771-шы дзень вайны: Харкаў пад абстрэламі, ЗАЭС зноў на мяжы блэкаўта

Удзень 4 красавіка  — у 12.42 па ўкраінскім часе — была абвешчана паветраная трывога ў Харкаве і вобласці. 

Харкаў зноў пад абстрэламі

Выбухі прагрымелі і ўдзень пасля абвяшчэння паветранай трывогі. Трывогу абвясцілі і ў некаторых іншых рэгіёнах Украіны — Данецкай, Запарожскай, Днепрапятроўскай, Палтаўскай, Сумскай, Чаркаскай і Кіраваградскай абласцях.

Як адзначыў мэр Харкава Ігар Церахаў, удзень прагучалі два выбухі: «Толькі што пад Харкавам адбыліся два магутныя выбухі. На дадзены момант работы па аднаўленні жылых дамоў, якія пацярпелі ад начных выбухаў, практычна спыненыя», — сказаў ён.

Нагадаем, як пісаў НЧ, уначы 4 красавіка расейскія  войскі з беспілотнікаў «Шахед» атакавалі Харкаў. Некалькі БПЛА пашкодзілі прыватныя і жылыя дамы. Падчас другой атакі загінулі трое ратавальнікаў, якія ўдзельнічалі ў ліквідацыі наступстваў папярэдняга нападу. На дадзены момант вядома аб 12 параненых і 4 забітых у выніку расійскай атакі на Харкаў.

• Усяго было зафіксавана 20 пускаў «шахедаў». СПА збіла 11 з іх. 

З-за абстрэлаў з боку РФ на Запарожскай АЭС адключаная знешняя паветраная лінія

З-за расійскіх абстрэлаў адбылося адключэнне вонкавай паветранай лініі ПЛ-330кВ «Запарожская ЦЭЦ — Ферасплаўная». Праз яе часова акупаваная ЗАЭС атрымлівала электраэнергію ад украінскай энергасістэмы для ўласных патрэб. Цяпер з-за абстрэлаў ЗАЭС засталася працаваць на адной ЛЭП.

Нагадаем, Запарожская АЭС — найбуйнейшая АЭС у Еўропе — была захопленая расійскімі салдатамі на пачатку поўнамаштабнага ўварвання. Інтэрвенты размясцілі баявую тэхніку на тэрыторыі ЗАЭС. За ўвесь перыяд акупацыі станцыю некалькі разоў адключалі ад энергасістэм Украіны.

Наступствы налёту «шахедаў» на Харкаў: гарэлі, шматпавярховікі, сярод загінулых — ратавальнікі

У Харкаве з-за абстрэлу з боку РФ абясточылі ядзерную ўстаноўку «Крыніца нейтронаў»

Ядзерная ўстаноўка «Крыніца нейтронаў» у Харкаве была абясточаная ў чацвер, 4 красавіка. Прычына таму – расійскія абстрэлы.

Нацыянальны навуковы цэнтр «Харкаўскі фізіка-тэхнічны інстытут» паведаміў, што ядзерная падкрытычная ўстаноўка «Крыніцы нейтронаў» страціла вонкавае электразабеспячэнне сёння ў 08:30. Гэтаму папярэднічала варожая атака. Пакуль пагрозы навакольнаму асяроддзю і людзям няма. Сістэма аварыйнага электразабеспячэння працавала ў штатным рэжыме, у работу былі ўключаны аварыйныя дызель-генератары.

Радыяцыйная абстаноўка на пляцоўцы атамнай устаноўкі знаходзіцца ў межах нормы.

Што вядома аб «Крыніцы нейтронаў»

У Харкаве на тэрыторыі Нацыянальнага навуковага цэнтра «Харкаўскі фізіка-тэхнічны інстытут» знаходзіцца адзіная ў свеце навуковая ядзерная падкрытычная ўстаноўка «Крыніца нейтронаў» і сховішча ядзерных матэрыялаў. Гэта субкрытычны рэактар з паскаральнікам, прызначаны для працы ў якасці крыніцы для генерацыі нейтронаў.

Ядзерная ўстаноўка «Крыніца нейтронаў» прызначаная для правядзення навуковых і прыкладных даследаванняў у галіне ядзернай фізікі, радыяцыйнага матэрыялазнаўства, біялогіі, хіміі, а таксама для вытворчасці медыцынскіх радыеізатопаў.

