Politico: Тарыфы Дональда Трампа могуць падарваць абаронны патэнцыял ЗША

Тарыфы, уведзеныя Трампам, могуць сур'ёзна падарваць абаронны патэнцыял ЗША ў паветры, на зямлі і на моры. Але з тарыфамі або без іх Украіна працягвае супраціўляцца расійскай агрэсіі. А некаторыя генералы NATO нават мяркуюць, што Расія не зможа перамагчы Украіну ў вайне. Ідуць 1136-я суткі вайны РФ супраць Украіны пры саўдзеле ў агрэсіі рэжыму Лукашэнкі.

За мінулыя суткі, 3 красавіка, на фронце адбылося 156 баявых сутыкненняў. Больш за ўсё вораг ціснуў на Пакроўскім кірунку, паведаміў у ранішняй зводцы Генштаб Узброеных Сіл Украіны.

На Пакроўскім кірунку сілы абароны Украіны спынілі 57 атак расіян ў раёнах Новакалінава, Тарасаўкі, Елізаветаўкм, Зверава, Удалага і не толькі.

На Ліманскім кірунку расійцы атакавалі 19 разоў, спрабуючы рушыць наперад паблізу Грэкаўкі, Новага, Кацярынаўкі і ў бок Торскага, Зялёнай Даліны.

На Тарэцкім кірунку расійцы здзейснілі 29 атаку раёнах Крымскага, Дачнага, Дружбы, Дыліеўкі, Тарэцка і Леанідаўкі.

На Новапаўлаўскім кірунку сілы абароны Украіны адбілі дзевяць расійскіх штурмаў у напрамках Разліву і Канстанцінопаля. На Арэхаўскім кірунку расіяне здзейснілі восем атак на пазіцыі УСУ.

У Курскай вобласці Расіі за мінулыя суткі адбылося 13 боесутыкненняў.

* * *

Расія ў ноч на 4 красавіка зноў атакавала Украіну 78-мі беспілотнікамі, паведамляюць паветраныя сілы УСУ. Сілы СПА збілі 42 дроны. Яшчэ 22 беспілотнікі лакацыйна страчаныя (без негатыўных наступстваў).

Гэтай ноччу ў Харкаве зафіксавана сем трапленняў падчас атакі дронаў. Па даных мясцовых уладаў, амаль усе ўдары прыйшліся на Новабаварскі раён Харкава. Чатыры чалавекі загінулі, пацярпелі 35 чалавек.

У Браварскім раёне Кіеўскай вобласці ў выніку атакі дронаў паранена два чалавекі, пацярпелі аўтасалон, СТА, заправачныя станцыі і адміністрацыйны будынак.

* * *

* * *

Атачэнне прэзідэнта ЗША Дональда Трампа раіць не тэлефанаваць расійскаму дыктатару Уладзіміра Пуціну, пакуль ён не абавязуецца цалкам спыніць агонь ва Украіне, піша NBC News.

Па словах двух афіцыйных асоб Адміністрацыі, размова паміж Трампам і Пуціным не запланаваная. Чыноўнікі папярэдзілі, што прэзідэнт можа раптам вырашыць, што хоча пагаворыць з кіраўніком Крамля. Аднак яны сказалі яму, што тэлефонны званок — не лепшая ідэя, калі толькі Пуцін не паведаміць Беламу дому, што ён згодны на поўнае спыненне агню ў расійска-ўкраінскай вайне.

* * *

Сталы прадстаўнік Брытаніі пры АБСЕ Ніл Холанд заявіў, што Расія дэманструе нежаданне мірнага ўрэгулявання вайны ва Украіне. «Ужо 22 дні прайшло з таго моманту, як Украіна выказала гатоўнасць прыняць неадкладнае 30-дзённае спыненне агню. Адзінай умовай Украіны было тое, каб Расія таксама пагадзілася на гэта. Але замест таго, каб скарыстацца гэтай магчымасцю для ўстанаўлення міру, Расія вырашыла працягваць баявыя дзеянні, вынікам чаго з'яўляюцца ахвяры сярод салдат і грамадзянскіх асоб з абодвух бакоў», — адзначыў Холанд.

Замест таго каб сур'ёзна прыняць удзел у мірных ініцыятывах пад кіраўніцтвам ЗША, Пуцін працягвае адцягваць увагу і зацягваць час. Палітык падкрэсліў, што спробы паставіць пад сумнеў аўтарытэт прэзідэнта Уладзіміра Зяленскага з'яўляюцца толькі манеўрам, які павінен схаваць асноўную праблему — адмову Расіі сесці за стол перамоваў і ўзяць на сябе абавязацельствы па неадкладным спыненні агню.

«Мы не бачым ніякіх прыкмет таго, што Пуцін сур'ёзна рыхтуецца да міру», — адзначыў ён.

* * *

Цяпер Украіна і яе войскі знаходзяцца на вельмі моцных абарончых пазіцыях, і нават паляпшаюць іх, заявіў на слуханнях у Камітэце Сената ЗША па ўзброеных сілах галоўнакамандуючы Аб'яднаных сіл NATO у Еўропе генерал Крыстафер Кавалі.

Падчас выступу ў Сенаце ў Кавалі спыталі, ці асуджаныя ўкраінцы на паразу, на што той адказаў, што гэтае пытанне з'яўляецца досыць важным.

«У вайне няма нічога непазбежнага. І ўкраінцы цяпер знаходзяцца на вельмі моцных абарончых пазіцыях і паляпшаюць сваю здольнасць генераваць сілу і ўмацоўваць гэтыя пазіцыі. Седзячы тут цяпер, цяжка ўявіць вялікі ўкраінскі наступ, які ачысціць кожны квадратны сантыметр Украіны ад ворага. Але гэтак жа цяжка ўявіць, што Украіна пацерпіць крах і прайграе гэты канфлікт. Я не думаю, што ўкраінская параза з'яўляецца непазбежнай», — адказаў генерал NATO.

* * *

Гандлёвая вайна кіраўніка Белага дома Дональда Трампа можа ўскладніць для ЗША вытворчасць узбраення, а таксама ўтрыманне партнёраў, піша Politico.

У прыватнасці, рэалізацыя тарыфнай праграмы можа заблытаць глабальныя ланцугі паставак, якія Пентагон будаваў дзесяцігоддзямі. Таксама яна, верагодна, павысіць цэны на амерыканскае ўзбраенне і ўскладніць міжнародныя намаганні па супрацьдзеянні Кітаю.

Ва ўказе аб тарыфах Белы дом заявіў, што Штаты павінны вырабляць дэталі «без празмернай залежнасці ад імпарту ключавых рэсурсаў». «Але гэта значна лягчэй напісаць у дакуменце, чым зрабіць. Пентагон выдаткаваў дзесяцігоддзі на стварэнне, фінансаванне і развіццё глабальнай сеткі пастаўшчыкоў і кампаній, якія цяпер сутыкнуліся з тарыфамі. Не маючы выключэнняў для абароны, адміністрацыя можа звесці на нішто значную частку гэтай працы, затрымліваючы вытворчасць зброі амерыканскай вытворчасці для краіны і іншых пакупнікоў», — тлумачыць Politico.

Прамысловыя асацыяцыі патрабуюць стварыць выключэнне для абароннай галіны, каб пазбегнуць дадатковых выдаткаў, збояў у ланцужках паставак і немагчымасці выканаць абавязацельствы па бяспецы краіны.

А саюзнікі ЗША пачынаюць ўсведамляць новыя рэаліі і ўсё больш засяроджваюцца на развіцці ўласнага абароннага патэнцыялу.