Заснавальнік «Gulagu.Net»: Забітых проста закопваюць, каб не плаціць кампенсацыі
Уладзімір Асечкін распавёў пра «канвеер смерці», зладжаны для зняволеных, якія пагадзіліся на прапанову «ПВК Вагнер» і пайшлі на вайну.
Илюстрацыйны малюнак Fate Unlimited Blade
«ПВК Вагнер» не хоча адпускаць зняволеных пасля паўгода службы на ўкраінскім фронце. Тых, хто спрабуе бегчы або здацца УСУ, расстрэльваюць і абвяшчаюць зніклымі без вестак, каб не плаціць кампенсацыі іх сваякам, піша «Можем объяснить».
Што чакае зняволеных, якія пагадзіліся ваяваць ва Украіне, распавёў у праграме «Воздух» заснавальнік праекта «Gulagu.Net» Уладзімір Асечкін. Паводле яго слоў, паўгадавую «камандзіроўку» на фронт перажываюць толькі 15-20% зняволеных. Пры гэтым вялікая частка тых, хто выжыў, атрымліваюць цяжкія раненні.
«Іх не хочуць спецслужбы і Прыгожын адпускаць, яны выдатна разумеюць, што гэтыя людзі небяспечныя і могуць здзейсніць нешта ўжо ўнутры Расіі. Будуць старацца засунуць іх назад у пекла вайны, каб там яны і засталіся», — сказаў Асечкін.
Тых жа, хто спрабуе бегчы з поля бою або здацца ў палон, расстрэльваюць. «Свая армія адкрывае па іх агонь з артылерыі. Ёсць выпадкі, калі па 7-8 чалавек — цэлае аддзяленне зняволеных — спрабуе здацца, а іх са спіны магутнымі снарадамі накрываюць, іх раздзірае на кавалкі», — кажа праваабаронца.
Уладзімір Асечкін таксама распавёў, як вагнераўцы абыходзяцца з загінулымі: «Мы апыталі цэлы шэраг вагнераўцаў-уцекачоў з поля бою. Яны распавядаюць жахлівыя рэчы пра брацкія магілы: людзей проста скідаюць у адно месца і закопваюць, каб не плаціць кампенсацыі».
