«Дэмілітарызацыя». Украіна за год нарасціла выпуск крылатых ракет у восем разоў

План Пуціна па «дэмілітарызацыі» Украіны прывёў да таго, што рост выпуску крылатых ракет ва Украіне стаў васьмікратным, а выпуск дальнабойных дронаў з 2022 года павялічыўся ў 22 (!) разы. Увогуле каля 40% таго, чым цяпер ваюе Украіна — гэта зброя яе вытворчасці. Ідуць 1144-я суткі вайны Расійскай Федэрацыі супраць Украіны пры падтрымцы агрэсіі рэжымам Аляксандра Лукашэнкі.

За мінулыя суткі ва Украіне адбылося 149 баявых сутыкненняў, паведамляе Генштаб УСУ у ранішняй зводцы 12 красавіка.

Па-ранейшаму самым напружаным застаецца Пакроўскі кірунак, —там абаронцы Украіны спынілі 40 штурмавых дзеянняў расіян ў раёнах Калінава, Тарасаўкі, Елізаветаўкі, Пясчанага, Удалага, Успенаўкі, Праабражэнкі і іншых.

На Ліманскім кірунку расіяне атакавалі 25 разоў, спрабуючы рушыць наперад у раёнах Надзеі, Грэкаўкі, Новага, Кацярынаўкі, Ямпалаўкі.

На Тарэцкім кірунку армія РФ здзейсніла 14 нападаў непадалёк Дачнага, Дружбы і Тарэцка.

На Купянскім і Прыдняпроўскімкірунках УСУ адбілі па 7 атак арміі РФ. Па шэсць штурмаў было адбіта на Северскім і Новапаўлаўскім кірунках. Па тры боесутыкненні адбыліся на Краматорскім і Гуляйпольском кірунках.

У Курскай вобласці Расіі УСУ адбілі 21 атаку расіян. Акрамя гэтага, армія РФ нанесла 55 авіяцыйных удараў з ужываннем 90 кіраваных авіябомбаў па сваёй тэрыторыі.

* * *

Расійскія войскі прасунуліся на Купянскім кірунку і ў Данецкай вобласці, паведамляецца ў справаздачы амерыканскага Інстытута вывучэння вайны (ISW).

Геалакацыйныя кадры ад 11 красавіка паказваюць, як расійскія войскі праводзяць атаку пры падтрымцы чатырох бронемашын на поўнач ад Стэпавай Навасёлаўкі (на паўднёвы ўсход ад Купянска). Гэта паказвае на тое, што расійскія войскі нядаўна там прасунуліся.

Таксама геалакацыйныя кадры, апублікаваныя 11 красавіка, паказваюць, што прасоўванне было нядаўна на поўдзень ад Васюкоўкі (на паўднёвы захад ад Северска) Данецкай вобласці.

Расійцы прасунуліся на паўночны ўсход ад Неліпаўкі (на паўночны захад ад Тарэцка) падчас нядаўняга наступу ўздоўж шашы T-0516 Тарэцк — Канстанцінаўка, але пакуль незразумела, ці ўтрымліваюць яны трывалыя пазіцыі ўздоўж шашы. Геалакацыйныя кадры паказваюць, што ўкраінскія войскі наносяць удар па расійскіх машынах, якія ўдзельнічалі ў наступе.

«ISW ацэньвае, што расійскія войскі прасунуліся каля Неліпаўкі як частка расійскага наступу, якое выйшла анамальна далёка наперад асноўнай расійскай лініі — але не тое, што расійскія войскі захоўваюць сталую прысутнасць у гэтым раёне. ISW вызначае расійскі наступ як тэрыторыю, на якой расійскія войскі дзейнічалі або з якой яны пачыналі атакі, але над якой расійскія сілы не ажыццяўляюць кантроль. ІSW удакладніць расійскі выступ на паўночны захад ад Тарэцка па меры паступлення дадатковай інфармацыі», — дадалі ў Інстытуце.

Геалакацыйныя кадры, апублікаваныя 10 красавіка, паказваюць на тое, што расійскія войскі нядаўна прасунуліся на ўсход ад Шаўчэнкі ў раёне Вялікай Навасёлкі.

* * *

У ноч на суботу расійскія войскі запусцілі па Украіне 88 ударных БПЛА тыпу Shahed і іншых тыпаў. Пацверджана збіццё 56 ударных БпЛА, 24 беспілотнікі былі лакацыйна страчаныя (без негатыўных наступстваў), гаворыцца ў паведамленні Паветраных сіл Украіны.

Раніцай 12 красавіка дронамі атакавалі Кіеў. У Святошынскім раёне сталіцы Украіны — трое пацярпелых. Атака прыйшлася на прыватны дом і нежылыя памяшканні.

Таксама расійскія ўдарныя беспілотнікі атакавалі Харкаў. Пацярпеў адзін чалавек — у яго лёгкія раненні.

* * *

* * *

The Telegraph піша пра верагоднасць расійскага наступу ў Сумскай вобласці. На думку экспертаў выдання, такая верагоднасць ёсць, паколькі ўкраінскія войскі адыходзяць у гэты раён пасля наступу ў Курскай вобласці.

