Арастовіч: Ніякага варыянту, дзе мы дазваляем расійцам застацца тут, не будзе

Кампрамісу з Расіяй і акупацыі ёю часткі Украіны для «прымірэння» не будзе — акупанты павінны цалкам сысці з Украіны, заявіў у эфіры ўкраінскага ТБ дарадца кіраўніка Адміністрацыі прэзідэнта Украіны Аляксей Арастовіч, дадаўшы, што гаворкі пра якое-небудзь прымірэнне з ворагам цяпер ісці не павінна.


«Адзіны варыянт прымірэння — гэта расійская капітуляцыя, вывад войскаў і размовы аб кампенсацыях. Гэта прынцыповая пазіцыя кіраўніцтва дзяржавы», — заявіў Арастовіч.

Ён падкрэсліў, што гэта ўмовы не толькі прэзідэнта і кіраўніцтва краіны, але і дыпламатаў, а таксама міжнародных партнёраў Украіны — ЗША і Вялікабрытаніі.

«У летуценнікаў у Еўропе ёсць час, каб прадставіць, як усё неадназначна, але нічога з гэтага не будзе, акрамя ваеннай паразы Расіі і выкіду з Украіны ўсіх варожых салдат», — дадаў Арастовіч.

На думку дарадцы кіраўніка АП, некаторыя краіны хочуць паўтарыць Мінскія пагадненні, у тым ліку заклікаючы спыніць агонь любой цаной.

«Ніякага варыянту, дзе мы дазваляем расійцам застацца тут, не будзе. Асобныя краіны могуць паспрабаваць дамаўляцца, але бачым, якія рознабаковыя працэсы ідуць у Еўропе. Яны часам будуць вагацца, таму што гэта еўрапейская школа палітыкі», — распавёў Арастовіч, дадаўшы, што паміж РФ, Францыяй і Германіяй можа весціся пэўная гульня на трохбаковым узроўні. Такія паводзіны ён называе дзіўнай пазіцыяй.

Прыкладна такі ж каментар даў і дарадца кіраўніка Офіса прэзідэнта Міхаіл Падаляк.

«Не прапануйце нам спыненне агню — гэта немагчыма без татальнага вываду войскаў Расіі. Украінскае грамадства не цікавіць новы “Мінск” і вяртанне вайны праз некалькі гадоў. Пакуль Расія не гатовая цалкам вызваліць нашы землі, наша перамоўная платформа — зброя, санкцыі і грошы», — заявіў Падаляк.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: