдару па найбуйнейшай у Крыме нафтабазе ў Феадосіі ў ноч на 7 кастрычніка. На фота ад 8 кастрычніка бачныя клубы дыму, па стане на 11:44 па кіеўскім часе маштабны пажар працягваецца.

• Выданне Financial Times піша, што ў ЗША і некаторых іншых заходніх краінах мяняюцца настроі з нагоды таго, чым і як павінна скончыцца вайна Расіі супраць Украіны, а Кіеў уступае ў трэцюю зіму поўнамаштабнай вайны «з больш змрочным настроем, чым калі-небудзь».

• Уладзімір Зяленскі паведаміў, што правёў пасяджэнне Стаўкі вярхоўнага галоўнакамандуючага ў пытанні забеспячэння Сіл абароны зброяй і вайсковай тэхнікай. Вызначылі прыярытэты на наступны год — гэта, у прыватнасці, ракеты, дроны, снарады, а таксама актыўнае прыцягненне інвестыцый ад партнёраў.
• Расіяне за год вывезлі праз порт Марыупаля больш за 180 тысяч тон скрадзенага ўкраінскага збожжа, паведаміў Шмыгаль.

• За верасень 2024 года зафіксавана 250 выпадкаў прымянення расійскімі войскамі супраць сіл абароны Украіны боепрыпасаў з небяспечнымі хімічнымі рэчывамі, паведаміў украінскі Генштаб. Ужыванне РФ небяспечных хімічных рэчываў набыло сістэмны характар з лютага 2023 года. З тых часоў па стане на 24 верасня бягучага года зафіксавана 4228 такіх выпадкаў.