Венгерскі лаўкостар «Wizz Air» зноў пачаў прадаваць квіткі ў Расію

Хоць «Wizz Air» заявіў аб прыпыненні рэйсаў у Расію, некалькі рэйсаў з Масквы і Санкт-Пецярбурга засталіся дагэтуль.

Венгерскі лаўкостар «Wizz Air», які пасля пачатку вайны ва Украіне абвясціў аб спыненні рэйсаў у Расію, зноў адкрыў продаж квіткоў з Масквы.

На тое, што ў сістэме браніравання авіякампаніі ёсць авіябілеты з расійскай сталіцы ў венгерскія Будапешт і Дэбрэцэн на чэрвень гэтага года і ў Абу-Дабі (ААЭ) на кастрычнік гэтага года, звярнула ўвагу выданне «Новое время».

Паводле інфармацыі на сайце «Wizz Air», у Будапешт рэйсы з маскоўскага аэрапорта «Унукава» будуць выконвацца штодня, а ў Дэбрэцэн — двойчы на тыдзень.

У Абу-Дабі з Масквы «Wizz Air» будзе лётаць чатыры разы на тыдзень.

Афіцыйна авіякампанія «Wizz Air» абвясціла пра поўнае спыненне палётаў у расійскія аэрапорты 8 сакавіка 2022 года. Рашэнне прынята «па эксплуатацыйных прычынах».

Тым не менш, калі перайсці на сэрвіс па адсочванні авіярэйсаў Flightradar24, то можна ўбачыць, што «Wizz Air» да гэтага часу выконвае рэйсы з Масквы ў Будапешт і Абу-Дабі, а таксама з Санкт-Пецярбурга ў Будапешт, хоць новыя квіткі на іх і не прадаюцца.

Пасля пачатку расійскай вайсковай агрэсіі супраць Украіны Еўрасаюз абвясціў пра закрыццё паветранай прасторы для расійскіх і зарэгістраваных у РФ падкантрольных ёй самалётаў.

Адначасова практычна ўсе еўрапейскія авіякампаніі прыпынілі выкананне авіярэйсаў з Расіі ў Еўропу. Выключэнне — сербская дзяржаўная «Air Serbia», якая схлусіла пра поўнае прыпыненне рэйсаў у Расію і ўсё яшчэ выконвае адзінкавыя рэйсы паміж Белградам і Масквой. Як аказалася, рэйсы ў Расію да гэтага часу выконвае і «Wizz Air». Гэта адзіныя авіязносіны з Еўропай, цяпер даступныя расійцам.