Праз суткі пасля падпісання пагадзення аб вывазе збожжа расійцы ўдарылі па порце Адэсы
Учора ў Стамбуле паміж Украінай і Расіяй было падпісана пагадненне аб вывазе збожжа з украінскіх партоў. Сёння ў порт Адэсы прыляцелі ракеты.
Порт Адэсы. Фота: dw.com
Афіцыйны канал Адэсы прыводзіць паведамленне аператыўнага камандавання «Поўдзень» Узброеных Сіл Украіны:
«Вораг атакаваў Адэскі марскі гандлёвы порт крылатымі ракетамі тыпу "Калібр". Дзве ракеты збітыя сіламі супрацьпаветранай абароны, дзве трапілі ў аб'екты інфраструктуры порта».
У сваю чаргу, МЗС Украіны заявіў, што расійскі ўдар па Адэскім порце — гэта плявок у твар генеральнаму сакратару ААН Антоніу Гутэрышу і прэзідэнту Турцыі Рэджэпу Эрдагану, якія прыклалі велізарныя намаганні, каб дасягнуць дамоўленасці аб вывазе ўкраінскага збожжа.
«Менш за 24 гадзіны спатрэбілася, каб РФ нанесла ракетны ўдар па тэрыторыі горада Адэсы, каб паставіць пад сумнеў пагадненне і абяцанні ААН і Турцыі ў падпісаным учора ў Стамбуле дакуменце», — гаворыцца ў заяве МЗС Украіны.
Кіеў звярнуўся з заклікам да ААН і Турцыі забяспечыць выкананне Расіяй сваіх абавязацельстваў у рамках бяспечнага функцыянавання збожжавага калідора.
«У выпадку невыканання дасягнутых дамоўленасцей Расія будзе несці поўную адказнасць за паглыбленне сусветнага харчовага крызісу», — рэзюмуецца ў заяве.
Кіраўнік офіса прэзідэнта Украіны Андрэй Ярмакнапісаў у «Твітары»:
«Расійцы сістэматычна ствараюць харчовы крызіс, робячы ўсё, каб людзі пакутавалі. Тэрор голадам працягваецца. Свет павінен дзейнічаць».
Народны дэпутат Аляксей Ганчарэнка паведаміў пра паветраныя баі ў небе над Адэсай.