541-шы дзень вайны: Задачы летняга контрнаступлення не дасягнутыя?

Выведка ЗША дапусціла, што войскі Украіны могуць не дасягнуць пастаўленых задач падчас контрнаступлення, якое пачалося ў чэрвені, паведаміла газета The Washington Post. Украінскае камандаванне вырашыла паменшыць страты на поле бою і перайсці да тактыкі прасоўвання наперад невялікімі падраздзяленнямі, нягледзячы на чаканні заходніх саюзнікаў. Гэта прывяло да таго, што летам Кіеў дамогся толькі частковых поспехаў на розных участках фронту.

• Ноччу РФ ударыла па жылым квартале Камышавахі Запарожскай вобласці дзвюма кіраванымі авіябомбамі. Разбураная мясцовая навучальная ўстанова, выбуховай хваляй і абломкамі пашкоджаныя размешчаныя побач жылыя дамы. Людзі не пацярпелі, паведаміў кіраўнік АВА Юрый Малашка.
  
• З Купянскага раёна Харкаўскай вобласці эвакуявалі каля 480 чалавек, у тым ліку амаль 130 дзяцей, паведаміў кіраўнік раённай вайсковай адміністрацыі Андрэй Канашэвіч. Ён удакладніў, што колькасць эвакуяваных можа быць большай, бо некаторыя мясцовыя жыхары выязджаюць самастойна. Пры гэтым у сяле Сінькоўка, якое размешчана практычна на лініі фронту і пастаянна падвяргаецца расійскім нападам, застаюцца шэсць чалавек, якія катэгарычна адмаўляюцца эвакуявацца.
• У Харкаўскай вобласці за мінулыя суткі ў выніку абстрэлу Купянска адзін чалавек загінуў, адзін паранены. 
• У Данецкай вобласці адзін чалавек загінуў (у Багданаўцы), яшчэ двое атрымалі раненні, па даных АВА.

Навіны вайны

Украінскія войскі атакуюць на поўдзень ад Бахмута, замацоўваюцца на дасягнутых рубяжах, паведаміў спікер Генштаба Андрэй Кавалёў.

Украінскі Генштаб агучыў арыенціровачныя страты РФ паводле стану на раніцу 18 жніўня: асабовага складу — каля 256 510 (+460) чалавек .

• За мінулыя суткі на фронце адбылося 33 баявыя сутыкненні, паведаміў Генштаб у ранішняй зводцы. У прыватнасці, на Купянскім кірунку войска РФ вяло беспаспяховыя наступальныя дзеянні ў раёне Сінькоўкі Харкаўскай вобласці, на Ліманскім – у раёне Белагораўкі Луганскай вобласці, на Бахмуцкім — у раёнах Багданаўкі і Белай Гары Данецкай вобласці, на Аўдзееўскім — у раёне населенага пункта керамік Данецкай вобласці.
• На Мар'інскім кірунку УСУ працягваюць стрымліваць наступ расійскіх войскаў у раёнах Мар'інкі і Краснагораўкі Данецкай вобласці. На Шахцёрскім кірунку РФ распачало беспаспяховыя спробы аднавіць страчанае становішча ў раёне Ураджайнага Данецкай вобласці і Новадараўкі Запарожскай вобласці. Сілы абароны Украіны працягваюць наступальную аперацыю на Мелітопальскім і Бярдзянскім напрамках.

• Расіяне сталі часцей падымаць у неба знішчальнік МіГ-31К, праз які ва Украіне абвяшчаюць паветраную трывогу

Пра гэта распавёў спікер паветраных сіл Юрый Ігнат. Паводле яго, яны здзяйсняюць трэніровачныя палёты. Ігнат дадаў, што самалёт у выпадку поўнай запраўкі можа знаходзіцца ў небе паўтары гадзіны, і вораг ведае, што ўвесь гэты час ва Украіне трывога і абмежаваная праца ўстаноў і прадпрыемстваў.

«Авіяцыя, у прыватнасці лётны склад, патрабуе падтрымання пастаянных навыкаў. Гэта ўзлёт і пасадка, выхад на мяжу пуску ракет і гэтак далей. Такія вось тактычныя прыёмы, якія прымяняюцца да гэтага тыпу самалётаў», — растлумачыў Ігнат. Пры гэтым ён дадаў, што пры ўзлёце знішчальніка МіГ-31К паветраныя сілы УСУ павінны рэагаваць, бо нават у выпадку трэніровак гэта не гарантуе, што яны не выпусцяць ракеты Х-47 “Кінжал”.

• Мінабароны РФ заявіла пра новую спробу Украіны атакаваць беспілотнікам Маскву і Маскоўскую вобласць.

Нібыта быў збіты БПЛА, які ўпаў на нежылы будынак у раёне Краснапрэсненскай набярэжнай Масквы, ахвяр і ўзгаранняў няма. Мэр Масквы Сяргей Сабянін паведаміў, што абломкі ўпалі ў зоне Экспацэнтра ў раёне Масква-Сіці, «значных разбурэнняў будынку не нанеслі», пашкоджаны фасад.

Расія абстрэльвае Украіну ракетамі, якія былі выпушчаныя сёлета, піша Bloomberg. Так, нядаўна ў Сумскай вобласці выявілі ракету комплексу “Тарнада”, якая не выбухнула, з датай вытворчасці 19 траўня. Эксперты, якія вывучалі ракету, прыйшлі да высновы, што некаторыя дэталі былі спаяныя ўручную, а кампаненты аказаліся расійскай і амерыканскай вытворчасці.

