Інстытут вывучэння вайны: УСУ рыхтуюцца да сыходу з Бахмута
Узброеныя
Сілы Украіны, імаверна, ствараюць умовы для кантраляванага адводу войскаў з
некаторых раёнаў Бахмута, які расійская армія спрабуе захапіць з траўня 2022
года. Пра гэта ў зводцы за 3 сакавіка пішуць эксперты амерыканскага Інстытута
вывучэння вайны (ISW).
Фота AP
Апошнія фотаздымкі з ахопленага вайной горада пацвярджаюць, што УСУ
разбурылі два важныя масты ў раёне Бахмута — адзін праз раку Бахмутоўка на
паўночным усходзе горада і іншы на трасе да пасёлка Хромава на захад ад
Бахмута. Прэвентыўнае знішчэнне мастоў можа сведчыць менавіта аб тым, што ўкраінскія вайскоўцы разлічваюць перашкодзіць прасоўванню расійскіх акупантаў ва ўсходняй частцы
Бахмута і абмежаваць патэнцыйныя шляхі іх адыходу на захад, адзначаюць
аналітыкі ISW.
Калі ваеннае камандаванне Украіны палічыць неабходным сысці
з Бахмута, то, верагодна, будзе праведзены абмежаваны і кантраляваны адыход з
асабліва складаных сектараў Усходняга Бахмута, мяркуюць эксперты.
Ваенная разведка Вялікабрытаніі ў сваім аглядзе таксама
звяртае ўвагу на разбурэнне двух мастоў у Бахмуце, называючы адзін з іх «жыццёва важным»: ён злучаў горад з апошнім асноўным маршрутам забеспячэння
ў Часовым Яры. Пры гэтым у брытанскім Мінабароны адзначаюць, што УСУ умацоўвае
элітнымі падраздзяленнямі паўночныя ўскраіны Бахмута, якія сталі ўразлівыя для
расійскіх нападаў з трох бакоў.
У ранішняй зводцы ўкраінскага Генштаба за 4 сакавіка
гаворыцца, што расійскія вайскоўцы не пакідаюць спробаў акружыць Бахмут. За
мінулыя суткі, паводле дадзеных УСУ, на бахмуцкім напрамку былі адбітыя шматлікія
расійскія атакі ў раёнах самога Бахмута, а таксама населеных пунктаў Васюкоўка,
Дубава-Васільеўка, Багданаўка і Іванаўскае.
Раней дарадца прэзідэнта Украіны ў эканамічных пытаннях
Аляксандр Раднянскі заявіў, што ўкраінскія вайскоўцы могуць правесці
«стратэгічнае адступленне» з Бахмута.
Паводле «Медузы».