Зяленскі: Мы павінны быць гатовы як на мяжы з Беларуссю, так і ў абласцях
Зяленскі прыбыў з неабвешчаным візітам у Львоў. Абмяркоўвалі і становішча на мяжы з Беларуссю.
Уладзімір Зяленскі падчас візіту ў Львоў. Фота: Львоўская АГА.
Украінскі прэзідэнт у Львове ўшанаваў памяць украінскіх воінаў, якія загінулі ў баях з расійскімі акупантамі. Цырымонія прайшла на Марсавым полі Лычакаўскіх могілак.
У Львове ж Зяленскі правёў нараду па бяспецы, прысвечаную стану забеспячэння аховы дзяржмяжы Украіны і актуальнай сітуацыі бяспекі ў паўночна-заходніх абласцях краіны. На ёй абмяркоўвалі і сітуацыю на мяжы з Беларуссю.
Уладзімір Зяленскі заслухаў інфармацыю аб контрдыверсійных мерах на беларуска-ўкраінскай мяжы. Кіраўніку Украіны далажылі пра стан і ўмацаванне фартыфікацыйных збудаванняў на мяжы з Беларуссю, а таксама пра матэрыяльнае забеспячэнне памежнікаў і вайскоўцаў у памежных з Беларуссю рэгіёнах.
Пра гэта паведаміла прэс-служба кіраўніка дзяржавы ў сераду, 11 студзеня.
«Разумеем, што, акрамя магутных заяў, мы нічога магутнага там не бачым, аднак павінны быць гатовымі як на мяжы, так і ў абласцях», — заявіў Зяленскі.