«Нас ненавідзелі за тое, што мы ўкраінцы». Ваеннапалонныя «Азова» распавялі, як іх катавалі ў расійскай турме

The Washington Post: Амерыканская выведка лічыць, што Украіна не дасягне асноўнай мэты летняга наступу

Амерыканская выведка мяркуе, што Украіна сёлета не зможа дайсці да Мелітопаля і, такім чынам, рэалізаваць галоўную мэту наступу — разарваць наземны калідор Расіі з Крымам, піша The Washington Post са спасылкай уласныя на крыніцы. 

Згодна з гэтым прагнозам, Узброеныя Сілы Украіны праз расійскія лініі абароны не змогуць дайсці да Мелітопаля ў Запарожскай вобласці і тым самым парушыць «сухапутны мост» паміж анексаваным Крымам і іншымі тэрыторыямі Украіны, занятымі расійскімі войскамі. Са слоў суразмоўцаў выдання, украінскія войскі, якія цяпер знаходзяцца за 80 кіламетраў ад Мелітопаля, спыняцца за некалькі кіламетраў ад горада.

Шлях да Мелітопаля надзвычай складаны, і нават захапіць больш блізкія гарады, такія як Такмак, будзе няпроста, сказаў WP ваенны аналітык Роб Лі. 

«У Расіі там тры асноўныя абарончыя лініі, а пасля іх — умацаваныя гарады. Пытанне не толькі ў тым, ці зможа Украіна прарваць адну ці дзве з іх, але і ў тым, ці змогуць яны прарваць усе тры лініі і мець дастаткова сіл для дасягнення чагосьці больш значнага, напрыклад, узяцця Такмака ці чагосьці яшчэ», — сказаў аналітык.

З-за прагнозу амерыканскай выведкі, пра які паведамілі некалькім кангрэсменам, некаторыя рэспубліканцы выступілі супраць таго, каб дадаткова вылучыць на дапамогу Украіне больш за 20 мільярдаў долараў, як просіць прэзідэнт ЗША Джо Байдэн.

У сваю чаргу, іншыя палітыкі папракнулі Адміністрацыю прэзідэнта ЗША ў тым, што Украіна не атрымала больш магутнай зброі. Аднак высокапастаўлены прадстаўнік Белага дома падкрэсліў У размове з WP, што няма ніякіх доказаў, што амерыканскія знішчальнікі F-16 і дальнабойныя ракеты ATACMS, якія просіць Кіеў, «сталі б панацэяй».

Як адзначае The Washington Post, новая ацэнка выведкі ЗША ўзгадняецца з сакрэтным прагнозам амерыканскіх уладаў ад лютага 2023 года. У ім гаварылася, што УСУ ў ходзе контрнаступлення «не дасягнулі» мэты, пастаўленай Украінай, і не змогуць вызваліць Мелітопаль або Марыупаль, каб разбурыць «сухапутны мост» у Крым да жніўня. Такая ацэнка была ў сакрэтных дакументах Пентагона і разведкі, якія выцяклі на Discord.

Пры гэтым крыніца Washington Post падкрэсліла, што ў любым выпадку ўкраінскае контрнаступленне аслабіла расійскія войскі: «Расіяне знаходзяцца ў даволі цяжкім стане. Яны панеслі велізарныя страты. Іх маральны дух не вельмі высокі».

«Людзі ідуць ва УСУ помсціць»: Паплечнік Гіркіна пра «вызваленне» Данбаса

• Кітай за мір — і супраць паставак зброі Украіне

Намеснік пастаяннага прадстаўніка Кітая ў ААН Гэн Шуан заявіў на пасяджэнні Савета Бяспекі, што пастаўкі зброі Кіеву зацягваюць вайну, і заклікаў да мірных перамоваў: «Кітай не раз заяўляў аб сваёй пазіцыі, выказваў заклапочанасць і непакой з нагоды сур'ёзных наступстваў бесперапынных паставак зброі на поле бою. Пабочнае ўздзеянне гэтага працягвае ўзмацняцца, у выніку надзея на спыненне агню становіцца яшчэ больш прывіднай».

Эксперт: Кітай можа быць зацікаўлены ў вайне, бо яна знясільвае Захад

Навіны заходніх партнёраў Украіны

• Кіраўнік дацкага МЗС Ларс Леке Расмусэн пацвердзіў, што ЗША ўхвалілі пастаўку знішчальнікаў F-16 ва Украіну. Пры гэтым, па яго словах, яшчэ не прынята канчатковае рашэнне аб тым, калі самалёты паступяць ва Украіну.
• Першы карабель, які скарысталася ўкраінскім калідорам, прыбыў у Стамбул, паведамляе Reuters. Кантэйнеравоз Joseph Schulte знаходзіўся ў Адэскім порце з 23 лютага 2022 года.
• ЗША ўхвалілі адпраўку Украіне знішчальнікаў F-16 з Даніі і Нідэрландаў адразу пасля заканчэння навучання пілотаў, паведамляе Reuters са спасылкай на неназванага афіцыйнага прадстаўніка Вашынгтона.
• Перамогай ва Украіне будзе поўны вывад расійскіх войскаў з краіны, заявіў намеснік спікера Дзярждэпу ЗША Ведант Патэл.