Намеснік дырэктара расійскай праграмы Фонду абароны дэмакратыі Джон Хардзі не чакае, што гэты наступ будзе паспяховым. Паводле яго ацэнак, цяпер расійскія аперацыі абмежаваныя па маштабе, і атакі праводзяцца невялікімі штурмавымі групамі. Атакі на ўзроўні роты колькасцю каля 100 салдат рэдкія.

Павелічэнне маштабаў нападаў наўрад ці прывядзе да якіх-небудзь значных вынікаў для расійцаў. «Яны могуць прабіць пралом ва ўкраінскай лініі (абароны — Рэд.), але не здольныя дамагчыся хуткага, аператыўнага, значнага прарыву», — адзначыў Хардзі.

Паводле ацэнак, якія прыводзіць The Telegraph, толькі за апошні год Расія страціла каля 3000 танкаў, 9000 адзінак бронетэхнікі, і не менш за 13 000 артылерыйскіх сістэм. «Калі паглядзець на тое, што засталося на складах, асабліва на тое, што прыдатна да эксплуатацыі, запасы становяцца даволі нізкімі. Я чакаю, што да канца гэтага года ім будзе вельмі цяжка выцягнуць больш, калі не гэта, то яны будуць цалкам знясіленыя», — кажа Хардзі.

* * *

Спецпасланнік прэзідэнта ЗША Стыў Уіткаф правёў амаль пяць гадзін на перамовах за зачыненымі дзвярыма з Уладзімірам Пуціным. Сустрэча прайшла пад заклік Дональда Трампа «паварушыцца» са спыненнем вайны ва Украіне. Падрабязнасці размовы не паведамляюцца, але прэс-сакратар Крамля Дзмітрый Пяскоў заявіў, што не выключана, што пасля сустрэчы можа адбыцца тэлефонная размова паміж Трампам і Пуціным.

* * *

Вялікабрытанія і Францыя на працягу некалькіх тыдняў плануюць прадставіць Дональду Трампу комплексны план пасляваенных «сіл заспакаення» ва Украіне, піша Bloomberg.

Раней міністр абароны Вялікабрытаніі Джон Хілі і яго французскі калега Себасцьен Лекарню заявілі, што на працягу наступных двух тыдняў ваенныя начальнікі хочуць дапрацаваць дэталі таго, як узначаленая Еўропай «кааліцыя рашучых» дапаможа забяспечыць бяспеку паветранай прасторы, узбярэжжа і зямлі Украіны, а таксама аднавіць яе сілы.

Яны спадзяюцца, што гэта прадэманструе, што Еўропа сур'ёзна настроена на вылучэнне ўласных рэсурсаў для пасляваеннай будучыні Украіны, і пераканае прэзідэнта ЗША забяспечыць «абарону» ў выглядзе ваенна-паветраных сіл, нагляду за мяжой і выведкі.

* * *

Міністр стратэгічных галін прамысловасці Украіны Герман Смятанін заявіў, што вытворчасць крылатых ракет ва Украіне вырасла ў восем разоў у 2024 годзе ў параўнанні з папярэднім годам. Як адзначыў Смятанін, калі яшчэ некалькі гадоў таму краіна вырабляла толькі адну мадэль крылатай ракеты – «Няптун», то цяпер Украіна мае «вельмі шмат новых вырабаў, якія забяспечылі павелічэнне аб'ёму вытворчасці ў восем разоў, у параўнанні з 2023 годам».

Прырост вытворчасці дальнабойных дронаў склаў больш чым у два разы ў параўнанні з 2023 годам і ў 22 разы — у параўнанні з 2022-м.усяго за 2024 год ва Украіне было створана 324 новых ўзоры ўзбраення. Летась Украіна вырабіла ўзбраенняў на агульную суму 9 мільярдаў долараў.

Сёння, паводле розных ацэнак, ад 30% да 40% таго, чым ваюе Украіна — зроблена ва Украіне.

* * *

Спецпасланнік прэзідэнта ЗША Дональда Трампа Кіт Келаг у інтэрв'ю The Times заявіў, што Украіна ў рамках мірнага пагаднення можа быць падзеленая «амаль як Берлін пасля Другой сусветнай вайны».

«Можна зрабіць так, каб гэта выглядала як тое, што адбылося з Берлінам пасля Другой сусветнай вайны, калі ў вас была руская зона, французская зона, брытанская зона, зона ЗША», — цытуе Келага The Times.

На яго думку, Украіна з'яўляецца досыць вялікай краінай, каб размясціць войскі, якія імкнуцца забяспечыць захаванне мірнага пагаднення, але самі ЗША не будуць прадастаўляць сваіх вайскоўцаў.

Пасля публікацыі інтэрв'ю Келаг напісаў на сваёй старонцы ў сацсетцы Х, што артыкул скажае яго словы аб магчымым падзеле Украіны. «Гаворачы аб размежаванні, я меў на ўвазе раёны або зоны адказнасці саюзніцкіх сіл, без удзелу амерыканскіх войскаў. Я не меў на ўвазе падзел Украіны», — удакладніў Келаг.