Расійцы ўдарылі па Мікалаеве касетнымі снарадамі. Ёсць забітыя і параненыя (відэа)

У Мікалаеве ў выніку выбуху на прыпынку грамадскага транспарту ёсць ахвяры. Пра гэта паведаміў мэр украінскага горада Аляксандр Сянкевіч у Telegram.

«Выбух у раёне прыпынку грамадскага транспарту. Касетныя снарады. Ёсць ахвяры. Працуюць усе службы. Дэталі потым», — напісаў Аляксандр Сянкевіч.

У той жа час, паводле яго папярэдніх паведамленняў, у горадзе з 17:29 да 18:06 працягвалася паветраная трывога.

Кіраўнік Мікалаеўскага абласнога савета Ганна Замазеева паведаміла, што ў выніку расійскага абстрэлу загінулі два чалавекі, а 12 параненыя.

«Траплянне касетнымі снарадамі ў раён прыпынку грамадскага транспарту ў людным раёне горада! Менавіта ў гадзіну-пік... Менавіта тады, калі мірныя жыхары вярталіся дадому... Гэта нішто іншае, як мэтанакіраваны тэрарыстычны акт па знішчэнні мірнага насельніцтва!» — адзначыла Ганна Замазеева.

Пазней Сянкевіч удакладніў, што загінулі тры чалавекі.

«Па стане на 19:20 трое загінулых і 12 параненых. Таксама ёсць пашкоджанні жылых дамоў і электрасетак», — падзяліўся мэр.

Паводле unian.net.