646-ты дзень вайны: асноўнае на гэты час

За 11 месяцаў 2023 года ў выніку расійскіх абстрэлаў загінулі 2000 украінцаў, яшчэ 11 тысяч пацярпелі, паведаміў кіраўнік МУС Украіны Ігар Кліменка падчас сустрэчы з амбасадарамі краін G7. 

За гэты перыяд (са студзеня да канца лістапада 2023 года) расіяне 59 тысяч разоў абстралялі населеныя пункты ў 24 рэгіёнах Украіны. Больш за ўсё абстрэлаў — у Запарожскай, Херонской, Данецкай, Харкаўскай, Сумскай і Чарнігаўскай абласцях. Украінскія праваахоўнікі задакументавалі амаль 101 тысячу ваенных злачынстваў, сярод якіх абстрэлы, здзекі з мірнага насельніцтва, дэпартацыя, незаконнае пазбаўленне волі.

Яшчэ адзін выбух на БАМе

На Байкала-Амурскай чыгуначнай магістралі выбухнуў яшчэ адзін цягнік з палівам. Як паведамляюць украінскія СМІ са спасылкай на крыніцы ў СБУ, гэты падрыў стаў другім этапам спецаперацыі па вывядзенні са строю чыгуначнай магістралі, якую расіяне выкарыстоўваюць у тым ліку для ваеннай лагістыкі і паставак узбраення з Азіі.

Першы грузавы цягнік выбухнуў непасрэдна ў Паўночна-Муйскім тунэлі ўчора. 

Для працягу руху расіяне пачалі выкарыстоўваць аб'язную дарогу, якая праходзіць праз Чортаў мост. Менавіта на гэта і разлічвала СБУ: пры праездзе цягніка па гэтым мосце спрацавалі закладзеныя ў яго выбуховыя прылады. Расійскія паблікі пішуць, што пры выбуху загарэлася шэсць цыстэрнаў з гаручай вадкасцю.

645-ты дзень вайны: СБУ ўзарвала стратэгічную чыгунку ў Расіі, што вядзе ў Кітай

Кіеў будзе плаціць 30 тысяч грыўняў кожнаму мабілізаванаму

Пра паведаміў мэр украінскай сталіцы Віталь Клічко. Грошы будуць вылучацца з гарадскога бюджэту — адпаведнае рашэнне павінна на найбліжэйшым пасяджэнні зацвердзіць Кіеўская рада. 

Раней на гэтым тыдні Адэскі гарсавет абвясціў, што будзе плаціць кожнаму мабілізаванаму адэсіту па 20 тысяч грыўняў.

Зяленскі: мы не дамагліся жаданых вынікаў контрнаступлення

Зяленскі ў інтэрв'ю Associated Press прызнаў, што Украіна не дамаглася жаданых вынікаў падчас летняга контрнаступлення: «Мы хацелі атрымаць больш хуткія вынікі. З гэтага пункту гледжання, на жаль, мы не дамагліся жаданых вынікаў. І гэта факт... Не хапае сіл, каб хутчэй дасягнуць жаданых вынікаў. Але гэта не значыць, што мы павінны здацца, што мы павінны капітуляваць. Мы ўпэўненыя ў сваіх дзеяннях. Мы змагаемся за тое, што належыць нам... У нас новая фаза вайны, і гэта факт. Зіма ў цэлым — гэта новы этап вайны».

• Таксама Зяленскі сцвярджае, што вайна Ізраіля ўжо скараціла пастаўкі дапамогі Украіне, таму прыярытэт цяпер — вытворчасць уласнай зброі. На ягоную думку, «нішто не палохае Расію больш, чым самадастатковая ў вайсковых адносінах Украіна».
• Украіна ў наступным годзе «ў некалькі разоў» павялічыць вытворчасць ракет, боепрыпасаў, узбраення і вайсковай тэхнікі, паведаміла Мінабароны краіны. Галоўная ўвага будзе надавацца вытворчасці сродкаў СПА — ад звычайных пераносных зенітна-ракетных комплексаў да сістэм СПА з далёкасцю больш за 100 км (такіх, як ЗРК “Карал”). Акрамя таго, у бюджэце Украіны на 2024 год каля 175 млрд грыўняў прадугледжана на закупку ракет і боепрыпасаў.

РФ выкарыстоўвае ў сваіх беспілотніках украінскія SIM-карты?

OSINT-следчыя паведамляюць са спасылкай на аналіз фатаграфій абломкаў дронаў, што расіяне выкарыстоўваюць украінскія SIM-карты для кіравання дронамі Shahed. 

У прыватнасці, у адным са збітых расійскіх дронаў былі батарэя, мадэм і SIM-карта мабільнага аператара Кіевстар. 

SIM-карта дазваляе расійскім сілам выкарыстоўваць мабільную сетку для адсочвання месцазнаходжання беспілотніка і змены траекторыі яго палёту. 

У Кіевстар заявілі, што супрацоўнічаюць з праваахоўнымі органамі, каб такіх інцыдэнтаў не ўзнікала.

Шторм дапамог

Расійская абарона Крымскага моста моцна пацярпела ў выніку шторму. Большасць барж перад ім з боку Чорнага мора змыла або затапіла, паведамляе OSINT-аналітык MT_Anderson са спасылкай на спадарожнікавыя здымкі. 

Так, каля моста тры баржы затопленыя і адна часткова затопленая, дзве баржы цалкам змыла вадой. Яшчэ адна баржа застаецца на плаву, але яна ні да чаго не прывязаная.

