Беларусь хоча быць удзельнікам мірных перамоваў па Украіне. Але яе туды не клічуць

Беларусь хоча браць удзел у перамовах паміж Украінай і Расіяй, заявіў міністр замежных спраў Сяргей Алейнік у інтэрв'ю «РІА Навіны». Ён разлічвае, што такія перамовы ўсё ж такі пачнуцца.

«Будзем спадзявацца, што рана ці позна гэтыя перамовы адновяцца, але яны адновяцца сапраўды ў правільным фармаце, паміж Расіяй і Украінай, натуральна, і мы сябе бачым часткай гэтага працэсу, паколькі гэты канфлікт непасрэдна закранае і Беларусь», — сказаў ён.

Алейнік дадаў, што Мінск гатовы прыняць такія перамовы.

«Нашы дзверы для мірных перамоваў адчыненыя, яны заўсёды былі, ёсць і застаюцца адкрытымі. Мы заўсёды будзем гатовыя прыняць у сябе на беларускай зямлі перамовы, якія, як мы спадзяемся, будуць спрыяць аднаўленню міру і спыненню кровапраліцця ва Украіне», — сказаў ён.

З ягоных слоў, усё залежыць ад «палітычнай волі ўкраінскага кіраўніцтва».

Варта адзначыць, што інтэрв'ю «РІА Навіны» Сяргей Алейнік даў на фоне анонсу аб правядзенні ў Швейцарыі канферэнцыі па міры ва Украіне. Асноўнай для абмеркавання будзе мірная формула прэзідэнта Украіны Уладзіміра Зяленскага.

Мірны саміт па Украіне пройдзе ў швейцарскім Бюргенштоку 15-16 чэрвеня. Мэтай канферэнцыі пазначана прыйсці да агульнага разумення шляху да справядлівага і трывалага міру ва Украіне. Для ўдзелу ў саміце Швейцарыя запрасіла больш за 160 дэлегацый з усяго свету, у тым ліку прадстаўнікоў G7, G20, БРІКС, ААН, АБСЕ, Савета Еўропы, Ватыкана і Сусветнага патрыярха Канстанцінопаля. Швейцарыя запрасіла на канферэнцыю Папу Рымскага Францыска.

Старшыня КНР Сі Цзіньпін выказаў гатоўнасць працаваць з міжнароднай супольнасцю для заканчэння вайны ва Украіне. Пра гэта гаворыцца ў яго артыкуле ў газеце Le Figaro, апублікаваным у рамках яго дзяржаўнага візіту ў Францыю. «Чым даўжэй будзе доўжыцца ўкраінскі крызіс, тым большую шкоду будзе нанесены Еўропе і свету. Кітай спадзяецца, што еўрапейскі кантынент найбліжэйшым часам вернецца да міру і стабільнасці, і гатовы працаваць з міжнароднай супольнасцю, уключаючы Францыю, каб знайсці разумны шлях для развязання крызісу», — заявіў лідар КНР.

Расія і Беларусь не запрошаны для ўдзелу ў гэтай канферэнцыі. У РФ расцэньваюць яе правядзенне як спробу паставіць ультыматум Маскве.

Паводле reform.news