Расія і размовы пра «брудную бомбу Украіны»

Днямі расійскія прапагандысты, а таксама міністр абароны РФ Сяргей Шайгу, пачалі распаўсюджваць «інфармацыю» пра нібыта наяўнасць ва Украіны «бруднай бомбы». Украінскі бок запрасіў МАГАТЭ дзеля праверкі чутак.

Украіна сёння, 24 кастрычніка, запрасіла экспертаў МАГАТЭ, каб праверыць абвінавачванні РФ у стварэнні «бруднай бомбы». Пра гэта паведаміў міністр замежных спраў Украіны Дзмітрый Кулеба па выніках размовы з кіраўніком МАГАТЭ Рафаэлем Гросі і заявіў, што МАГАТЭ прынялі запрашэнне Украіны, піша korrespondent.net.

Нагадаем, у Расіі пачалі распаўсюджваць заявы аб нібыта падрыхтоўцы Украінай правакацыі з выкарыстаннем «бруднай бомбы». Шайгу сказаў аб гэтым у размовах з калегамі з Турцыі, Францыі, Вялікабрытаніі і ЗША. Заходнія краіны асудзілі заявы Расіі пра бомбу і назвалі іх ілжывымі.

Аднак распаўсюд расійскага наратыву пра бомбу не спыніўся. Гэтым разам далучыўся прэс-сакратар прэзідэнта РФ Дзмітрый Пяскоў. Ён кажа, што гэта справа заходніх краін — верыць у бомбу ці не.

«Справа ў тым, што іх недавер да інфармацыі, якая была перададзеная расійскім бокам, не азначае, што перастае існаваць пагроза ўжытку такой «бруднай бомбы». Пагроза ў наяўнасці. Гэтая інфармацыя была даведзеная да ведама суразмоўцаў міністрам абароны, далей ужо іх справа — верыць ці не верыць», — так Пяскоў пракаментаваў заяву ЗША, Вялікабрытаніі і Францыі аб тым, што яны не вераць словам міністра абароны РФ Сяргея Шайгу аб пагрозе прымянення Украінай «бруднай бомбы».

Як мяркуюць у Інстытуце вывучэння вайны (ISW), гэтымі заявамі Расія спрабуе запаволіць або спыніць заходнюю вайсковую дапамогу Украіне і аслабіць NATO.