Шторм моцна пашкодзіў абарону Керчанскага моста: спадарожнікавыя здымкі

Орбан супраць Украіны

Орбан прапануе не выносіць пытанне аб уступленні Украіны ў ЕС на парадак дня саміту ў снежні, таму што «загадзя зразумела, што згоды сярод краін не будзе». 

Таксама венгерскі прэм'ер паведаміў, што прапанаваў ЕС спачатку заключыць з Украінай дамову аб «стратэгічным партнёрстве», а да размовы аб уступленні вярнуцца праз 5-10 гадоў.

Навіны вайны

• Ноччу супрацьпаветраная абарона знішчыла 18 з 25 ударных БПЛА тыпу Shahed і адну з двух кіраваных авіяцыйных ракет Х-59, паведаміла камандаванне паветраных сіл Украіны. Дроны былі запушчаныя з двух кірункаў — мыс Чауда ў Крыме і Прыморска-Ахтарск, а ракеты — з паветранай прасторы акупаванай Херсоншчыны. Асноўны напрамак удару — паўднёвыя і ўсходнія рэгіёны Украіны. Супрацьпаветраная абарона працавала ў Мікалаеўскай, Херсонскай, Запарожскай і Днепрапятроўскай абласцях.
• У выніку начной атакі дронамі ў Баштанскім раёне Мікалаеўскай вобласці на аграпрадпрыемствах пашкоджаны складскі будынак, ангар, сельскагаспадарчая тэхніка. Людзі не пацярпелі, паведаміў кіраўнік АВА Віталь Кім. СПА ў вобласці знішчыла сем варожых БПЛА тыпу Shahed-131/136.
• Уначы расіяне нанеслі ракетны ўдар па Крывым Рогу. Наступствы атакі ўдакладняюцца, людзі не пацярпелі, паведаміў кіраўнік Днепрапятроўскай вобласці Сяргей Лысак.

Украінскі Генштаб агучыў арыенціровачныя страты РФ паводле стану на раніцу 1 снежня: асабовага складу — каля 330 040 (+1280 за мінулыя суткі) чалавек, танкаў — 5564 (+13), баявых браніраваных машын — 10 372 (+32), артылерыйскіх сістэм —  7931 (+22), БПЛА аператыўна-тактычнага ўзроўню — 5976 (+22).

• За мінулыя суткі на фронце адбылося 82 баявыя сутыкненні, паведаміў украінскі Генштаб у ранішняй зводцы. У прыватнасці, Сілы абароны Украіны адбілі 24 атакі арміі РФ на Бахмуцкім кірунку (паблізу Багданаўкі, Андрэеўкі і Кляшчэеўкі Данецкай вобласці) і 20 нападаў — на Аўдзееўскім (каля Стэпавага, Новакалінава, Аўдзееўкі, Тоненькага, Паўночнага, Першамайскага Данецкай вобласці).
• Акрамя таго, на Купянскім кірунку УСУ адбілі атакі РФ каля Сінькоўкі, на паўночны ўсход ад Петрапаўлаўкі Харкаўскай вобласці і Стэльмахоўкі Луганскай вобласці; на Ліманскім — у раёнах Серабранскага лясніцтва Луганскай вобласці і Торскага Данецкай вобласці; на Мар'інскім — у раёнах Мар'інкі і Наваміхайлаўкі Данецкай вобласці; на Запарожскім — каля Рабоціна і на захад ад Вербавага Запарожскай вобласці. На Шахцёрскім кірунку вораг наступальных дзеянняў не вёў.
• У той жа час Сілы абароны Украіны працягваюць наступальную аперацыю на Мелітопальскім кірунку, штурмавыя дзеянні на поўдзень ад Бахмута Данецкай вобласці, а на Херсонскім кірунку ўтрымліваюць занятыя пазіцыі на левабярэжжы Дняпра.

Навіны замежных партнёраў Украіны

• Ці пазбавіцца Захад ад летаргіі?

«Шакавальная адсутнасць стратэгічнага бачання» ў Еўропе дае Пуціну шанец на перамогу, гаворыцца ў матэрыяле The Economist. 

«Захад мог бы зрабіць значна больш, каб расчараваць Пуціна. Калі б ён прыняў рашэнне, то мог бы разгарнуць прамысловыя і фінансавыя рэсурсы, якія значна пераўзыходзяць расійскія. Аднак фаталізм, самаздаволенне і шакавальная адсутнасць стратэгічнага бачання перашкаджаюць, асабліва ў Еўропе. Як дзеля сябе, так і дзеля Украіны, Захад павінен тэрмінова пазбавіцца ад летаргіі», — гаворыцца ў артыкуле.

Расія стварае «дыктатуру ў АБСЕ»

• Саміт АБСЕ ў Скоп'е

Высокапастаўленыя дыпламаты з больш чым 50 краін 30 лістапада сабраліся ў сталіцы Паўночнай Македоніі Скоп'е на саміт АБСЕ. 

Сустрэча найбуйнейшай у свеце групы рэгіянальнай бяспекі была ў значнай ступені была азмрочаная ўдзелам прадстаўнікоў Масквы. Расійскага дыпламата прымусілі доўга ляцець на саміт, не пусцілі на вячэру, а затым зладзілі байкот падчас ягонага выступу. 

• Каардынатар Рады нацбяспекі ЗША Джон Кірбі назваў тры прыярытэты дапамогі Украіне ў зімовы перыяд: узмацненне супрацьпаветранай абароны, забеспячэнне абароны крытычна важных аб'ектаў інфраструктуры, а таксама ўзмацненне ўстойлівасці энергасеткі.

Паводле  korrespondent.net, www.pravda.com.ua, УНІАН