572-гі дзень вайны: Украіна вызваліла Кляшчэеўку, расійскія войскі — у цяжкай сітуацыі

Вызваленне Андрэеўкі і Кляшчэеўкі, якое адбылося на працягу апошніх дзён, ставіць Бахмут, які з такой цяжкасцю ўзялі расійцы, пад пагрозу акружэння. Складаная сітуацыя з украінскім контрнаступам вымушае Расію выкарыстоўваць «элітныя» падраздзяленні як «пушачнае мяса».

УСУ вызваляе Украіну па ўсіх напрамках

Генеральны штаб УСУ, як звычайна, сціпла паведамляе, што ўкраінскія вайскоўцы «працягваюць вядзенне абароны на ўсходзе і поўдні Украіны і наступаюць на мелітопальскім і бахмуцкім кірунках. За мінулыя суткі адбылося больш за 35 баявых сутыкненняў».

Намесніца міністра абароны Ганна Маляр у эфіры тэлемарафону адзначыла, што сілы абароны Украіны з пачатку наступу на асноўным кірунку, паўднёвым, ужо вызвалілі 260 квадратных кіламетраў тэрыторыі. «Наш асноўны кірунак наступу — поўдзень... Па ўсім поўдні вораг знаходзіцца ў абароне. І запарожскі, і херсонскі кірунак — там вораг абараняецца», — сказала яна.

Інстытут вывучэння вайны (ISW) адзначае, што 17 верасня ўкраінскія войскі вызвалілі Кляшчэеўку (7 км на паўднёвы захад ад Бахмута) і наступалі ў іншых месцах на гэтым кірунку. Расійскія «ваенкары» адмаўлялі, што ўкраінскія сілы вызвалілі Кляшчэеўку, і сцвярджалі, што УСУ нібыта кантралююць толькі паўднёвую і цэнтральную часткі населенага пункта. На кадрах, апублікаваных 17 верасня, відаць, як украінскія войскі абстрэльваюць расійскія сілы ў ваколіцах Кляшчэеўкі і вымушаюць іх адступіць.

Кіраўнік прэс-службы Усходняй групоўкі войскаў Украіны капітан Ілля Еўлаш пацвердзіў вызваленне Кляшчэеўкі. «Гэта адбылося дзякуючы намаганням 80-й асобнай дэсантна-штурмавой брыгады, 5-й асобнай штурмавой брыгады і аб'яднанай брыгады Нацпаліцыі «Люць», — сказаў ён. Аб'яднаная штурмавая брыгада Нацпаліцыі «Люць» апублікавала відэа з Кляшчэеўкі і таксама пацвердзіла вызваленне населенага пункта.

У зоне адказнасці АСУВ «Поўнач» на валынскім і палескім напрамках (з боку Беларусі) аператыўная абстаноўка застаецца без істотных змен.

Андрэеўка і Кляшчэеўка — чаму гэта важна

Кантроль над Кляшчэеўкай і Андрэеўкай дазваляе УСУ працягваць аперацыю, накіраваную на атачэнне Бахмута, паколькі гэта набліжае блакіраванне лагістычных шляхоў у Бахмут з паўднёвага кірунку. «Кляшчэеўка і Андрэеўка — усё. Гэта сцяг Бахмута, калі што», — пісаў расійскі тэлеграм-канал «Трынаццаты».

Яшчэ 25 ліпеня афіцыйны прадстаўнік усходняй групоўкі УСУ Сяргей Чараваты казаў, што магчымае вызваленне Андрэеўкі палепшыць тактычнае становішча ўкраінскіх сіл і дазволіць акружыць Бахмут ці выцесніць з яго расійскую армію.

Аднак, як адзначае ўкраінскі OSINT-праект «Deep State», хоць украінскія вайскоўцы паспяхова адразаюць шляхі да Бахмута з поўдня (дзе знаходзяцца Андрэеўка і Кляшчэеўка), горад па-ранейшаму можа забяспечвацца з поўначы. «СМІ распаўсюджвалі некампетэнтныя загалоўкі аб «атачэнні Бахмута». Але гэтага няма і блізка», — пішуць аўтары праекта.

Тым не менш, непасрэдна на ўскраінах Кляшчэеўкі ёсць высокія ўзгоркі, якія дазваляюць фактычна кантраляваць не толькі сам Бахмут, які знаходзіцца ў нізіне, але і аўтадарогу на Горлаўку, якая праходзіць за чатыры кіламетры на ўсход. Гэта важны шлях забеспячэння расійскага гарнізона. Калі яго перарэзаць, застаецца толькі дарога з Бахмута ў Папасную, а таксама шлях у Лісічанск, які, праўда, стаў небяспечным, паколькі УСУ ўшчыльную наблізіліся і да гэтай трасы з поўначы.

Акрамя таго, каля Кляшчэеўкі праходзіць чыгунка да Горлаўкі і далей — да Данецкак. Менавіта за гэты чыгуначны насып зараз адышлі расіяне пасля страты сваіх пазіцый.

