Павел Усаў: Задача-мінімум разгортвання рэгіянальнай групоўкі войскаў — стварыць яшчэ адзін абшар хаосу

Палітолаг — пра расійскіх вайскоўцаў, якія прыбываюць у Беларусь, і мэты сумеснай групоўкі.

«Апісваючы наступны сцэнар, я не сыходжу з пазіцыі «выгадна — не выгадна», — піша Павел Усаў. — Для Пуціна, які пачаў гэтую жудасную вайну і які гатовы да ўжывання ядзернай зброі, такіх размежаванняў не існуе. Лукашэнка для яго — умоўная тактычная ядравая зброя.

Калі Масква пакуль не ў стане (але хоча) нанесці лакальны ядзерны ўдар, то чаму не выкарыстаць беларусаў?

Чым больш будзе прасторы канфлікту, тым лепш для Пуціна, які імкнецца спыніць наступленне УСУ і замарозіць вайну на актуальных пазіцыях.

Разгортванне рэгіянальнай групоўкі войскаў без яе ўцягвання ў вайну не мае ніякага ні ідэалагічнага, ні палітычнага сэнсу, асабліва для Лукашэнкі. Як гэта было з вучэннямі ў лютым 2022 году. 

Я лічу, што яе мэта — пашырэнне прасторы вайны і ўратаванне рэжыму Пуціна. Дзеля гэтага Масква ў стане ахвяраваць і Лукашэнкам, і беларускімі грамадзянамі. Адкрыццё другога фронту (другая спроба) будзе сур'ёзным выпрабаваннем для Украіны.

Reuters: Беларусь збіраецца запускаць ракеты разам з Расіяй

Таму сітуацыя можа разгортвацца наступным чынам.

1. Фарміруецца рэгіянальная групоўка войскаў. Агульная колькасць да 70 тысяч чалавек.

2. Каля 20-30 тысяч чалавек будзе размешчана на мяжы Берасцейская вобласць — Валынская вобласць (15 на 15 тыс.).

Маларыта, пра якую ўзгадваў Церцель, знаходзіцца ў 30 км ад мяжы з Валынскай вобласцю (кірунак Луцк —Львоў) і недалёка ад мяжы з Польшчай.

3. У гарадах Шацк і Ратна (Украіна) па задумках «Штаба» РГВ нібы фарміруецца дыверсійная група 300-400 чалавек з беларускіх добраахвотнікаў, якая павінна захапіць Маларыту і рухацца ў Мінск. Заплечча будуць, вядома, складаць украінцы і палякі. Менавіта з увагі на Польшчу і НАТА выбрана Маларыта, а не Рэчыца, ці Столін, праз якія да Мінску карацей.

Канешне, тут есць стратэгічная мэта: спроба паралізаваць стратэгічную лагістыку Украіна — Захад, стварыць хаос і выклікаць новую хвалю ўцекачоў ва Украіне.

4. На працягу некалькіх дзён Мінскам будзе заяўляцца пра правакацыі, спробы прарваць мяжу, абстрэлы памежнікаў (з ахвярамі па баку РБ) і «кансервамі» з украінскага боку, выбухі на цывільных аб'ектах у Беларусі і г. д. Усё гэта пры інтэнсіўнай інфармацыйнай апрацоўцы, пашырэнню страхаў, напружанасці, нянавісці, злосці, агрэсіі, што ўжо адбываецца зараз.

5. Пуцінскія і лукашэнкаўскія генералы, «бачачы рэальныя пагрозы», наносяць прэвентыўны удар па «згуртаванні баевікоў», каб не дапусціць уварвання на тэрыторыю Беларусі і далейшых удараў.

Яны б'юць па Ковелі і Луцку, ствараюць напружанне на мяжы з Польшчай, а таксама спрабуюць увайсці на тэрыторыю Украіны ў тым жа накірунку Ковель — Луцк — Львоў.

6. Разам з гэтым адбываюцца дзеянні, якія будуць стрымліваць украінскія сілы на кіеўскім напрамку.

У дадзеным выпадку зусім неабавязкова, каб РГВ захоплівала гарады ці прасоўвалася ўглыб тэрыторыі Украіны. Задача-мінімум — стварыць яшчэ адзін абшар хаосу на пляцоўцы да 100 кв. км з непасрэднай псіхалагічнай пагрозай для НАТА.