«А дзе зароблены сумленнай здрадай законны гешэфт?»

Тэлеграм-канал «Лісты да дачкі» са звыклай для яго іроніяй разважае, якую карысць атрымалі беларускія ўлады, падтрымаўшы ўварванне Расіі ва Украіну. І параўноўвае гэтую сітуацыю з вядомым біблейскім персанажам, што атрымаў 30 срэбранікаў. Дарэчы, персанажу, па меркаванні канала, пашанцавала больш.

І зноў беларускую эканоміку дагналі зіхатлівыя перспектывы. Дагналі альтэрнатыўным марскім портам у Расіі. Вось саюзнік абяцаў ім гэты порт яшчэ ў сакавіку, як кампенсацыю за недаатрыманы партовы тэрмінал у Адэсе. Так і з тых часоў абяцае.

А яшчэ прэм'ер Галоўчанка сказаў, што беларускі ўрад чакае 1,5 мільярды долараў ад Расіі на праграмы саюзнага імпартазамяшчэння. Калі раптам забылася, то гэта тыя 1,5 мільярды, якіх яны пачалі чакаць, зноў жа, у сакавіку. І потым яшчэ некалькі разоў чакалі з вялікім аптымізмам. Вось, цяпер зноў чакаюць.

І гэта пры тым, што па цяперашніх часах, 1,5 мільярды — не такія ўжо казачныя грошы. Можна сказаць, што наогул не грошы, улічваючы панесеныя малодшым саюзнікам страты і звязаныя з імі патрэбы.

І ведаеш, што мне гэта нагадвае? Аднаго гістарычнага персанажа, які праславіўся, і яшчэ зарабіў 30 срэбранікаў. Таксама не ахці якая была сума па тых часах. Але я хачу сказаць, што параўнанне не на карысць беларускіх уладаў. Таму што яму яго 30 срэбранікаў заплацілі адразу. Не прымушаў Сінедрыён складаць інвестыцыйную праграму, а выдаў грошы па факце.

А беларускія ўлады зрабілі для Украіны прыкладна тое ж самае, што гэты персанаж зрабіў для свайго настаўніка. Таксама распавядалі пра брацкую любоў, а потым пусцілі са сваёй зямлі танкі. Але, у адрозненне ад таго персанажа, ім па выніку да гэтага часу нават не заплацілі. І гэта, напэўна, вельмі крыўдна, калі за акт альтэрнатыўнай сумленнасці ты атрымліваеш суцэльныя страты.

Ну, гэта значыць, я маю на ўвазе ... Ну як гэта? Гэта што, атрымліваецца, сам выдаў, сам жа і заплаціў? А дзе, пытаюся, зароблены сумленнай здрадай законны гешэфт, а? Ну там, не сланы з магараджамі, але хоць бы якая капеечка. Ну хоць бы трыццаць срэбранікаў. У пераліку, вядома, на ВУП на душу насельніцтва.

Вось пакуль гешэфт выяўляецца выключна ў адмоўных велічынях. Экспарт у ЕС мінус 30 працэнтаў, эканоміка мінус пяць, экспарт калію за паўгода мінус 50. І адна толькі інфляцыя захоўвае станоўчы аптымізм і прырасла на 18 працэнтаў.

І я ўжо не кажу пра ўсохлую шматвектарнасць. А што пра яе гаварыць? Добрага нічога не скажаш, а дрэннае пра нябожчыкаў казаць не прынята. Вось з інфляцыяй яшчэ можна жыць. А з інфляцыяй і з бягучым міжнародным становішчам, магчыма, што і нядоўга. Вось парламент Латвіі прызнаў Расію краінай — памагатай тэрарызму. І колькі пройдзе часу, пакуль іншыя парламенты не апазнаюць у беларускіх уладах Робіна пры гэтым Бэтмэне?

А тут жа яшчэ беларускі ваенны аэрадром у Зябраўцы падхапіў сіндром разладу курэння. Ну, а што ты сабе хочаш? Калі ўступаеш у бязладныя ваенныя адносіны, то яшчэ і не такое можна падхапіць. І я не ведаю, што яны там паляць, але сабе такога нават не хачу.