Масіраваная атака на Украіну — адбіта

У ноч на панядзелак, 18 верасня, расійскія войскі атакавалі Украіну дронамі-камікадзэ і трыма тыпамі ракет — Х-101, Х-555 і Х-55. Як распавялі ў паветраных сілах, «шахеды» ляцелі з двух кірункаў — Прыморск-Ахтарск (Расія) і мыс Чаўда (Крым). А пускі крылатых ракет са стратэгічных бамбавікоў Ту-95МС акупанты здзейснілі з Валгаградскай вобласці.

«Усяго зафіксаваны 24 ударныя БпЛА, у напрамку Мікалаеўскай і Адэскай абласцей. Прыцягнуты восем бартоў, зафіксаваны пускі 17 крылатых ракет тыпу Х-101/Х-555/Х-55», — дадалі вайскоўцы. Паводле звестак ВПС Украіны, супрацьпаветранай абаронай па маршруце руху былі знішчаны 18 ударных дронаў і ўсе 17 ракет.

Кіраўнік Адэскай АВА Алег Кіпер паведаміў, што зафіксавана траплянне ў рэкрэацыйную інфраструктуру Вілкаўскай абшчыны. Узнік пажар, які аператыўна ліквідаваны, пацярпелых няма.

Абломкі збітага БПЛА пацягнулі ўзгаранне двухпавярховага будынка, які не эксплуатуецца, у Снігірэўскай абшчыне Мікалаеўскай вобласці. Людзі не пацярпелі.

Намеснік кіраўніка Хмяльніцкай АВА Сяргей Цюрын заявіў, што ў выніку збіцця ракет выбуховай хваляй пашкоджаны дахі і вокны ў некалькіх дамах, адбылося падзенне абломкаў і два выбухі на тэрыторыі вытворчага прадпрыемства. Пажары патушаны, пацярпелых няма.

Начальнік Галоўнага ўпраўлення разведкі Міністэрства абароны Украіны Кірыл Буданаў у інтэрв'ю «The Economist» заявіў, што Украіна рыхтуецца супрацьстаяць магчымым ударам акупантаў па энергетычнай інфраструктуры восенню. Па словах Буданава, Украіна працуе над спецыяльнай кампаніяй стрымлівання і адплаты, каб супрацьстаяць магчымым ударам акупантаў па энергетычных аб'ектах увосень і зімой.

Аналітыка вайны. Дэсантнікаў выкарыстоўваюць як пяхоту

Міністэрства абароны Вялікабрытаніі ў Twitter піша, што за апошнія два тыдні Расія, верагодна, дадаткова ўзмацніла 58-ю агульнавайсковую армію, якая знаходзіцца ў цяжкім становішчы, дадатковымі паветрана-дэсантнымі часткамі ПДВ на арэхаўскім кірунку ў Запарожскай вобласці.

Як адзначаецца ў зводцы, па меншай меры пяць палкоў ПДВ, набраных з 7-й і 76-й дывізій, верагодна, цяпер сканцэнтраваны ў зоне некалькіх кіламетраў ад прыфрантавой вёскі Рабоціна.

Паводле звестак брытанскай выведкі, у поўным складзе такія сілы павінны налічваць блізу 10 тысяч элітных дэсантнікаў. Аднак амаль усе падраздзяленні, хутчэй за ўсё, знаходзяцца ў крытычным стане.

«Бягучая сітуацыя, верагодна, будзе ўспрынята кіраўніцтвам ПДВ як вельмі нездавальняючая. На працягу ўсёй вайны расійскае камандаванне імкнулася адрадзіць Паветрана-дэсантныя войскі як высокамабільную ўдарную сілу для наступальных аперацый. І зноў іх выкарыстоўваюць у якасці лінейнай пяхоты для папаўнення выматаных сухапутных сіл», — адзначаюць у Мінабароны Брытаніі.

Галоўнае ўпраўленне разведкі Украіны (ГУР) паведаміла, што кіраўнік Чачні Рамзан Кадыраў знаходзіцца ў вельмі цяжкім стане, што выклікала адпаведныя чуткі сярод расійскіх мілблогераў і інсайдарскіх крыніц. Кадыраў не з'яўляўся ў сацсетках два тыдні і апублікаваў відэа толькі 17 верасня, на якім ён прамаўляе абстрактны тэкст, кажа, што слухае Каран і прайшоў пару кіламетраў.

Інстытут вывучэння вайны (ISW) адзначае, што працяглая занепакоенасць з нагоды здароўя Кадырава ў расійскай інфармацыйнай прасторы падкрэслівае залежнасць Пуціна ад Кадырава ў пытанні захавання стабільнасці ў рэгіёне.

На думку экспертаў, дэстабілізацыя кіравання Кадырава ў Чачні стане сур'ёзным ударам па рэжыме Пуціна, збольшага праз тое, наколькі важным для ранняй папулярнасці Пуціна ў Расіі было ўсталяванне стабільнасці ў Чачні праз жорсткую і крывавую вайну.

Аналітыкі адзначаюць, што Пуціну без Кадырава, верагодна, будзе цяжка забяспечыць стабільнасць у Чачні. Афіцыйным асобам у РФ варта быць занепакоенымі тым, што інфармацыя пра хваробу Кадырава можа паўплываць на доўгатэрміновую стабільнасць кантролю ўлад РФ над Чачэніяй.