«Воблу» замянілі на «вайну». Жыхарку Цюмені ўсё ж асудзілі за надпіс «Не в***е»

Жыхарцы Цюмені (РФ) прызначылі 30 тысяч расійскіх рублёў (крыху менш за 500 долараў) штрафу праз надпіс «Не в***е» пасля перагляду справы. Першы раз яна пераканала суд, што мела на ўвазе «не вобле».

Цэнтральны раённы суд Цюмені прызнаў мясцовую жыхарку Алісу Кліментаву вінаватай у «дыскрэдытацыі расійскага войска» (ч. 1 арт. 20.3.3 КаАП РФ) праз надпіс на асфальце «не в***е».

Як паведамляе аб'яднаная прэс-служба судоў Цюменскай вобласці, Кліментавай прызначылі 30 тысяч рублёў штрафу (крыху менш за 500 долараў).

Упершыню суд разгледзеў адміністрацыйны пратакол у дачыненні да Кліментавай з-за надпісу «не в***е» ў кастрычніку. Тады жыхарка Цюмені настаяла, што яе пратэст быў прысвечаны рыбе, а надпіс на асфальце меў на ўвазе «не вобле». Суд справу спыніў.

Паліцыя не пагадзілася з гэтым рашэннем і падала апеляцыйную скаргу. Цюменскі абласны суд адмяніў рашэнне Цэнтральнага раённага суда і накіраваў справу на новы разгляд.

Акцыя Алісы Кліментавай прыцягнула вялікую ўвагу расійскай грамадскасці. У прыватнасці, журналістка Ксенія Сабчак запусціла лінейку адзення з надпісам «Не вобле», а комік Сямён Слепакоў напісаў песню з такой назвай.

Паводле «Медузы».