Расія павялічыла колькасць атак ва Украіне — але без істотнага выніку
Расія ўзмацніла ціск на Украіну на фронце і праз маштабныя паветраныя ўдары — відавочна, гэта робіцца для таго, каб узмацніць сваю пазіцыю перад чаканымі перамовамі па «мірным плане Трампа». Аднак пра вынікі такога ўзмацнення даводзіцца хлусіць, бо іх няма. Ідуць 1375-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
Цягам мінулых сутак ва Украіне зафіксавана 311 баявых сутыкненняў, паведаміў Генштаб УСУ ў ранішняй зводцы 29 лістапада.
На Пакроўскім кірунку абаронцы Украіны спынілі 82 штурмы расіян ў раёнах Фёдараўкі, Радзінскага, Бяліцкага, Новага Шахава, Шахава, Новаэканамічнага, Мірнаграда, Грышынава, Зверава, Котліна, Удачнага, Маладзецкага і іншых.
На Аляксандраўскім кірунку расійцы здзейснілі 56 атак у раёнах Ялты, Талстога, Іванаўкі, Андрэеўкі-Кляўцова, Аляксандраграда, Сасноўкі, Стэпавага, Вербава і іншых.
На Канстанцінаўскім кірунку расіяне 31 атакавалі ў раёнах Канстанцінаўкі, Аляксандра-Шульціна, Плешчыеўкі, Сцяпанаўкі, Русінага Яру, Сафіеўкі.
На Ліманскім кірунку расійцы здзейснілі 38 атак каля Грэкаўкі, Вольгаўкі, Цвердахлебавага, Шыйкоўкі, Дружалюбаўкі, Сярэдняга, Карпаўкі, Дробышавага, Навасёлаўкі, Каровінага Яру, і іншых.
На Славянскім і Гуляйпольскім кірунках зафіксавана па 17 боесутыкненняў на кожным.
На Купянскім і Арэхаўскім кірунках адбылося па 11 баёў на кожным.
На Паўднёва-Слабажанскім кірунку армія РФ 10 разоў атакавала пазіцыі УСУ ў раёнах Ваўчанска, Сінельнікавага, Ліману.
* * *
Галоўнакамандуючы УСУ Аляксандр Сырскі наведаў Харкаўскую вобласць і азнаёміўся з аператыўнай абстаноўкай на Купянскім кірунку. Ён заяўляе, што ў Купянску працягваецца выяўленне расійскіх вайскоўцаў, якія «інфільтраваліся праз нашы баявыя парадкі».
«Маштабы хлусні расійскага кіраўніцтва аб сітуацыі ў Купянску ўражваюць. Праўда заключаецца ў тым, што ў наступныя дні пасля іх заяў у горадзе фіксавалася менш за 40 расійскіх абанентаў радыёабмену. На подступах да Купянска нашыя падраздзяленні ўтрымліваюць рубяжы, узмацняюць агнявое ўздзеянне на ворага з мэтай блакавання яго шляхоў забеспячэння», — напісаў Сырскі ў сацсетках.
Нагадаем, Уладзімір Пуцін заявіў, што расійскія войскі нібыта цалкам захапілі Купянск.
* * *
У ноч на 29 лістапада ў выніку масіраванай атакі расійскіх войскаў ракетамі і дронамі па Кіеўскай вобласці зафіксаваны разбурэнні ў пяці раёнах рэгіёна, горад Фастаў застаўся без святла.
У некалькіх раёнах Кіева зафіксавана пашкоджанне жылых дамоў. Адзін чалавек загінуў, яшчэ 15 атрымалі раненні, сярод іх дзіця. Абясточана заходняя частка сталіцы.
У выніку начнога расійскага абстрэлу ў Браварах пашкоджаны шматпавярховы дом. Зафіксавана як мінімум трое параненых, сярод якіх адзін чалавек шпіталізаваны.
Горад Славуціч Кіеўскай вобласці цалкам абясточаны ў выніку абстрэлу РФ.
У ноч на суботу, 29 лістапада, у Краснадарскім краі Расіі прагучалі выбухі, якія сталі вынікам атакі дронаў. Беспілотнікі нанеслі ўдар па Афіпскім нафтаперапрацоўчым заводзе, у выніку чаго на прадпрыемстве ўзнік маштабны пажар, паведамляюць маніторынгавыя крыніцы.
