«Ад імя Беларусі павінны выступаць сапраўдныя прадстаўнікі беларускага народа»: Ціханоўская дала інтэрв'ю Алесі Бацман
Святлана Ціханоўская дала інтэрв'ю ўкраінскай журналістцы Алесі Бацман, у якім распавяла аб стаўленні беларусаў да вайны, антываенным руху, ролі Лукашэнкі і стаўленні да Уладзіміра Пуціна.
На яе думку, загад беларускім ваенным уступіць у вайну стаў бы для Лукашэнкі самагубчым крокам.
«У грамадстве ўжо сфармаваўся кансэнсус, што беларускае войска не павінна ваяваць супраць Украіны, і такі загад быў бы суіцыдам для Лукашэнкі. І на палітычным узроўні — я ўвесь час кажу — пазбегнуць адказнасці і трыбунала атрымаецца толькі ў тых, хто адмовіцца выконваць злачынныя загады або пяройдзе на бок Украіны пасля перасячэння мяжы. Таму што ўпэўнена ўжо мы не можам казаць, што [Лукашэнка] не аддасць загад», — прыводзіць фрагменты інтэрв'ю REFORM.by.
Палітык распавяла пра антываенны рух і патлумачыла розніцу паміж расійскім і беларускім грамадствам, нягледзячы на пракрамлёўскую прапаганду, якая распаўсюджваецца на тэрыторыях абедзвюх краін.
«Таму што Беларусі ў цэлым — супраць рэжыму і ў цэлым — за сяброўства з Украінай. У нас няма нейкіх пачуццяў, якія адчуваюць, магчыма, расійцы да вас як да нацыі, таму што мы таксама змагаемся за сваю нацыянальную ідэнтычнасць і разумеем вас. Паўтара года беларусы змагаюцца супраць дыктатуры, і мы разумеем, што Лукашэнка ўцягнуў нас у гэтую вайну. Мы супраць яго, мы супраць вайны, мы супраць акупацыі Беларусі. Гэта значыць, цяпер мы змагаемся і з рэжымам, і за Украіну, таму што мы ж разумеем, што без свабоднай Украіны свабоднай Беларусі таксама не будзе. І без свабоднай Беларусі будзе пастаянная пагроза Украіне таксама, на жаль», — лічыць Ціханоўская.
На яе думку, Лукашэнка ўжо ўступіў у вайну 24 лютага, калі дазволіў уварвацца расійскім войскам з тэрыторыі Беларусі.
«Ён на той момант думаў, што Кіеў возьмуць за тры дні, і яны разам з Пуціным будуць прымаць парад на 9 траўня. Але цяпер мы бачым, што ён спрабуе перайграць. Не атрымалася бліцкрыгу, як яны, магчыма... не планавалі, а Лукашэнка хацеў быць побач, калі гэта здарыцца. І цяпер ён спрабуе прадставіць сябе як міратворца (...). Цяпер тым больш, калі расійскія войскі ўжо адышлі з тэрыторыі Украіны ў бок Беларусі, сэнсу ў гэта ўцягвацца ў Лукашэнкі ўжо няма. Але мы ўжо разумеем, што ён нясе адказнасць за гэтую вайну нароўні з Пуціным», — заяўляе палітык.
Ціханоўская лічыць, што Беларусь павінна быць бокам перамоўнага працэсу, паколькі з яе тэрыторыі ляцяць ракеты ва Украіну.
«Таму ў перамовах абавязкова ўлічваць беларускае пытанне, толькі вось чалавек, які працягвае забіваць, катаваць беларусаў, ён не здольны наогул удзельнічаць у перамовах аб міры. Яму гэтыя перамовы патрэбныя толькі для таго, каб падоўжыць сваё існаванне ва ўрадавым палацы. Таму, я думаю, што на перамовы павінны быць запрошаныя сапраўдныя прадстаўнікі беларускага народа», — лічыць яна.
Ціханоўская паведаміла, што яе каманда ўжо знаходзіцца ў кантакце з офісам Уладзіміра Зяленскага.
«Але з іх боку гэта вельмі асцярожныя кантакты — яны відавочна не хочуць правакаваць Лукашэнку. Але я яшчэ раз паўтару. Як можна верыць чалавеку, які шмат разоў абяцаў, што з тэрыторыі Беларусі Украіне не пагражае ніякая небяспека? ( ... ) Але сам факт, што ён пачаў называць вайну вайной, а не спецаперацыяй, сам факт, што ён загаварыў пра перамовы, — гэта сігналы, што ён хоча перайграць тое, што нарабіў», — падкрэслівае яна.
Уладзіміра Пуціна беларускі палітык назвала агрэсарам і дыктатарам, «які гатовы дзеля сваіх амбіцый акупаваць чужыя краіны, бамбіць дзіцячыя сады, выпальваць на целах людзей надпісы і сціраць у пыл цэлыя гарады».
«Магчыма, ён хацеў увайсці ў падручнікі вялікім заваёўнікам, але застанецца там як забойца. І на адной старонцы з яго фотаздымкамі, спадзяюся, будуць фатаграфіі Бучы, Марыупаля і Барадзянкі — як вынікаў яго праўлення», — заявіла Ціханоўская.
Па яе словах, задача нумар адзін цяпер — гэта дапамагчы Украіне перамагчы і дамагчыся вываду расійскіх войскаў з тэрыторыі Беларусі.
«Тое, што войска Беларусі не ўвайшло на тэрыторыю Украіны, паўтаруся, — гэта заслуга антываеннага руху і беларускага грамадства, якое робіць усё, каб гэтага не адбылося. (...) Беларусь не стала камфортным тылам для расійскіх салдат, як гэта меркавалася. І беларусы паказалі, што не змірацца з акупацыяй, што не дазволяць выкарыстоўваць сваю краіну супраць брацкай Украіны», — адзначае прадстаўніца дэмсілаў Беларусі.
Яна распавяла, што цяпер вядзецца праца, каб Лукашэнка больш не меў права прадстаўляць Беларусь.
«На перамовах ад імя Беларусі павінны выступаць сапраўдныя прадстаўнікі беларускага народа», — лічыць яна.
Яна таксама нагадала аб тым, што з пачатку вайны беларусы сутыкнуліся з дыскрымінацыяй за мяжой.
«Калі яшчэ на палітычным узроўні разумелі, што Лукашэнка і беларусы — гэта не адно і тое ж, то людзі, якіх наўпрост не тычыліся лёсу беларусаў, не меркавалі і не ведалі, што паўтара года ў краіне рэпрэсіі, што кожны дзень — новыя затрыманні. І мы запусцілі вялікую інфармацыйную кампанію, тлумачачы жыхарам суседніх краін, што не трэба дыскрымінаваць беларусаў толькі таму, што ў іх беларускі пашпарт», — распавяла Ціханоўская.