Ілан Маск абвергнуў інфармацыю пра продаж Starlink Расіі

Украінская выведка заявіла, што Расія выкарыстоўвае спадарожнікі Starlink у вайне. Ілан Маск даў адказ у сацсетках.

Украінская выведка заявіла, што войскі РФ выкарыстоўваюць Starlink у зоне баявых дзеянняў ва Украіне. Ілан Маск у адказ падкрэсліў, што ні адзін Starlink не быў прададзены ў Расію прама ці ўскосна, паведамляе «Deutsche Welle».

Амерыканскі прадпрымальнік Ілан Маск зняпраўдзіў паведамленні ўкраінскіх вайскоўцаў пра тое, што ён нібыта пастаўляе Расіі тэрміналы спадарожнікавага інтэрнэту Starlink. У паведамленні, выкладзеным на платформе «Х» вечарам у чацвер, 11 лютага, бізнесовец назваў такія паведамленні «ілжывымі навінамі».

Ілан Маск не адказаў прама на пытанне, ці можа Расія выкарыстоўваць тэрміналы Starlink, набытыя праз пасрэднікаў.

Украіна: расійскія вайскоўцы выкарыстоўваюць Starlink

Галоўнае ўпраўленне выведкі Мінабароны Украіны 11 лютага заявіла, што войскі РФ выкарыстоўваюць Starlink у зоне баявых дзеянняў, апублікаваўшы ў якасці доказу фрагмент перахопленых перамоў расійскіх вайскоўцаў. Выданні «Defense One» і «Astra» паведамлялі, што тэрміналы Starlink маглі быць пастаўлены ў Расію праз Дубай.

SpaceX у мінулым годзе забараніла ўкраінскім вайскоўцам выкарыстоўваць Starlink для наступальных мэт, у тым ліку для кіравання беспілотнікамі.

Не смяшыце Ілана Маска: Што не так з беларускім вайсковым аналагам «Starlink»

У біяграфіі Маска, напісанай Уолтжрам Айзексанам, сцвярджалася, што ў 2022 годзе Ілан Маск таемна даручыў адключыць спадарожнікі Starlink побач з узбярэжжам анексаванага Крыма, каб сарваць атаку УСУ на расійскі ваенна-марскі флот. У адказ Маск заявіў, што Starlink у Крыме не працуе, а ён адмовіўся ўключыць яго па просьбе ўкраінскіх вайскоўцаў, бо не мог дапусціць, каб яго кампанія была «наўпрост замяшана ў вайне і эскалацыі канфлікту».