Уладзімір Зяленскі: Адміністрацыя Трампа можа аказаць ціск на Пуціна, каб той пайшоў на дээскалацыю
Дональд Трамп каштоўны для Пуціна, а таму амерыканскі прэзідэнт можа і аказаць ціск на кіраўніка РФ, каб той пайшоў на дээскалацыю і перамовы, лічыць прэзідэнт Украіны Уладзімір Зяленскі. Гэтыя перамовы могуць адбыцца пасля выбараў у Дзярждуму РФ — 20 верасня. Ідуць 1658-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 244 баявых сутыкненні, паведамляе Генштаб УСУ ў ранішняй зводцы 8 верасня.
На Паўднёва-Слабажанскім кірунку ўкраінскія падраздзяленні адбілі 13 атак расіян каля Старыцы, Лімана, Валохаўкі, Чайкаўкі, Хатняга і ў кірунку Пятра-Іванаўкі, Рацькаўкі.
На Канстанцінаўскім кірунку зафіксавана 12 атак паблізу Канстанцінаўкі, Навасёлаўкі, Іллінаўўкі і ў кірунках Аляксеева-Дружкоўкі, Русінага Яру.
На Пакроўскім кірунку расіяне здзейснілі 39 атак у раёнах населеных пунктаў Вадзянскае, Новы Донбас, Біліцкае, Шаўчэнка, Навагрышына, Дабраполле, Мацяшава, Мірнае, Котліна, Навамікалаеўка, Бялякаўка, Сяргееўка, Удачнае, Маладзецкае, Навападгародняе.
На Ліманскім і Гуляйпольскім кірунках расіяне атакавалі па дзевяць разоў на кожным.
* * *
Расія ў ноч на 8 верасня нанесла ракетны ўдар па Кіеве, у выніку чаго былі пашкоджаныя жылыя дамы і навучальная ўстанова. Вядома пра 7 пацярпелых і 2 загінулых.
Расійскія войскі атакавалі беспілотнікамі Барыспальскі і Фастаўскі раёны Кіеўскай вобласці, успыхнулі пажары.
Увечары 7 верасня расійскія войскі атакавалі беспілотнікам шматпавярховы будынак у Харкаве: адзін чалавек пацярпеў.
У ноч на 8 верасня Польшча задзейнічала сваю вайсковую авіяцыю ў сувязі з расійскай атакай на тэрыторыю Украіны.
* * *
* * *
Прэзідэнт Украіны Уладзімір Зяленскі мяркуе, што існуе магчымасць правядзення трохбаковага раўнда перамоў паміж ЗША, Украінай і Расіяй, хоць рашэнне ў гэтым яшчэ не прынятае, паведаміў ён у інтэрв'ю Axios.
«У нас ёсць верасень і кастрычнік, каб знайсці любы спосаб для дыялогу. Без дыялогу ... у нас не будзе выніку. Я думаю, што прэзідэнт Трамп зможа знайсці спосаб, каб пачаць перамоўны працэс яшчэ да наступлення халоднай зімы», — сказаў украінскі прэзідэнт.
Зяленскі адзначыў, што пасланне, якое ён атрымаў ад прадстаўнікоў ЗША Стыва Уіткафа і Джарэда Кушнера, якія прыбылі ва ўкраінскую сталіцу пасля сустрэчы з кіраўніком Крамля Уладзімірам Пуціным у Маскве, заключалася ў тым, што «расійцы гатовыя да перамоў».
Ён, аднак, застаецца скептычным у дачыненні да вынікаў перамоў, паколькі дзеянні РФ на полі бою і нядаўняя эскалацыя атак не сведчаць пра гатоўнасць да кампрамісу.
Але прэзідэнт Украіны адзначыў, што нават калі Пуцін не хоча дээскалацыі, адміністрацыя Трампа можа аказаць на яго ціск, каб ён гэта зрабіў. «У мяне такое адчуванне, што Пуцін мае патрэбу ў Трампе. Ён не хоча ... яго раздражняць», — сказаў Зяленскі.
* * *
Кіраўнік Крамля Уладзімір Пуцін будзе гатовы да новага старту перамоўнага працэсу аб міры ва Украіне пасля заканчэння парламенцкіх выбараў у Расіі 18-20 верасня, паведаміла карэспандэнтка «Еўрапейскай праўды» ў Брусэлі са спасылкай на брыфінг ў Елісейскім палацы.
