Энергаатам Украіны: расіяне спрабавалі захапіць яшчэ адну АЭС

Расійскія вайскоўцы ўслед за Запарожскай атамнай электрастанцыяй спрабавалі захапіць Паўднёваўкраінскую АЭС, але ўкраінскія вайскоўцы спынілі наступ.

Пра гэта паведаміў выконваючы абавязкі кіраўніка «Энергаатама» Пётр Коцін.

«Была вельмі вялікая пагроза — туды спрабавалі прарвацца, але іх адкінулі, у Вазнясенску іх спынілі. Там былі падарваныя два масты, каб яны не прайшлі. І нашы вайскоўцы прынялі бой і адкінулі за Мікалаеў. У іх нічога не атрымалася. Але яны сапраўды спрабавалі адразу пасля ЗАЭС захапіць Паўднёваўкраінскую», — сказаў ён

Паводле яго слоў, на Паўднёваўкраінскую АЭС улічылі вопыт захопу Запарожскай АЭС, і спынілі расійскія войскі на падыходзе да станцыі. «Гэтага не змаглі зрабіць на ЗАЭС — яны падышлі занадта блізка. Мы да апошняга не верылі, што яны пойдуць на Запарожскую АЭС, пакуль яны не падышлі і не пачалі яе абстрэльваць. Але мы ўсё вернем», —сказаў Коцін.

Паўднёваўкраінская АЭС мае тры блокі па 1 тыс. МВт, па магутнасці такіх жа, як на ЗАЭС. Два блокі працуюць, адзін у рамонце.

Коцін падкрэсліў, што Расія на чале з Пуціным звяртаецца да «ядзернага тэрарызму». «Тое, што адбываецца — захоп мірных атамных аб'ектаў — гэта акт ядзернага тэрарызму. Ніхто ў свеце такога яшчэ не рабіў. Пуцін піша гісторыю, і мярзотную гісторыю. Ён стаў першым дыктатарам, які бамбуе і абстрэльвае мірныя ядзерныя аб'екты, і будзе за гэта адказваць як за акт ядзернага тэрарызму. Ні ў каго няма сумневаў на гэты конт. Гэта меркаванне не толькі маё, але і меркаванне МАГАТЭ, Еўракамісіі, ААН», — заявіў Коцін.

Расійскія войскі захапілі Чарнобыльскую АЭС у першы ж дзень поўнамаштабнай вайны РФ супраць Украіны — 24 лютага, а Запарожскую АЭС — 4 сакавіка. Паўднёваўкраінская АЭС размешчана непадалёк ад горада Паўднёваўкраінск у Мікалаеўскай вобласці.

Ва Украіне знаходзяцца пяць атамных электрастанцый: Запарожская АЭС, Паўднёваўкраінская АЭС, Ровенская АЭС, Хмяльніцкая АЭС, Чарнобыльская АЭС. ЧАЭС не эксплуатуецца.