Міністр абароны Польшчы: «Беларусь павінна знаходзіцца пад такім жа ціскам, як і Расія»

Беларускі рэжым павінен несці аднолькавую адказнасць разам з Расіяй за вайну супраць Украіны, бо стаіць плячо ў плячо з Расіяй і падтрымлівае агрэсію супраць Украіны. Пра гэта на адкрыцці Варшаўскага форуму па бяспецы заявіў віцэ-прэм'ер польскага ўрада, міністр абароны Польшчы Марыюш Блашчак.

52eddb93_7f9b_4eed_8a3f_6731bbfa037e_cx42_cy2_cw51_w1023_r1_s.webp


Марыюш Блашчак зазначыў, што апошнія месяцы карэнным чынам змянілі еўрапейскую бяспеку. «24 лютага стала для ўсіх нас напамінам аб тым, што кашмары поўнамаштабнай вайны ў Еўропе не засталіся ў мінулым. Няма сумневу, што гэта прыводзіць да шматлікіх пытанняў аб тым, як умацаваць нашу агульную бяспеку», — цытуе міністра «Радыё Св*бода».

Ён выказаў спадзяванне, што вынікі Варшаўскай канферэнцыі паслужаць добрай асновай для эфектыўнага супрацьдзеяння расійскай агрэсіі.

«У выніку брутальнага ўварвання Расіі ва Украіну мы маем справу з крызісам бяспекі. Мы спадзяваліся, што больш ніколі не будзем уцягнутыя ў поўнамаштабны ўзброены канфлікт у Еўропе. Расійская агрэсія даказала імперскія амбіцыі Масквы, якія цалкам ігнаруюць еўрапейскую архітэктуру бяспекі», — сказаў ён.

Блашчак падкрэсліў, што ні адна краіна не здольная самастойна супрацьстаяць усяму спектру пагроз і выклікаў. Як ён указаў, толькі ўся еўраатлантычная супольнасць можа супрацьстаяць намаганням Расіі, накіраваным на разбурэнне існуючага парадку.

4 кастрычніка на форуме ў Варшаве павінна выступіць Святлана Ціханоўская.

Нагадаем, што менавіта сёння Аляксандр Лукашэнка прызнаў удзел Беларусі ў расійскай вайне ва Украіне. Аднак ён назваў вайну «спецаперацыяй» і зазначыў, што не пасылае ва Украіну сваіх вайскоўцаў. Па яго словах, удзел Беларусі ў «спецаперацыі» заключаецца ў «прыкрыцці спіны» расійцаў.