«Місіс Крым»-2022 праспявала «Червону каліну». З ёй запісалі «пакаяльнае відэа» і аштрафавалі

«Місіс Крым»-2022 Вольга Валеева аштрафавана судом на 40 тысяч расійскіх рублёў за выкананне ўкраінскай песні «Червона каліна», паведамляе РІА «Новости».

14873544t1h6625.jpg

Сяброўка Валеевай, разам з якой яны выконвалі песню, атрымала 10 сутак арышту. Пакаранне для Валеевай было менш строгім, бо ў яе ёсць непаўналетнія дзеці.

Жанчын прызналі вінаватымі ў здзяйсненні адміністрацыйных правапарушэнняў па двух артыкулах — аб дыскрэдытацыі Узброеных сіл РФ (20.3.3 КаАП РФ) і аб прапагандзе сімволікі экстрэмісцкіх арганізацый (20.3 КаАП РФ).

У тэлеграм-канале МУС Крыма таксама з'явіўся відэазапіс, дзе жанчыны прыносяць прабачэнні за выкананне песні.

Валеева і яе сяброўка выконвалі песню «Червона каліна», седзячы на балконе — адпаведнае відэа яны выклалі ў Instagram, дзе яно прыцягнула шырокую ўвагу. Сама Валеева заяўляла, што песня выконвалася без якога-небудзь намеру.

У сярэдзіне верасня ў Крыме прыцягнулі да адказнасці шасцярых арганізатараў і гасцей вяселля, дзе праспявалі «Червону каліну»: яны атрымалі штрафы і арышты на тэрмін да 15 сутак. У жніўні на паўвостраве арыштавалі дыджэя, які ўключыў у бары кліп на песню «Дзікае поле» з выявамі ў падтрымку ўкраінскіх вайскоўцаў. Наведвальніка, які замовіў песню, аштрафавалі на 50 тысяч рублёў.

Песня «Червона каліна» пасля расійскага ўварвання стала адным з сімвалаў Украіны. Яе выконвалі многія ўкраінскія артысты, а таксама легендарны гурт «Pink Floyd». Расійскія дзяржаўныя СМІ пішуць, што песня «лічыцца гімнам украінскіх нацыяналістычных фарміраванняў, у тым ліку забароненых у РФ».

У Беларусі за спевы па-ўкраінску таксама рэпрэсуюць. Летам за выкананне песні «Обіймі» гурта «Акіян Эльзы» схапілі спявачку Мэрыем Герасіменка. Пасля «сутак» на яе завялі крымінальную справу.