Самы восеньскі суп — «Гарбузнік». СМАЧНА З «НОВЫМ ЧАСАМ»

Давайце прыгатуем самы восеньскі суп, які нашы бабулі называлі проста — «Гарбузнік». Ведаеце, адкуль на тэрыторыю Беларусі прыйшлі рэцэпты гарбузовага супу? А якія гарбузы самыя смачныя і як іх  захаваць да новага ўраджаю?

На беларускіх землях дзякуючы прадпрымальным гандлярам гарбузы пачалі вырошчваць раней, чым  бульбу, — напрыканцы XV стагоддзя. Нашы продкі елі гарбузы самі і кармілі скаціну. А  сок, алей і семкі былі эфектыўнымі лекамі ў народнай медыцыне. Сучасныя медыкі таксама зазначаюць, што стравы з гарбуза сапраўды пазітыўна ўплываюць на абмен рэчываў і ўмацоўваюць імунітэт. А яшчэ ў даўнія часы нават посуд і адмысловыя бочачкі для віна ці для пасолу агуркоў выраблялі з суушаных гарбузоў.

Сёння гатаваць мы будзем суп з духмянага  гатунку «Батэрнат» (гарбуз, падобны да колбы альбо да вялікай ігрушы.) Гэты  гарбуз — самы салодкі, з арэхавым пры́смакам.

Наогул супы-пюрэ пачалі гатаваць ў Беларусі толькі ў XIX стагоддзі. Першыя рэцэпты прыйшлі з Францыі пасля вайны 1812 года. Да таго часу з гарбуза гатавалі ў асноўным толькі кашы.

З «Батэрната» і «Муската» атрымліваюцца смачныя цукаты, салаты, дэсерты і нават квас.

Каб выбраць сакавіты гарбуз, трэба звярнуць увагу на яго памер. Найлепш, калі вага плода — ад трох да пяці кілаграмаў. А пладаножка абавязкова павінна быць сухой. Такія гарбузы ў памяшканні з сухім, цёмным, з добрым праветрываннем і тэмпературай ад 2-х да 15-ці градусаў цяпла могуць захоўвацца да новага ўраджаю.

У гарбузе можна есці ўсё, нават хвосцік (пладаножку). Трэба толькі высушыць, перамалоць і дадаваць да страў з гародніны, напрыклад, бульбачку. Перамолаты хвосцік надасць страве такі смак, як быццам яе гатавалі ў печы.

Смачна, хутка, проста. Абед для вегана і не толькі

Гарбуз — гародніна, якую любяць ва ўсім свеце. У Аўстраліі ёсць нават кава з гарбуза. У Індыіі – халва. У Італіі  — гарбузовыя ньёкі. У Арменіі на вяселлі  падаюць хапаму (фаршырава́ны гарбуз). У Тайландзе любяць дэсэрт з гарбуза — санкайя. У Паўднёвай Карэі гатуюць традыцыйную кашу з гарбуза — хобакджук. Пералічваць можна бясконца.

 А ў гэтым годзе гарбуз, які вырасцілі ў Злучаных Штатах Амерыкі, стаў рэкардсменам кнігі Гінэса. Яго вага — 1246 кілаграмаў. У Беларусі таксама ёсць свой рэкардсмен. Гэтай восенню пад Брэстам у вёсцы Рэчкі вырас гарбуз вагой паўтоны.  

Гарбуз, моркву, цыбулю, бульбу крыху абсмажыць і адправіць у рондаль  з курыным булёнам тушыцца 10 хвілін (паўтара літра булёну). Дадаем крыху солі і і перцу.

А цяпер увага! Сакрэтны інгрэдыент, які дадасць пікантнасці нашай страве, — груша. Зразаем лупі́ну і таксама пакрышым кубікамі. Дадаём да нашай гародніны. Варым 15 хвілін.

Цяпер з простага супу зробім вытанчаны суп-пюрэ. Узбіваем і дадаём тлустыя вяршкі. Вяршкі абавязкова павінны быць цёплымі. І даводзім страву да кіпення.

Падамо страву з грэнкамі. Так будзе і смачней, і прыгажэй. Чорны хлеб загаддзя абсмажце на сухой патэльні і і не забудзьце нацерці яго часнаком. І яшчэ маленькі штрых: семечкі гарбуза і крыху пятрушкі.

Традыцыйны беларускі «Гарбузнік» варты меню самых лепшых рэстаўрацый сучаснасці.

Гатуйце разам з намі! З «Новым Часам» заўжды смачна!