Супраць ваяроў палка Каліноўскага ў Беларусі завялі крымінальную справу
Беларускі Следчы камітэт распачаў крымінальную справу ў дачыненні да стваральнікаў і ўдзельнікаў палка Каліноўскага.
Паводле дадзеных следства, група беларусаў, знаходзячыся на тэрыторыі Украіны, Літвы і Польшчы, «натхніўшыся ідэямі нацыяналізму і прытрымліваючыся шаблонаў шавінісцкай ідэалогіі ўзброеных груповак суседняй краіны», скаапераваліся і стварылі полк імя Кастуся Каліноўскага.
У дачыненні да
кіраўнікоў і «ўжо ўстаноўленых удзельнікаў палка Каліноўскага» распачата
крымінальная справа па арт.361-1 (стварэнне экстрэмісцкага фарміравання або
ўдзел у ім) Крымінальнага кодэкса Беларусі.
Полк Каліноўскага ваюе ва Украіне ад першага дня вайны. У значнай ступені ён складзены з тых беларусаў, якія ў 2020 годзе зазналі на радзіме палітычны пераслед. Ваяры не хаваюць, што пасля перамогі ў вайне хочуць садзейнічаць пераменам у Беларусі.
Існы беларускі рэжым відавочна перасцерагаецца каліноўцаў. Лукашэнка рэгулярна згадвае іх на сваіх нарадах, а яго сілавікі рэгулярна кашмараць іх сваякоў у Беларусі.
