1029-ты дзень вайны. Краіны ЕС абмяркоўваюць адпраўку ва Украіну ад 40 да 100 тысяч міратворцаў у выпадку спынення агню
Зяленскі: «Нам патрэбныя моцныя Амерыка і Еўропа, каб аказаць ціск на Пуціна і спыніць гэтую вайну». Распавядаем пра галоўныя падзеі чарговага дня поўнамаштабнай вайны Расіі супраць Украіны.
Данецкая вобласць, 15 снежня 2024 года. Diego Herrera Carcedo / Anadolu / ABACAPRESS / ddp images / Vida Press
Расія запусціла па Украіне больш за 80 беспілотнікаў
У ноч на 18 снежня Расія атакавала Украіну 81 ударным беспілотнікам. Як заявілі ва УСУ, Паветраныя сілы збілі 51 беспілотнік, яшчэ 30 дронаў былі лакацыйна страчаныя.
Пад удар патрапілі Палтаўская, Сумская, Харкаўская, Кіеўская, Жытомірская, Хмяльніцкая, Чаркаская, Кіраваградская, Днепрапятроўская і Запароская вобласці.
Reuters: краіны ЕС абмяркоўваюць адпраўку ва Украіну ад 40 да 100 тысяч міратворцаў у выпадку спынення агню
Еўрапейскія краіны абмяркоўваюць адпраўку войскаў ва Украіну ў выпадку спынення агню. Колькасць еўрапейскага кантынгенту аналітыкі і крыніцы Reuters ацэньваюць у дыяпазоне ад 40 да 100 тысяч чалавек, а асноўную частку сіл могуць скласці вайскоўцы з Францыі, Германіі, Італіі, Польшчы і Вялікабрытаніі, перадае «Медуза».
Па дадзеных Reuters, перамовы аб адпраўцы еўрапейскага кантынгенту ва Украіну знаходзяцца на ранняй стадыі, але паміж краінамі ўжо ёсць рознагалоссі — нават з нагоды мэтазгоднасці абмеркавання гэтага пытання цяпер. Еўрапейскія лідэры, як піша агенцтва, не хочуць ствараць ва Уладзіміра Пуціна ўражанне, што прыйшоў час для перамоваў і ён зможа захаваць свае пазіцыі на полі бою. Аднак за кулісамі некаторыя чыноўнікі разглядаюць магчымыя гарантыі, якія ЕС мог бы даць Украіне.
Адна з украінскіх крыніц Reuters кажа, што еўрапейскія сілы стрымлівання могуць быць сфарміраваны кааліцыяй з пяці-васьмі краін. Некаторыя аналітыкі, апытаныя агенцтвам, лічаць, што колькасць еўрапейскага кантынгенту можа скласці каля 40 тысяч вайскоўцаў.
Былы спецыяліст па ваенным планаванні з Аўстрыі Франц-Штэфан Гадзі, які працуе ў Міжнародным інстытуце стратэгічных даследаванняў, лічыць, што ў ратацыі, якая будзе ўключаць падраздзяленні, якія рыхтуюцца да разгортвання, можа быць задзейнічана каля 100 тысяч вайскоўцаў. З гэтай ацэнкай згодны афіцэр еўрапейскай бяспекі, які гаварыў ананімна.
Пра такую ж колькасць у 100 тысяч вайскоўцаў у канцы лістапада гаварылі ў Службе знешняй разведкі Расіі. У СВР сцвярджалі, што, паводле інфармацыі, якая паступае, заходнія краіны ўсё больш схіляюцца да неабходнасці «замарожвання» вайны і могуць адправіць туды да 100 тысяч міратворцаў.
Прысутнасць еўрапейскіх сіл павялічыць рызыку прамой канфрантацыі з Расіяй, адзначае Reuters. Узнікае таксама пытанне, ці павінны яны знаходзіцца пад эгідай ААН — чыноўнікі лічаць, што гэта дасць Расіі занадта вялікі ўплыў.
Глядзіце таксама
Зяленскі: «Нам патрэбныя моцныя Амерыка і Еўропа, каб аказаць ціск на Пуціна і спыніць гэтую вайну»
Прэзідэнт Украіны Уладзімір Зяленскі адказаў на пытанні чытачоў французскай газеты Le Parisien. На пытанне, на якія кампрамісы ён быў бы гатовы пайсці, каб завяршыць вайну, і ці гатовы ён "аддаць Крым ці Данбас, хаця б часова", Зяленскі адказаў, што спыніць вайну магчыма толькі з міжнароднай дапамогай, перадае Бі-бі-сі:
«Мы не можам аддаць нашыя тэрыторыі. Канстытуцыя Украіны забараняе нам гэта рабіць. Дэ-факта гэтыя тэрыторыі зараз кантралююць расіяне. У нас няма сілы, каб вярнуць іх. Мы можам разлічваць толькі на дыпламатычны ціск з боку міжнароднай супольнасці, каб прымусіць Пуціна сесці за стол перамоваў».
«Я здзіўляюся: чаму Захад, які нас падтрымлівае, асцярожнічае з ім? Чаму з пачатку вайны нас масава не абсталявалі зброяй? Я магу здацца дзёрзкім. Але ў мяне такое ўражанне, што ўсе баяцца Расіі Пуціна. Ён карыстаецца беспакаранасцю. Нам патрэбны моцныя Амерыка і Еўропа, каб аказаць ціск на Пуціна і спыніць гэтую вайну», — дадаў украінскі прэзідэнт.
На пытанне, ці гатовы Зяленскі сесці за стол перамоваў з Пуціным, ён адказаў: «Важна не тое, хто сядзіць насупраць. Важная пазіцыя, з якой ты вядзеш перамовы. Я не думаю, што мы знаходзімся ў слабой пазіцыі, але і моцнай яе не назавеш. Ці будзем мы часткай НАТА? Мы не ведаем. Ці будзем мы часткай Еўразвяза? Так, у будучыні, але калі? Сесці за стол з Пуціным у гэтых умовах — значыць даць яму права вырашаць за нас».
Па словах Зяленскага, спачатку неабходна распрацаваць план дзеянняў і ўжо потым прад'яўляць яго расійскаму прэзідэнту.
«Але я настойваю: ніводны лідэр у свеце не мае права весці перамовы з Пуціным без Украіны. Мы ніколі нікому не дэлегавалі гэты мандат. Мы — ахвяры. Было б несправядліва, каб усе за нас пачалі б вырашаць, як павінна жыць краіна. Французы ў Францыі, італьянцы ў Італіі ці амерыканцы ў ЗША ведаюць, чаго яны жадаюць для сябе. Украінцы таксама», — сказаў Зяленскі падчас анлайн-размовы з чытачамі Le Parisien.