У Татарстане (Расія) загарэўся склад акумулятараў у асаблівай эканамічнай зоне Алабуга, дзе сярод іншага вырабляюць «шахеды». Спачатку паведамлялася, што агонь ахапіў 1000 кв.м, затым плошча пажару павялічылася да 5000 кв.м. Адзначаецца, што самастойна эвакуіраваліся больш за 300 чалавек.
Аб атацы дронаў на гэты аб'ект не паведамлялася.
* * *
У паветранай прасторы Рэспублікі Малдова ў ноч на 29 лістапада зафіксаваны два дроны, якія перасеклі мяжу з Украінай, што прывяло да часовага прыпынення авіязносін і ўзмоцненага кантролю.
* * *
* * *
Прэзідэнт Украіны Уладзімір Зяленскі вызваліў ад пасады кіраўніка Офіса прэзідэнта Андрэя Ярмака, у якога прайшлі ператрусы па карупцыйнай справе. Ярмак прадстаўляў Украіну ў перамовах з ЗША.
«Я ўдзячны Андрэю за тое, што ўкраінская пазіцыя ў перагаворным трэку заўсёды была прадстаўлена так, як павінна быць. Заўсёды гэта была патрыятычная пазіцыя. Але я хачу, каб не было чутак і спекуляцый», — адзначыў прэзідэнт Украіны ў сваім звароце.
Цяпер, па словах Зяленскага, у перамовах будуць удзельнічаць начальнік Генеральнага штаба Андрэй Гнатаў, сакратар РНБА Рустэм Умераў, прадстаўнікі Міністэрства замежных спраў і разведкі. Яны ўжо адправіліся ў Злучаныя Штаты для перамоваў з прадстаўнікамі каманды прэзідэнта Дональда Трампа. Асноўнай тэмай абмеркаванняў стане прапанаваны адміністрацыяй Трампа мірны план.
Ужо былы кіраўнік Офіса прэзідэнта Украіны Андрэй Ярмак заявіў, што адпраўляецца на фронт. «Мяне зняславілі, і мой гонар не абаранілі, нягледзячы на тое, што я знаходжуся ў Кіеве з 24 лютага 2022 года. Я не хачу ствараць праблем для Зяленскага — я адпраўляюся на фронт. Магчыма, мы яшчэ ўбачымся», — напісаў ён у сацсетках.
* * *
Германія рыхтуецца зацвердзіць буйны пакет ваенных закупак, які ўключае кантракты на зброю, тэхніку і сучасныя тэхналогіі, піша Bloomberg.
Нямецкі парламент на наступным тыдні плануе разгледзець і ўхваліць выдзяленне 2,9 млрд еўра на рэалізацыю 11 кантрактаў, звязаных з мадэрнізацыяй узбраення. У запыце Міністэрства абароны ўказана купля да 250 тыс. штурмавых вінтовак G95 вытворчасці Heckler & Koch на суму 765 млн еўра, а таксама серыя дагавораў па беспілотніках, ракетах і дадатковым аснашчэнні для арміі.
Кіраўніцтва Германіі падкрэслівае, што краіна мае намер сфармаваць найбуйнейшую ў Еўропе армію сярод краін NATO, абапіраючыся на інвестыцыі ў новыя тэхналогіі, сістэмы назірання і ўзбраенне.
Сярод магчымых выканаўцаў выдзелены Rheinmetall, Heckler & Koch, Daimler Benz, а таксама стартапы Quantum Systems і Helsing, якія актыўна развіваюць беспілотныя платформы.
* * *
Расія зацвердзіла федэральны бюджэт на 2026–2028 гады, і ўсе тры гады дакумент захоўвае дэфіцыт пры рэзкім павелічэнні выдаткаў на ваенны сектар.
У 2026 годзе запланаваны даходы 40,3 трлн рублёў пры расходах 44 трлн рублёў, у 2027 годзе — 42,9 трлн рублёў пры расходах 46,1 трлн рублёў, у 2028 годзе — 45,9 трлн рублёў пры расходах 49,4 трлн руб.
Ключавым элементам бюджэту застаецца фінансаванне абароны і сілавых структур. На 2026 год прадугледжана 12,93 трлн рублёў на ваенныя патрэбы, а з улікам выдаткаў на бяспеку і праваахоўную дзейнасць сума дасягае 16,84 трлн руб.
Гэта значна больш за сацыяльныя выдаткі. На сацыяльныя праграмы накіроўваюць 10,8 трлн рублёў, што амаль у паўтары разы менш, чым агульны аб'ём тратаў на армію, бяспеку і правапарадак.