З пачатку поўнамаштабнага ўварвання расіяне неаднаразова абстрэльвалі тэрыторыю «Крыніц нейтронаў».

Вымагальніцтва, пагрозы, страх і здрада: як РФ вярбуе ўкраінскіх шпіёнаў?

Брытанская выведка: Узмацненне абстрэлаў не спрыяе прасоўванню РФ на Новапаўлаўскім кірунку

Брытанская выведка заявіла, што Расея павялічыла колькасць удараў на Новапаўлаўскім кірунку, дзе не прынесла поспеху, але ў цэлым у сакавіку колькасць штурмаў на лініі фронту знізілася, піша »Еўрапейская праўда» са спасылкай на новы агляд разведкі Мінабароны Вялікабрытаніі

Так, колькасць расійскіх абстрэлаў на паўднёвым захадзе Данецка (Новапаўлаўскі кірунак) вырасла з 721 у лютым да 806 у сакавіку, што складае 38% усіх абстрэлаў па ўсёй лініі фронту.

«Нягледзячы на гэтыя намаганні, Расія не дасягнула істотнага прагрэсу ў гэтай сферы і працягвае змагацца за невялікія населеныя пункты, у тым ліку Новаміхайлаўку, Георгіеўку і Уражайнага», — гаворыцца ў аглядзе.

Пры гэтым, адзначаюць брытанскія аналітыкі, справаздачы сведчаць аб тым, што ў сакавіку 2024 года колькасць расійскіх атак праз лінію фронту знізілася на 9% у параўнанні з лютым 2024 года — прыкладна з 2340 да 2120.

Паводле звестак выведкі, у лютым, калі горад перайшоў пад кантроль акупацыйных войскаў, колькасць удараў з боку РФ на Аўдзееўскім накірунку склала траціну ўсіх удараў, але ў сакавіку знізілася да чвэрці.

Навіны вайны

• Амерыканскі інстытут вывучэння вайны (ISW) канстатуе, што расійскія войскі павялічваюць агульны тэмп сваіх наступальных аперацый ва Украіне. У прыватнасці, яны павялічылі колькасць і маштабы механізаваных наземных штурмаў на асобных участках фронту за апошнія два тыдні. Тым часам украінскія крыніцы працягваюць падкрэсліваць, што фрагментарнае і запозненае прыбыццё новых заходніх сістэм дазволіць расійскім войскам адаптавацца і нівеліраваць верагодныя аператыўныя перавагі ад іх, адзначаюць эксперты.
• Украінскі Генштаб агучыў арыенціровачныя страты РФ па стане на раніцу 4 красавіка: асабовага складу — каля 445 040 (+670 за мінулыя суткі) чалавек, танкаў — 7018 (+9), баявых браніраваных машын — 13 386 (+18), артылерыйскіх сістэм  — 11 171 (+29), БПЛА аператыўна-тактычнага ўзроўню  — 8817 (+21), аўтамабільнай тэхнікі і аўтацыстэрнаў  — 14 861 (+48).

За мінулыя суткі на фронце адбылося 65 баявых сутыкненняў, паведаміў Генштаб у ранішняй зводцы. У прыватнасці, войска РФ 22 разы спрабавала прарваць абарону ўкраінскіх войскаў на Новапаўлаўскім кірунку — у раёнах Новаміхайлаўкі, Ураджайнага, на паўднёвы ўсход ад Вадзянога Данецкай вобласці. Яшчэ 15 атак адбіта на Аўдзееўскім кірунку (у раёнах Бердычаў, Уманскага, Яснабрадоўкі, Першамайскага і Невельскага Данецкай вобласці) і 14 атак — на Бахмуцкім (у раёнах Белагораўкі Луганскай вобласці, а таксама Спорнага, Андрэеўкі, на паўднёвы ўсход ад Кляшчэеўкі Данецкай вобласці.

На Купянскім кірунку сілы абароны  Украіны адбілі адну атаку РФ у раёне Андрэеўкі Луганскай вобласці; на Ліманскім — пяць атак у раёне Цернаў Данецкай вобласці; на Херсонскім — сем так на левабярэжжы Дняпра. На Арэхаўскім кірунку на працягу мінулых сутак вораг наступальных дзеянняў не вёў.