«Рускія, дамоў!»: у Будапешце прайшоў масавы мітынг супраць палітыкі Орбана
Каля 80 тысяч чалавек сабраліся ў сталіцы краіны Будапешце. Жыхары Венгрыі незадаволены інфляцыяй і палітыкай цяперашняга ўрада.
Адзначаецца, што ўдзельнікі пратэстаў патрабавалі адстаўкі прэм'ер-міністра Венгрыі Віктара Орбана. Пры гэтым вялізную ролю ў пратэстах адыгралі настаўнікі, студэнты і іншыя супрацоўнікі сферы адукацыі. Пра гэта паведамляе Reuters.
Удзельнікі мітынгаў трымалі плакаты з надпісам «Орбан, згубіся» і «Няма настаўнікаў — няма будучыні». Людзі лічаць, што прэм'ер падмануў іх, выплачваючы маленькі заробак, а інфляцыя, якая перасягнула парог у 20%, працягвае расці і становіцца невыноснай.
Адзін з удзельнікаў пратэсту заявіў, што не проста не можа адкладаць грошы, але ўжо стала праблемай «зводзіць канцы з канцамі».
Акрамя таго, мітынгоўцы вельмі абураныя тым, што Орбан падтрымлівае прэзідэнта Расійскай Федэрацыі Пуціна ў вайне супраць Украіны і такім чынам ператварае краіну ў ізгоя. На некаторых плакатах можна было ўбачыць надпісы: «Рускія, дамоў!»
Венгерскі ўрад на чале з прэм'ер-міністрам Віктарам Орбанам вядомы сваёй прарасійскай пазіцыяй. У прыватнасці, ён неаднаразова ставіў перашкоды для ўвядзення новых санкцый супраць Расіі пасля пачатку поўнамаштабнага ўварвання ва Украіну.
Так, у верасні Орбан заклікаў ЕС увогуле адмяніць усе санкцыі супраць РФ да канца гэтага года.