У адміністрацыі Макрона падкрэсліла, што галоўны пасыл амерыканцаў для Украіны і прадстаўнікоў ЕС палягае ў тым, што пасля выбараў у Дзярждуму РФ ў Крамля з'явіцца новая гатоўнасць весці перамовы, і што ўжо цяпер неабходна пачынаць рыхтавацца да іх пачатку.
У Францыі разлічваюць, што да перамоў, якія будуць весціся ў фармаце Украіна-ЗША-Расія, у той ці іншай ступені будуць прыцягнутыя і краіны ЕС. У адміністрацыі Макрона нагадалі, што французы ў фармаце ЕС ужо ўдзельнічалі ў распрацоўцы шэрагу дакументаў, якія ЗША выкарыстоўвалі падчас перамоў з Расіяй, і гатовыя рабіць гэта і ў далейшым.
У адміністрацыі Макрона таксама адзначылі, што ЗША падтрымліваюць пазіцыю Еўропы адносна працягу санкцыйнага ціску на Расію.
* * *
Краіны, якія валодаюць сістэмамі СПА Patriot, разглядаюць некалькі спосабаў аператыўнай перадачы іх Украіне напярэдадні зімы. У той жа час Францыя сумесна з Італіяй працуе над перадачай Украіне сістэмы SAMP/T і ракет Aster, піша «Укрінформ» са спасылкай на крыніцы ў Елісейскім палацы.
«Гэтае пытанне цяпер абмяркоўваецца. Краіны, якія вырабляюць ці ўжо набылі сістэмы Patriot, разглядаюць некалькі варыянтаў», — паведамілі ў адміністрацыі Макрона.
Аднак там адзначылі, што адных толькі Patriot Кіеву будзе недастаткова, патрэбен больш шырокі набор сродкаў супрацьпаветранай абароны. Таму Парыж сумесна з Італіяй рыхтуецца перадаць Украіне сістэмы SAMP/T разам з ракетамі Aster. Але дакладныя даты пакуль не абвяшчаюцца.
* * *
Расійскія вайскоўцы просяць Крэмль зрушыць тэрміны «захопу Данбаса», паведаміў у Facebook намеснік кіраўніка Офіса прэзідэнта Украіны Павел Паліса.
Паводле яго слоў, Пуцін нядаўна ў 16-ты раз паставіў задачу захапіць Данбас да канца 2026 года. «Палітычнае кіраўніцтва Расіі імкнецца захапіць Данбас да канца 2026 года, а вайскоўцы просяць зрушыць дэдлайн да 31 сакавіка 2027 года», — напісаў Паліса.
Ён дадаў, што ў нядзелю ўкраінскія вайскоўцы абмяркоўвалі са спецпасланнікамі прэзідэнта ЗША Стывам Уіткафам і Джарэдам Кушнерам планы РФ і прычыны, чаму яны гадамі застаюцца на паперы.
«За тыя прасоўвання на фронце, якія маюць расійцы, яны плацяць вялікую цану – сотні салдат забітымі і параненымі за квадратны кіламетр», — канстатаваў намеснік кіраўніка Офіса прэзідэнта Украіны.
* * *
«Веймарскі трыкутнік» — Германія, Францыя і Польшча — маюць намер і далей падтрымліваць Украіну і працаваць над дасягненнем справядлівага і працяглага свету, гаворыцца ў паведамленні МЗС Германіі.
У супольнай дэкларацыі міністры замежных спраў трох краін адзначылі імкненне дасягнуць ўсёабдымнага, справядлівага і працяглага міру для Украіны , які будзе адпавядаць міжнароднаму праву. Яны заявілі пра гатоўнасць уносіць уклад у надзейныя гарантыі бяспекі для Украіны, у прыватнасці ў рамках «кааліцыі рашучых», умацоўваць яе здольнасці да стрымлівання і самаабароне.
У «Веймарскім трыкутніку» заявілі, што працягнуць падтрымліваць Украіну столькі, колькі будзе неабходна. Гаворка ідзе пра ваенную дапамогу, фінансаванне і перадачы прыярытэтнага абсталявання, прамысловых закупках, супрацоўніцтве ў сферы даследаванняў і распрацовак, сумеснай вытворчасці і ўмацаванні еўрапейскай абароннай прамысловасці. Асобна краіны адзначылі фінансавую падтрымку ўкраінскай вытворчасці.
Таксама Германія, Францыя і Польшча гатовыя ўзмацняць ціск на расійскую эканоміку з дапамогай мэтанакіраваных санкцый.