Чэмпіёны грамадзянскай супольнасці – 2014



Журналіст года Марат Гаравы

13 студзеня 2015 года. Арт-сядзіба. Уручэнне прэміі "Чэмпіёны грамадзянскай супольнасці"

Вядоўцы папулярных моўных курсаў Аляксей Шэін, Алена Шэрэмет, Валярына Кустава

Каманда Артсядзібы

Атрыманне ўзнагароды за абарону Курапатаў

Стваральнікі сайта nastaunik.info

Музыка Пётр Клюеў у атачэнні вядучых

"Гарбуз году"

Атрыманне прыза ў намінацыі “Гарбуз году”

У намінацыі “Крэатыў году” за акцыю салідарнасці адзначаныы футбольныя фанаты

Сяргей Мацкевіч

1. 
2. 
3. 
4. 
5. 
6. 
7. 
8. 
9. 
10. 
11. 

Прэмія, якую заснавала Асамблея НДА, уручаецца ўжо шосты раз. Пераможцы вызначаліся па выніках супольнага падліку галасоў, пададзеных за намінантаў сябрамі рабочай групы Асамблеі (44 прадстаўнікі арганізацыяў), а таксама 56 запрошанымі экспертамі з ліку лідараў НДА, мінулагодніх пераможцаў прэміі.

“Ідэйнай натхняльніцай гэтай прэміі была Алена Валынец-Чарняева. Я напачатку дастаткова скептычна да гэтага ставіўся. Лічыў, што кожны, хто займаецца грамадскай дзейнасцю, варты таго, каб быць адзначаным. Але потым мы паглядзелі, што ўганараванне добра матывуе надалей займацца грамадскай дзейнасцю і тых, хто атрымаў прэмію, і тых, хто трапіў у намінанты, і ўвогуле тых, хто папрысутнічаў пры ўручэнні. Калі дзяржава нас не стымулюе, нам варта саміх сябе адзначаць”, — у каментары для “НЧ” адзначыў старшыня Асамблеі НДА Cяргей Мацкевіч.

У вітальным слове Cяргей Мацкевіч прапанаваў узгадаць хвілінай маўчання выбітных дзеячаў культуры, сапраўдных сейбітаў беларушчыны, якія сышлі ў 2014 годзе. Кіраўнік Асамблеі НДА таксама адзначыў, што ў 2014 годзе ў грамадстве пашырыўся інтарэс да беларускасці, да нацыянальных каранёў, што дазваляе з большым аптымізмам глядзець у будучыню.

У намінацыі “Грамадскі лідар года” перамаглі вядоўцы моўных шоў “Мова нанова”, “Моваведа”, “Мова тут” "Мова ці кава”. На ўручэнні прызоў былі Аляксей Шэін, Алена Шэрэмет і Валярына Кустава. Стваральнікі папулярных моўных курсаў зрабілі ў 2014 годзе вялікую супольную справу — у Мінску і ў рэгіёнах Беларусі істотна пашырылі беларускамоўную прастору.

У намінацыі “Кампанія году” перамагла кампанія “Пазнач сябе беларусам”, арганізаваная камандай “Арт Сядзібы”, у межах якой актыўна папулярызаваліся адзенне і стужкі з беларускім арнаментам.

Пераможцамі ў намінацыі “Новая ініцыятыва” сталі удзельнікі ініцыятывы “Эксперты ў абарону Курапатаў”. Кампанію судовага ціску на ўлады, каб юрыдычна абараніць ахоўныя межы Курапатаў ад незаконнага скарачэння і забудовы, група экспертаў распачала ў 2014 годзе. Адбыліся чатыры рэзанансныя судовыя паседжанні, праектаванне забудовы ахоўнай зоны прыпынілася. Кіраўнік Беларускай асацыяцыі ахвяраў палітычных рэпрэсій Зінаіда Тарасевіч, якая атрымлівала ўзнагароду, выказала падзяку ўсім, хто дапамагаў у высакароднай справе абароны ад забудовы месца расстрэлу і пахавання ахвяраў сталінскіх рэпрэсій.

У намінацыі “Рэгіянальная падзея” адзначаны Дзень памяці паўстанцаў 1863 году ў Свіслачы. Прысутныя заслухалі аўдыёзварот аднаго з арганізатараў грамадскай акцыі Юрыя Глебіка.

За нестандартны падыход да актуалізацыі значнай для грамадства тэмы ў намінацыі “Крэатыў году” перамагла акцыя салідарнасці футбольных фанатаў на матчы “Беларусь — Украіна” у Барысаве.

“Гарбуз году” для Упраўлення па грамадзянству і міграцыі ГУУС Мінгарвыканкаму і Аддзелу па грамадзянству і міграцыі Першамайскага РУУС Мінска за ануляванне віду на жыхарства праваабаронцы Алены Танкачовай атрымалі юрысты Цэнтра прававой трансфармацыі Lawtrend Андрэй Сушко і Аляксей Казлюк.

Найлепшым сайтам НДА прызнаны nastaunik.info. Узнагароду атрымлівалі яго рэдактарка Вольга Мазурава і ідэйная натхняльніца Тамара Мацкевіч.

Нефармальную частку імпрэзы ўпрыгожыў фуршэт і чароўныя гукі фартэп’яна ў выкананні Пятра Клюева.