Два батальёны з танкамі «Leopard 2» хутка будуць ва Украіне
Шольц абвясціў аб перадачы танкаў «Leopard 2» Украіне. Плануецца хутка сабраць два батальёны з гэтымі танкамі для ўкраінскай арміі.
Фота з сайта «Нямецкай хвалі»
Улады Германіі нарэшце дазволілі пастаўкі асноўных баявых танкаў «Leopard 2» для патрэб арміі Украіны. Пра такое рашэнне абвясціў канцлер ФРГ Олаф Шольц, паведамляецца на сайце нямецкага ўрада ў сераду, 25 студзеня.
У заяве Шольца гаворыцца, што «гэта вынік інтэнсіўных кансультацый з найбліжэйшымі еўрапейскімі і міжнароднымі партнёрамі Германіі». Акрамя таго, Германія выдасць адпаведныя дазволы на перадачу краінам-партнёрам, якія хочуць хутка паставіць танкі «Leopard 2» са сваіх складоў ва Украіну.
Хутка плануецца сабраць два батальёны з танкамі «Leopard 2» для Украіны. У якасці першага кроку Германія паставіць роту 14 танкаў «Leopard 2 A6» з запасаў Бундэсвера.
«Гэта рашэнне вынікае з нашай вядомай лініі падтрымкі Украіны ў меру нашых магчымасцей. Мы дзейнічаем у цеснай каардынацыі на міжнародным узроўні», — сказаў канцлер на пасяджэнні ўрада ў Берліне.
«Іншыя еўрапейскія партнёры таксама перададуць танкі «Leopard 2». Падрыхтоўка ўкраінскіх экіпажаў павінна хутка пачацца ў Германіі. Акрамя навучання, пакет таксама будзе ўключаць лагістыку, боепрыпасы і тэхнічнае абслугоўванне сістэмы», гаворыцца ў паведамленні.
Выданне «Spiegel» у аўторак, 24 студзеня, адзначыла, што іншыя саюзнікі таксама плануюць паставіць ва Украіну танкі «Leopard 2» з сваіх запасаў. У сувязі з гэтым федэральны ўрад Германіі плануе дазволіць рээкспарт такіх танкаў іншым дзяржавам, у прыватнасці Польшчы.
Нагадаем, як пісаў «НЧ», нямецкія СМІ пачалі пісаць пра згоду Германіі перадаць танкі яшчэ ўчора. А выданне «The Wall Street Journal» паведаміла ў аўторак, 24 студзеня, што Злучаныя Штаты ў сваю чаргу разглядаюць магчымасць пастаўкі сваіх асноўных баявых танкаў «Abrams». Аналагічнае рашэнне пра пастаўку танкаў таксама разглядае і Францыя. Вялікабрытанія таксама ўжо абвясціла аб перадачы УСУ 14 сваіх танкаў «Challenger-2».