573-ці дзень вайны. Расійцы атакавалі Львоў і Херсон, УСУ пад Бахмутам разбілі элітныя часткі РФ

Раніцай 19 верасня расійскія захопнікі атакавалі ўкраінскія гарады беспілотнымі лятальнымі апаратамі. Серыя гучных выбухаў прагрымела ў Львове.

Кіраўнік Львоўскай абласной вайсковай адміністрацыі Максім Казіцкі паведаміў, што паветраная трывога была абвешчана каля 03:40 і доўжылася амаль 2,5 гадзіны. Паводле папярэдняй інфармацыі, у напрамку Львоўшчыны ляцелі 18 дронаў-камікадзэ тыпу «Шахед». 15 з іх збілі. Сем збілі непасрэдна ў паветранай прасторы Львоўскай вобласці.

Як паведаміў мэр Львова Андрэй Садовы, пад заваламі знайшлі цела загінулага мужчыны, які працаваў на адным з атакаваных складоў.

«Знішчана тры складскія памяшканні. Гэта склады з вокнамі, бытавой хіміяй, а таксама памяшканні, дзе захоўвалася гуманітарная дапамога. Усяго плошча ўзгарання каля 10 тысяч метраў квадратных», — паведаміў Садовы.

Мэр адзначыў, што наступствы атакі надзвычай складаныя. На складах, у прыватнасці, былі генератары і цёплая вопратка, якую павінны былі адправіць у іншыя вобласці.

«Цяпер гэта ўсё гарыць. Гараць і прадукты харчавання, вырабы лёгкай прамысловасці... Усе збянтэжаныя, бо страты вымяраюцца не ў мільёнах, нават не ў дзясятках мільёнаў. Гэта сотні мільёнаў. Гэта адзін з самых маштабных пажараў з пункту гледжання разбурэння і матэрыяльных каштоўнасцей», — адзначыў Садовы.

572-гі дзень вайны: Украіна вызваліла Кляшчэеўку, расійскія войскі — у цяжкай сітуацыі

Акупанты 19 верасня таксама атакавалі з артылерыі Херсон, пад абстрэл трапіў тралейбус — загінуў 49-гадовы сяржант паліцыі. Пра гэта паведаміў старшыня Херсонскай абласной ваеннай адміністрацыі Аляксандр Пракудзін.

Яшчэ двое цывільных атрымалі цяжкія раненні, яны шпіталізаваны. Паводле слоў Пракудзіна, раненні атрымалі двое пасажыраў тралейбуса — мужчыны 33 і 57 гадоў.

Таксама ў выніку ўдару загарэўся складскі будынак. Ратавальнікі тушаць пажар плошчай каля 1000 кв. м.

Сілы абароны Украіны працягваюць вядзенне абароны на ўсходзе і поўдні Украіны, наступальных дзеянняў на мелітопальскім і бахмуцкім напрамках. Пра гэта паведаміў Генштаб УСУ.

Адзначаецца, што акупанты спрабуюць аднавіць страчаныя пазіцыі каля Андрэеўкі і Рабоцінага, атакуюць у раёне Кляшчэеўкі і Мар'інкі. За суткі адбылося 35 баявых сутыкненняў.

На бахмуцкім кірунку ўкраінскія вайскоўцы паспяхова адбілі атакі праціўніка ў раёне Кляшчэеўкі Данецкай вобласці. «Праціўнік спрабаваў аднавіць страчанае становішча ў раёне Андрэеўкі Данецкай вобласці, поспехаў не меў. Сілы абароны працягваюць штурмавыя дзеянні ў раёне на поўдзень ад Бахмута Данецкай вобласці, наносяць ворагу значныя страты ў жывой сіле і тэхніцы, замацоўваюцца на дасягнутых рубяжах», — інфармуе Генштаб.

На мар'інскім кірунку расійцы вялі беспаспяховыя наступальныя дзеянні ў раёне Мар'інкі Данецкай вобласці.«Тут за мінулыя суткі вораг здзейсніў больш за 10 няўдалых спроб выцесніць нашы падраздзяленні з займаных пазіцый. У той жа час на аўдзееўскім і шахцёрскім кірунках сілы абароны ўтрымліваюць ініцыятыву, ціснуць на ворага і крок за крокам адваёўваюць нашу зямлю», — пазначана ў зводцы.

На мелітопальскім кірунку захопнікі вялі беспаспяховыя наступальныя дзеянні ў раёне Рабоцінага Запарожскай вобласці, спрабуючы аднавіць страчаныя пазіцыі. Сілы абароны працягваюць трымаць абарону на занятых рубяжах, наносяць акупацыйным войскам страты ў жывой сіле і тэхніцы, знясільваюць ворага.

На херсонскім кірунку сілы абароны вядуць контрбатарэйную барацьбу, паспяхова знішчаюць склады забеспячэння і наносяць паражэнне у тылах праціўніка.

На северскім і слабажанскім напрамках расійцы працягваюць утрымліваць групоўку войскаў прыкрыцця дзяржаўнай мяжы. Праводзяць актыўную дыверсійную дзейнасць у прыгранічных раёнах з мэтай недапушчэння перакідання ўкраінскіх войскаў на пагрозлівыя напрамкі, нарошчваюць шчыльнасць мінна-выбуховых загарод уздоўж дзяржаўнай мяжы ў Белгародскай вобласці.

У зводцы Генштаб таксама адзначае, што Крэмль працягвае адпраўляць вайскоўцаў з тэрытарыяльных суб'ектаў РФ у часова акупаваныя тэрыторыі Украіны. Так, 15 верасня гэтага года ў часова акупаваны горад Джанкой АР Крым, на мясцовы вайсковы аэрадром, прыбыло блізу 100 вайскоўцаў тэрміновай службы з Кабардзіна-Балкарскай Рэспублікі РФ для ўзмацнення аховы і абароны названага аб'екта.

Украінскія войскі падчас паспяховага наступу на поўдзень ад Бахмута Данецкай вобласці разбілі элітныя часткі расійскіх акупантаў, паведамляе Інстытут вывучэння вайны (ISW). Адзначаецца, што УСУ цалкам знішчылі падраздзяленні 72-й мотастралковай брыгады, 31-й гвардзейскай брыгады ПДВ і 83-й гвардзейскай брыгады ПДВ пры вызваленні Андрэеўкі і Клешчэеўкі.

Гэта пацвярджае, у прыватнасці, заяву камандзіра расійскага батальёна «Усход» Аляксандра Хадакоўскага аб гібелі камандзіра 31 брыгады ПДВ. Як адзначаецца, 72-я мотастралковая брыгада, хутчэй за ўсё, аказалася неэфектыўнай у баі, хоць яе дакладныя страты застаюцца няяснымі.

Гэтыя падраздзяленні ПДВ удзельнічалі ў контратаках і спробах спыніць наступальную аперацыю Сіл абароны Украіны. Верагодна, расійцы панеслі вялікія страты. Калі нядаўні наступ УСУ на поўдзень ад Бахмута прывёў да знішчэння баяздольнасці 31-й і 83-й брыгад ПДВ, то камандаванне РФ, хутчэй за ўсё, будзе пераразмяркоўваць элементы іншага адносна элітнага злучэння для падтрымкі крытычных элементаў сваёй абароны на поўдзень ад Бахмута.