Першыя эшалоны з расійскімі салдатамі ўжо ў Беларусі
Мінабароны Беларусі сустрэла іх «з хлебам і соллю».
Прэс-служба беларускага Міністэрства абароны паведаміла, што першыя эшалоны з мабілізаванымі расійскімі вайскоўцамі прыбылі ў Беларусь. Паводле заявы ведамства, «гасцей» сустрэлі «з хлебам і соллю».
Як цытуе reform.by словы намесніка камандзіра расійскай роты Віктара Смяяна, расійскія вайскоўцы «прыехалі аказваць дапамогу брацкаму народу»:
«Мы прыбылі на беларускую зямлю, шчыра скажу, сустрэча была нечаканая, вельмі цёплая, вельмі прыемна. Прыехалі ў Рэспубліку Беларусь аказаць дапамогу брацкаму беларускаму народу, гатовыя выканаць любыя задачы, якія атрымаем ад камандавання, гэта значыць у нас настрой ва ўсіх баявы, дух баявы, гатовыя выканаць любыя задачы».
Нагадаем, нядаўна Лукашэнка заявіў пра размяшчэнне на беларускай тэрыторыі «тысяч расійскіх вайскоўцаў». 10 кастрычніка ён правёў нараду па пытаннях бяспекі, на якой заявіў, што дамовіўся з Пуціным аб разгортванні сумеснай рэгіянальнай групоўкі войскаў: «У сувязі з абвастрэннем на заходніх межах Саюзнай дзяржавы мы дамовіліся аб разгортванні рэгіянальнай групоўкі Расійскай Федэрацыі і Рэспублікі Беларусь. Гэта ўсё па нашых дакументах».