440-вы дзень вайны. У ноч на 9 траўня Расія атакавала Украіну крылатымі ракетамі

У ноч на 9 траўня расійцы абстралялі Украіну крылатымі ракетамі. Паведамляецца пра 25 пускаў, 23 ракеты збіла ўкраінская СПА. Чалавечых ахвяр няма.

17 ракет было выпушчана з носьбітаў паветранага базавання — з самалётаў стратэгічнай авіяцыі Ту-95МС. 15 з іх былі збітыя.

Пра гэта паведаміў галоўнакамандуючы Валерый Залужны. Каля 22:00 гадзін 8 мая акупанты таксама выпусцілі 8 крылатых ракет «Калібр» з носьбітаў у Чорным моры, якія накіраваў на ўсходнія рэгіёны краіны. Усе 8 былі знішчаныя сіламі і сродкамі СПА паветранага камандавання «Усход».

Крылатымі ракетамі быў атакаваны Кіеў і Кіеўская вобласць. Паведамляецца, што СПА паспяхова справілася з абаронай сталіцы, прамых трапленняў не дапушчана.

У ходзе начной атакі па Кіеве расійскі агрэсар ужыў каля 15 ракет тыпу Х-101. Ні адна не змагла ўразіць прызначаную ёй мэту, паведамляе Кіеўская гарадская ваенная адміністрацыя.

Адзначаецца, што гэтая паветраная атака па Кіеве ўжо пятая з пачатку траўня і самая магутная з усіх.

«Цяперашняя начная атака была ажыццёўлена з чатырох бартоў стратэгічных бамбавікоў Ту-95МС з раёна Каспійскага мора. Нагадаю, што напярэдадні рашысты наўмысна задзейнічалі рэкордную колькасць «Shahed», каб выявіць і максімальна знясіліць СПА Кіева. Але, як і на фронце, планы агрэсара праваліліся», — паведаміў кіраўнік КГВА Сяргей Папко.

Паводле яго слоў, украінскія байцы змаглі адбіць паветраны налёт на сталіцу, не дапусціўшы ніводнага траплення ракеты па зададзенай цэлі.

«Паводле папярэдняй інфармацыі, у паветранай прасторы вакол Кіева было выяўлена і знішчана каля паўтары дзясяткаў варожых паветраных цэляў! Трапленняў не дапушчана. Папярэдне, без ахвяр і сур'ёзных разбурэнняў у выніку падзення абломкаў», — заявіў ён.

Няма разбурэнняў і ахвяр і ў выніку абстрэлу Кіеўскай вобласці.

439-ты дзень вайны: новыя святы ва Украіне, новыя ракеты і атакаваныя шматпавярхоўкі

У ноч на аўторак акупанты запусцілі восем ракет на Днепрапятроўскую вобласць, украінскія ваяры з паветранага камандавання «Усход» ліквідавалі іх усе. Паведамляецца пра трапленне ў чатырохпавярховы дом у Дняпры, у выніку пацярпела і шпіталізаваная 32-гадовая жанчына. Пра гэта распавёў кіраўнік Днепрапятроўскай абласной ваеннай адміністрацыі Сяргей Лысак.

«Дзякуй СПА за гэтую раніцу! Адпрацавалі магутна. Уначы вайскоўцы з паветранага камандавання «Усход» збілі ўсе восем ракет, якія вораг накіраваў на вобласць. Абломкі расійскага «металалому» ўпалі на чатырохпавярхоўку ў Дняпры», — адзначыў чыноўнік.

Кіраўнік АВА дадаў, што ў доме абломкамі пашкоджаны дах і перакрыцце некалькіх памяшканняў. Акрамя таго, на трэцім паверсе чатырохпавярхоўкі знайшлі баявую частку ракеты. Паколькі ў доме працавалі выбухатэхнікі, былі эвакуяваныя дзясяткі жыхароў. «Небяспечныя абломкі ўжо вывезлі, іх знішчаць», — дадаў Лысак.

Агульная сітуацыя на фронце за мінулыя суткі істотна не змянілася. За ўчорашні дзень украінскія абаронцы адбілі 42 спробы наступу расійцаў на чатырох аператыўных кірунках фронту — Ліманскім, Бахмуцкім, Аўдзееўскім і Мар'інскім. Пра гэта паведаміў Генеральны штаб УСУ.

Вайскоўцы адзначаюць, што найбольш цяжкая сітуацыя складваецца ў раёне Бахмута і Мар'інкі.

Так, на працягу сутак агрэсары актыўна, але беспаспяхова атакавалі ў напрамку пасёлка Іванаўскае і горада Часаў Яр, праз якія ідуць асноўныя шляхі забеспячэння ўкраінскіх войскаў у Бахмуце. А на Мар'інскім кірунку ўкраінскім байцам давялося адбіваць шматлікія атакі акупантаў на сам горад.

На Ліманскім кірунку асноўныя намаганні расійскай наступальнай групоўкі засяродзіліся ў напрамку пасёлка Белагораўка. Пад Аўдзееўкай акупанты наступалі на сам горад, а таксама на пасёлак Першамайскае — без поспеху.

Тым часам прэзідэнт Еўрапейскай камісіі Урсула фон дэр Ляен прыбыла ў Кіеў. Пра гэта яна паведаміла ў «Твітары».

«Прыемна вярнуцца ў Кіеў, дзе каштоўнасці, якія мы цэнім, абараняюцца кожны дзень. Таму гэта годнае месца для святкавання Дня Еўропы», — паведаміла фон дэр Ляен.

Яна вітала пастанову прэзідэнта Украіны Уладзіміра Зяленскага зрабіць 9 траўня менавіта Днём Еўропы ва Украіне.

Прэзідэнт Еўракамісіі таксама апублікавала фатаграфію з платформы чыгуначнага вакзала Кіева, дзе яе сустракаў намеснік міністра замежных спраў Украіны Яўген Перабійніс.

Вядома, што сёння фон дэр Ляен правядзе сустрэчу з Зяленскім.